મહાસુભાષિતસંગ્રહ · શ્લોક 8656-8675

વ્રજતિ મૃદુ સલીલં રાજહંસીવ તન્વી ત્રિવલિવલિતમઘ્યા હંસવાણી સુવેષા ।
મૃદુ શુચિ લઘુ ભુઙ્ક્તે માનિની ગાઢલજ્જા ધવલકુસુમવાસોવલ્લભા પદ્મિની સ્યાત્ ॥

કમલમુખિ સર્વતોમુખ- નિવારણં વિદધદેવ ભૂષયતિ ।
રોધોરુદ્ધસ્વરસાસ્ તરઙ્ગિણીસ્ તરલનયનાશ્ચ ॥

કમલવદના પીનોત્તુઙ્ગં ઘટાકૃતિ વિભ્રતી સ્તનયુગમિયં તન્વી શ્યામા વિશાલદૃગઞ્ચલા ।
વિશદદશના મધ્યક્ષામા વૃથેતિ જનાઃ શ્રમં વિદધતિ મુધા રાગાદુચ્ચૈરનીદૃશવર્ણને ॥

કમલવનચિતામ્બુઃ પાટલામોદરમ્યઃ સુખસલિલનિષેકઃ સેવ્યચન્દ્રાંશુહારઃ ।
વ્રજતુ તવ નિદાઘઃ કામિનીભિઃ સમેતો નિશિ સુલલિતગીતે હર્મ્યપૃષ્ઠે સુખેન ॥

કમલશરધિરમ્ભાસૈકતાનુક્રમાઢ્યં કનકકલશભારાક્રાન્તસૌદામિનીકમ્ ।
કિસલયિતમૃણાલં હારગર્ભપ્રવાલં કુવલયિતશશાઙ્કં કૌશલં સા વિધાતુઃ ॥

કમલાઃ પાકવિનમ્રા મૂલતલાઘ્રાતસુરભિકહ્લારાઃ ।
પવનાકમ્પિતશિરસઃ પ્રાયઃ કુર્વન્તિ પરિમલશ્લાઘામ્ ॥
કમલાકુચકનકાચલ- જલધરમાભીરસુન્દરીમદનમ્ ।
અધિતતશેષફણાવલિ- કમલવનીભૃઙ્ગમચ્યુતં વન્દે ॥

કમલાક્ષિ વિલમ્બ્યતાં ક્ષણં કમનીયે કચભારબન્ધને ।
દૃઢલગ્નમિદં દૃશોર્યુગં શનકૈરદ્ય સમુદ્ધરામ્યહમ્ ॥

કમલાચિબુકોન્નાયી કૃષ્ણસ્ય કરઃ કરોતુ કલ્યાણમ્ ।
મુકુર ઇવ નીલવૃન્તો ભાતિ નિતાન્તં તદાનનં યેન ॥

કમલાનિ પાનમધુભાજનાનિ નઃ પિદધાતિ યઃ સ વિધુરેષ ગોચરઃ ।
ઇતિ રોષણૈરિવ મધુવ્રતૈર્ધુતં દધતી મુખં સુરભિચારુમારુતમ્ ॥

કમલાભ્યાં સુધાસિન્ધુવદનેક્ષણયોસ્ તુલામ્ ।
કલયન્તુ પરે કિં તુ ક્વેમે પઙ્કેરુહે ક્વ તે ॥

કમલાસનકમલેક્ષણ- કમલારિકિરીટકમલભૃદ્વાહૈઃ ।
નુતપદકમલા કમલા કરધૃતકમલા કરોતુ મે કુશલમ્ ॥

કમલિનિ મલિનીકરોષિ ચેતઃ કિમિતિ બકૈરવહેલિતાનભિજ્ઞૈઃ ।
પરિણતમકરન્દમાર્મિકાસ્તે જગતિ ભવન્તુ ચિરાયુષો મિલિન્દાઃ ॥

કમલિનિ વિમલે જલે જનિસ્ તે તદુચિતમાચરણં ન સંતનોષિ ।
મલિનમલિકુલં યતસ્ત્વમન્તઃ શશિકિરણાન્ વિમલાન્ બહિષ્કરોષિ ॥

કમલિનીમલિની દયિતં વિના ન સહતે સહ તેન નિષેવિતામ્ ।
તમધુના મધુના નિહિતં હૃદિ સ્મરતિ સા રતિસારમહર્નિશમ્ ॥

કમલિનીવનકેલિકલારસી ગુણવશીકૃતકૈરવિણીગુણઃ ।
અલિરસૌ તવ સૌરભલોભતઃ પતતિ કેતકિકણ્ટકસંકટે ॥

કમલેઃ સમકેશં તે કમલેર્ષ્યાકરં મુખમ્ ।
કમલેખ્યં કરોષિ ત્વં કમલેવોન્મદિષ્ણુષુ ॥

કમલે કમલા શેતે હરઃ શેતે હિમાલયે ।
ક્ષીરાબ્ધૌ ચ હરિઃ શેતે મન્યે મત્કુણશઙ્કયા ॥

કમલે કમલે નિત્યં મધૂનિ પિબતસ્ તવ ।
ભવિષ્યન્તિ ન સન્દેહઃ કષ્ટં દોષાકરોદયે ॥

કમલે કમલોત્પત્તિઃ શ્રૂયતે ન ચ દૃશ્યતે ।
બાલે તવ મુખામ્ભોજે દૃષ્ટમિન્દીવરદ્વયમ્ ॥

કમલે નિધાય કમલં કલયન્તી કમલવાસિનં કમલે ।
કમલયુગાદુદ્ભૂતં કમલં કમલેન વારયતિ ॥