મહાસુભાષિતસંગ્રહ · શ્લોક 7634-7653

એકામ્ભોધીકૃતાયાં ભુવિ જગદખિલં નિર્જનીકૃત્ય ખેલન્ દેવઃ કાલીસહાયઃ પ્રસભવિહરણોન્મુક્તલીલાટ્ટહાસઃ ।
સદ્યો દંષ્ટ્રાંશુભિન્ને તમસિ નિજવપુર્બિમ્બમાલોક્ય કસ્ત્વં કસ્ત્વં બ્રૂહીતિ કોપાદભિદધદભયં ભૈરવશ્ચેષ્ટતાં વઃ ॥

એકારિમિત્રયોશ્ચેત્ પરસ્પરં ભૂપયોર્ભેદઃ ।
તદુપરિ પરિણતનીતિઃ સુખમભિયોગં કરોતુ ગતભીતિઃ ॥

એકારૌકારયુક્તા હરિહરિજહરાઃ પઞ્ચ બાણાઃ સ્મરસ્ય ખ્યાતા લક્ષ્યાણ્યમીષાં હૃદયકુચદૃશો મૂર્ધ્નિ ગુહ્યે ક્રમેણ ।
મર્મસ્વેતેષુ ભૂયો નિજનયનધનુઃપ્રેરિતૈસ્તૈઃ પતદ્ભિઃ સ્યન્દન્તે સુન્દરીણાં જ્વલદનલનિભૈર્બિન્દવઃ કામવારામ્ ॥

એકાર્થાં સમ્યગુદ્દિશ્ય યાત્રાં યત્ર હિ ગચ્છતઃ ।
ય સંહતપ્રયાણસ્તુ સન્ધિઃ સંયોગ ઉચ્યતે ॥

એકાર્થાભિનિવેશિત્વમ્ અરિલક્ષણમુચ્યતે ।
દારુણસ્ તુ સ્મૃતઃ શત્રુર્ વિજિગીષુગુણાન્વિતઃ ॥

એકાવલીકલિતમૌક્તિકકૈતવેન કસ્યાશ્ચિદુન્નતપયોધરયુગ્મસેવામ્ ।
ચક્રુર્મનાંસિ યમિનામતિનિર્મલાનિ કંદર્પમુક્તશરપાતકૃતાન્તરાણિ ॥

એકાવસ્થિતિરસ્તુ વઃ પુરમુરપ્રદ્વેષિણોર્દેવયોઃ પ્રાલેયાઞ્જનશૈલશૃઙ્ગસુભગચ્છાયાઙ્ગયોઃ શ્રેયસે ।
તાર્ક્ષ્યત્રાસવિહસ્તપન્નગફટા યસ્યાં જટાપાલયો બાલેન્દુદ્યુતિકોશસુપ્તજલજો યસ્યાં ચ નાભીહ્રદઃ ॥

એકા વા દુગ્ધિકા તુમ્બી શઙ્ખપુષ્પી જટા ધૃતા ।
કણ્ઠદન્તોદ્ભવા ભૂતવેદનાહરણક્ષમા ॥

એકાસનસ્થા જલવાયુભક્ષા મુમુક્ષવસ્ ત્યક્તપરિગ્રહાશ્ચ ।
પૃચ્છન્તિ તેઽપ્યમ્બરચારિચારં દૈવજ્ઞમન્યે કિમુતાર્થચિત્તાઃ ॥

એકાહં જપહીનસ્તુ સન્ધ્યાહીનો દિનત્રયમ્ ।
દ્વાદશાહમનગ્નિસ્તુ શૂદ્ર એવ ન સંશયઃ ॥

એકાહનિષ્પન્નમહાપ્રબન્ધઃ શ્રીસિદ્ધરાજપ્રતિપન્નબન્ધુઃ ।
શ્રીપાલનામા કવિચક્રવર્ત્તી પ્રશસ્તિમેતામકરોત્ પ્રશસ્તામ્ ॥

એકાહમપિ કૌન્તેય ભૂયિષ્ઠમુદકં કુરુ ।
કુલં તારયતે તાત સપ્ત સપ્ત ચ સપ્ત ચ ॥

એકાહારેણ સંતુષ્ટઃ ષટ્કર્મનિરતઃ સદા ।
ઋતુકાલાભિગામી ચ સ વિપ્રો દ્વિજ ઉચ્યતે ॥

એકિકેવ નિજવૃન્દમધ્યગાપ્ય્ ઉચ્ચુકૂજ સભયં સિતચ્છદી ।
દન્તમૂલમસકૃચ્ચ સંશયાદ્ આમમર્શ કરિણઃ કરેણુકા ॥

એકીકૃતસ્ત્વચિ નિષિક્ત ઇવાવપીડ્ય નિર્ભુગ્નપીનકુચકુડ્મલયાનયા મે ।
કર્પૂરહારહરિચન્દનચન્દ્રકાન્ત- નિષ્યન્દશૈવલમૃણાલહિમાદિવર્ગઃ ॥

એકીકૃત્ય કિમોષધીપતિરસૈરાકાશભાણ્ડોદરે ફુલ્લત્પઙ્કજિનીજનામ્બુજમુખધ્માતૈઃ સમન્તાન્ મુહુઃ ।
કાષ્ઠોત્થારુણદીપ્તિવહ્નિપટલૈરાતાપ્ય સમ્યગ્ ભૃશં તારાપારદમારણં વિતનુતે વૈદ્યોઽનવદ્યો રવિઃ ॥

એકીભાવં ગતયોર્ જલપયસોર્મિત્રચેતસોશ્ચૈવ ।
વ્યતિરેકકૃતૌ શક્તિર્ હંસાનાં દુર્જનાનાં ચ ॥

એકીભૂય સ્ફુટમિવ કિમપ્યાચરદ્ભિઃ પ્રલીનૈર્ એભિર્ભૂતૈઃ સ્મર કતિ કૃતાઃ સ્વાન્ત તે વિપ્રલમ્ભાઃ ।
તસ્માદેષાં ત્યજ પરિચયં ચિન્તય સ્વવ્યવસ્થામ્ આભાષસ્તે કિમુ ન વિદિતઃ ખણ્ડિતઃ પણ્ડિતઃ સ્યાત્ ॥

એકે કુટીરકોણેઽપિ ન લક્ષ્યન્તે સ્થિતાઃ ક્વચિત્ ।
અન્યેષાં વિભવસ્યૈતદ્ બ્રહ્માણ્ડમપિ સંકટમ્ ॥

એકે કેચિત્ યતિકરગતાઃ પાત્રસંજ્ઞાં લભન્તે ગાયન્ત્યન્યે સરસમધુરં વીણયા સંપ્રયુક્તાઃ ।
એકે તેષાં સહગતિવશાદ્ દુસ્તરં તારયન્તિ કેચિત્ તેષાં જ્વલિતહૃદયા રક્તમેવાપિબન્તિ ॥