મહાસુભાષિતસંગ્રહ · શ્લોક 8736-8755

કરાદ્ગલિતખાદ્યસ્ય કા હાનિઃ કરિણો ભવેત્ ।
પિપીલિકા તુ તેનૈવ બિભર્તિ સ્વકુટુમ્બકમ્ ॥

કરાનીતં પટાનીતં સ્ત્રિયાનીતં તથૈવ ચ ।
એરણ્ડપત્રૈરાનીતં દેવતાનાં ચ નાર્હતિ ॥
કરાન્ તિરોધાય તરૂન્નિપીડ્ય શિલા અવસ્કન્દ્ય મહીયસોઽપિ ।
ઉજ્જૃમ્ભિતઃ કાલવશાત્ તદન્યસ્ તેષામધસ્તાત્પુનરેવ જાતઃ ॥

કરામ્બુજસજત્સમાક્ષવલયા તનુસ્ તવ શુભે જિતેન્દુસુષમા ।
છિનત્તુ દુરિતચ્છટાં મમ નદી તટીમિવ ચલજ્જલોદ્ધતગતિઃ ॥

કરામ્ભોજે કઞ્જી મદનમદભઞ્જી પદજુષાં મનઃપુઞ્જારઞ્જી મધુરમણિમઞ્જીરચરણઃ ।
કલાકૂતવ્યઞ્જી વ્રજયુવતિસઞ્જી જલમુચાં ગભીરાભાગઞ્જી મમ સ પરમઞ્જીવનધનમ્ ॥

કરારવિન્દેન પદારવિન્દં મુખારવિન્દે વિનિવેશયન્તમ્ ।
વટસ્ય પત્રસ્ય પુટે શયાનં બાલં મુકુન્દં સતતં સ્મરામિ ॥

કરાલકાલરુપેણ જનતાદુરિતાપહા ।
તારણી તરિણી ભૂયાદ્ અમુના યમુનામ્બુના ॥

કરાલવાચાલમુખાશ્ચમૂખનૈર્ ધ્વસ્તામ્બરા વીક્ષ્ય દિશો રજસ્વલાઃ ।
તિરોબભૂવે ગહનૈર્દિનેશ્વરો રજોન્ધકારૈઃ વરિતઃ કુતોઽપ્યસૌ ॥

કરાલૈર્વિકટૈઃ કૃષ્ણૈઃ પુરુષૈરુદ્યતાયુધૈઃ ।
પાષાણૈસ્ તાડિતઃ સ્વપ્ને સદ્યો મૃત્યું લભેન્ નરઃ ॥

કરાવિવ શરીરસ્ય નેત્રયોરિવ પક્ષ્મણી ।
અવિચાર્ય પ્રિયં કુર્યાત્ તન્ મિત્રં મિત્રમુચ્યતે ॥

કરા હિમાંશોરપિ તાપયન્તીત્ય્ એતત્ પ્રિયે ચેતસિ નૈવ શઙ્ક્યમ્ ।
વિયોગતપ્તં હૃદયં મદીયં તત્ર સ્થિતાં ત્વાં સમુપૈતિ તાપઃ ॥

કરિકપોલમદોદ્ધતબુદ્ધિતો મલિનપઙ્કજવૃન્દમિહાશ્રયન્ ।
કનકગૌરમમં નવચમ્પકં મધુપ ચઞ્ચલ મુઞ્ચસિ કિં મુધા ॥

કરિકલભ વિમુઞ્ચ લોલતાં ચર વિનયવ્રતમાનતાનનઃ ।
મૃગપતિનખકોટિભઙ્ગુરો ગુરુરુપરિ ક્ષમતે ન તેઽઙ્કુશઃ ॥

કરિકવલિતમૃષ્ટૈઃ શાખિશાખાગ્રપત્રૈર્ અરુણસરણયોઽમી સર્વતો ભીષયન્તે ।
ચલિતશબરસેનાદત્તગોશૃઙ્ગચણ્ડ- ધ્વનિચકિતવરાહવ્યાકુલા વિન્ધ્યપાદાઃ ॥
કરિકુમ્ભતુલામુરોજયોઃ ક્રિયમાણાં કવિભિર્વિશૃઙ્ખલૈઃ ।
કથમાલિ શૃણોષિ સાદરં વિપરીતાર્થવિદો હિ યોષિતઃ ॥

કરિકૃષ્ણાશ્વગન્ધા ચ નવનીતં ચ માહિષમ્ ।
એતેષાં મર્દનાલ્લિઙ્ગવૃદ્ધિઃ સંજાયતે પરા ॥

કરિણશ્ચ હસ્તિકર્ણૈર્ નિર્દેશ્યા વાજિનોઽશ્વકર્ણેન ।
ગાવશ્ચ પાટલાભિઃ કદલીભિરજાવિકં ભવતિ ॥

કરિન્ મા ગર્જોચ્ચૈર્મૂગપતિરિહાસ્તેઽતિનિકટે ન દૃષ્ટસ્ત્વં દૈવાદપસર સુદૂરં દ્રુતમિતઃ ।
ન કિં પશ્યસ્યગ્રે ખરનખરનિર્દારિતકરિ- પ્રકીર્ણાસ્થિશ્રેણીધવલિતમિમં શૈલકટકમ્ ॥

કરિમદપરિમલવાહી વહતિ બહિર્ગિરિસરિત્સમીર ઇતિ ।
મૃદુગર્ભાન્તર્માવં ન જહાતિ ગુહાગૃહસ્ય હરિગૃહિણી ॥

કરિવરમૃદિતવલીમુખ- નલકૈર્મૂલેષુ કીલિતસ્ય તરોઃ ।
સંવત્સરં ચ યાવત્ ફલિનસ્ય ફલાનિ જાયન્તે ॥

કરિષ્યતિ કલાનાથઃ કુતુકી કરમમ્બરે ।
ઇતિ નિર્વાપયામાસ રવિદીપં નિશાઙ્ગના ॥

કરિષ્યન્ ન પ્રભાષેત કૃતાન્યેવ ચ દશૈયેત્ ।
ધર્મકામાર્થકાર્યાણિ તથા મન્ત્રો ન ભિદ્યતે ॥