મહાસુભાષિતસંગ્રહ · શ્લોક 8696-8715

કરકલિતપિનાક નાકનાથ દ્બિષદુરુમાનસશૂલ શૂલપાણે ।
ભવ વૃષભવિમાન માનશૌણ્ડ ત્રિજગદકારણતારક પ્રસીદ ॥

કરકાકૃતભીકભેકલોક- પ્રતિપાલ્યાઃ કિમુ સાગરેણ કુલ્યાઃ ।
વલભિત્કુલિશપ્રહારભીરુ- ક્ષિતિભૃદ્રક્ષણદક્ષિણેન તુલ્યાઃ ॥
કરકિશલયચાલ્યમાનસૂર્પ- ક્રમનમદુન્નમદક્ષિપક્ષ્મપાલિ ।
કરનિહિતકનીનિકં સ્મિતાક્ષ્યાઃ ક્ષણમપિ નોત્પવનં જહાતિ ચેતઃ ॥

કરકિસલયં ધૂત્વા ધૂત્વા વિલમ્બિતમેખલા ક્ષિપતિ સુમનોમાલાશેષં પ્રદીપશિખાં પ્રતિ ।
સ્થગયતિ મુહુઃ પત્યુર્નેત્રે વિહસ્ય સમાકુલા સુરતવિરતૌ રમ્યં તન્વી પુનઃ પુનરીક્ષ્યતે ॥
કરકિસલયમૂલં ધુન્વતીનાં સ ધન્યઃ શ્રવણપથમનલ્પં યસ્ય પુંસઃ પ્રવિષ્ટાઃ ।
નવરતપરિરમ્ભે બાલસીમન્તિનીનાં અહહ ન ન ન મા મા મુઞ્ચ મુઞ્ચેતિ વાચઃ ॥

કરચરણકાઞ્ચિહાર- પ્રહારમવચિન્ત્ય બલગૃહીતકચઃ ।
પ્રણયી ચુમ્બતિ દયિતા- વદનં સ્ફુરદધરમરુણાક્ષમ્ ॥

કરચરણકૃતં વા કાયજં કર્મજં વા શ્રવણનયનજં વા માનસં વાપરાધમ્ ।
વિહિતમવિહિતં વા સર્વમેતત્ ક્ષમસ્વ જય જય કરુણાબ્ધે શ્રીમહાદેવ શંભો ॥

કરચરણનાસમાદૌ કર્ણૌ ગૃહ્ણાતિ રક્તતાં ગમયન્ ।
શીતં ગુરુકૃતપીડં પશ્ચાદઙ્ગાનિ કૂર્મ ઇવ ॥

કરચરણેન પ્રહરતિ યથા યથાઙ્ગેષુ કોપતરલાક્ષી ।
રોષયતિ પરુષવચનૈસ્ તથા તથા પ્રેયસીં રસિકઃ ॥

કરચુલુકજલો મહોદધિશ્ ચરણનિબદ્ધમહો નિજાઙ્ગણમ્ ।
નિજસદનસમં રસાતલં ભવતિ નૃણાં વ્યવસાયશાલિનામ્ ॥

કરજદશનચિહ્નં નૈશમઙ્ગેઽન્યનારી- જનિતમિતિ સરોષામીર્ષ્યયા શઙ્કમાનામ્ ।
સ્મરસિ ન ખલુ દત્તં મત્તયૈતત્ત્વયૈવ સ્ત્રિયમનુનયતીત્થં વ્રીડમાનાં વિલાસી ॥

કરજપદવિભૂષિતા યથા ત્વં સુદતિ દશનવિક્ષતાધરા ચ ।
ગતિરપિ ચરણાવલગ્નમન્દા ત્વમસિ મૃગસમાક્ષિ કામદત્તા ॥

કરજાલમપૂર્વચેષ્ટિતં વસ્ તદભીષ્ટપ્રદમસ્તુ તિગ્મભાસઃ ।
ક્રિયતે ભવબન્ધનાદ્ વિમુક્તિઃ પ્રણતાનામુપસેવિતેન યેન ॥

કરઞ્જારગ્વધારિષ્ટસપ્તપર્ણત્વચાકૃતઃ ।
ઉપચારઃ ક્રિમિહરો મૂત્રમુસ્તવિડઙ્ગવાન્ ॥

કરટિકરટે ભ્રસ્યદ્દાનપ્રવાહપિપાસયા પરિસરસરદ્ભૃઙ્ગશ્રેણી કરોતિ યદા રવમ્ ।
વદતિ શિરસઃ કમ્પૈર્નાસ્માન્નિવારય વારણ વિતર વિતરામાનં દાનં ચલાઃ કિલ સંપદઃ ॥

કરણભગણદોષં વારસંક્રાન્તિદોષં કુતિથિકુલિકદોષં યામયામાર્ધદોષમ્ ।
કુજશનિરવિદોષં રાહુકેત્વાદિદોષં હરતિ સકલદોષં ચન્દ્રમાઃ સંમુખસ્થઃ ॥

કરતરલિતબન્ધં કઞ્ચુકં કુર્વતીનાં પ્રતિફલિતમિદાનીં દૈપમાતામ્રમર્ચિઃ ।
સ્તનતટપરિણાહે ભામિનીનાં ભવિષ્યન્ નખપદલિપિલીલાસૂત્રપાતં કરોતિ ॥

કરતલયુગપરિણદ્ધે કુચકલશે કુઙ્કુમારુણે તસ્યાઃ ।
સિન્દૂરિતે કરિપતેઃ કુમ્ભે નક્ષત્રમાલેવ ॥

કરદીકરણં રાજ્ઞાં રિપૂણાં પરિમર્દનમ્ ।
ભૂમેરુપાર્જનં ભૂયો રાજવૃત્તં તુ ચાષ્ટધા ॥

કરનખરવિદીર્ણધ્વાન્તકુમ્ભીન્દ્રકુમ્ભાત્ તુહિનકણમિષેણ ક્ષિપ્તમુક્તાપ્રરોહઃ ।
અયમુદયધરિત્રીધારિમૂર્ધાવિરુઢો નયનપથમુપેતો ભાનુમત્કેસરીન્દ્રઃ ॥

કરપદાનનલોચનનામભિઃ શતદલૈઃ સુતનોર્વિરહજ્વરે ।
રવિમહો બહુપીતચરં ચિરાદ્ અનિશતાપમિષાદુદસૃજ્યત ॥

કરપાતૈર્દુરાલોકૈસ્ તીક્ષ્ણઃ સંતાપયન્ પ્રજાઃ ।
ભાનુર્ન ભવતા તુલ્યઃ ક્ષણસંરક્તમણ્ડલઃ ॥