મહાસુભાષિતસંગ્રહ · શ્લોક 7492-7512

એકત્રાપિ હતે જન્તૌ પાપં ભવતિ દારુણમ્ ।
ન સૂક્ષ્માનેકજન્તૂનાં ઘાતિનો મધુપસ્ય કિમ્ ॥

એકત્રાસનસઙ્ગતિઃ પરિહૃતા પ્રત્યુદ્ગમાદ્ દૂરતસ્ તામ્બૂલાનયનચ્છલેન રભસાશ્લેષોઽપિ સંવિઘ્નિતઃ ।
આલાપોઽપિ ન મિશ્રિતઃ પરિજનં વ્યાપારયન્ત્યાન્તિકે કાન્તં પ્રત્યુપચારતશ્ચતુરયા કોપઃ કૃતાર્થીકૃતઃ ॥

એકત્રાસનસઙ્ગતે પ્રિયતમે પશ્ચાદુપેત્યાદરાદ્ એકસ્યા નયને પિધાય મહતઃ ક્રીડાનુબન્ધચ્છલાત્ ।
તિર્યગ્વક્રિતકન્ધરઃ સપુલકસ્વેદોદ્ગમાનન્દિનીમ્ અન્તર્હાસલસત્કપોલફલકાં ધૂર્તોઽપરાં ચુમ્બતિ ॥

એકત્વં ન રસૈઃ કયોઃ સમજનિ સ્ત્રીપુંસયોઃ પ્રાવૃષિ પ્રાપ્તૌ યદ્રસનિર્ભરાવિહ ધરાકાશૌ ચિરાદેકતામ્ ।
યોષિત્સઙ્ગમગૂઢસર્વતરુણઃ કાલોઽયમાલોક્યતે છન્નઃ ક્વાપિ દિવા યુવાપિ નિશયા ક્રોડીકૃતઃ ક્રીડતિ ॥

એકદન્તં ત્રિનયનં જ્વાલાનલસમપ્રભમ્ ।
ગણાધ્યક્ષં ગજમુખં પ્રણમામિ વિનાયકમ્ ॥

એકદન્તદ્યુતિસિતઃ શંભોઃ સૂનુઃ શ્રિયેઽસ્તુ વઃ ।
વિદ્યાકન્દ ઇવોદ્ભિન્નનવાઙ્કુરમનોહરઃ ॥

એકદા ન વિગૃહ્ણીયાદ્ બહૂન્ રાજાભિઘાતિનઃ ।
સદર્પોઽપ્યુરગઃ કીટૈર્ બહુભિર્નાશ્યતે ધ્રુવમ્ ॥

એકદેશમુપાધ્યાય ઋત્વિગ્ યજ્ઞકૃદુચ્યતે ।
એતે માન્યા યથાપૂર્વમ્ એભ્યો માતા ગરીયસી ॥

એકદ્વિકરણે હેતૂ મહાપાતકપઞ્ચકે ।
ન તૃણે મન્યતે કોપકામૌ યઃ પઞ્ચ કારયન્ ॥

એકદ્વિત્રિકલાક્રમેણ શશિનં ગૃહ્ણન્વિમુઞ્ચન્નયં યચ્ ચણ્ડદ્યુતિરાતનોતિ ભગવાનદ્યાપિ ચાન્દ્રાયણમ્ ।
દેવૈતદ્ ભવદીયભાસ્વરભુજસ્તમ્ભપ્રતાપાનલ- સ્પર્ધાયૈ ક્રમભુક્તલાઞ્છનપશોર્નૈતત્ પુનઃ સેત્સ્યતિ ॥

એકદ્વિપ્રભૃતિક્રમેણ ગણનામેષામિવાસ્તં યતાં કુર્વાણા સમકોચયદ્ દશશતાન્યમ્ભોજસંવર્તિકાઃ ।
ભૂયોઽપિ ક્રમશઃ પ્રસારયતિ તાઃ સંપ્રત્યમૂનુદ્યતઃ સંખ્યાતું સકુતૂહલેવ નલિની ભાનોઃ સહસ્રં કરાન્ ॥

એકદ્વેષુ રસાલશાખિષુ મનાગુન્મીલિતં કુડ્મલૈઃ કર્ણાકર્ણિકયા મિથઃ કથમમી ઘૂર્ણન્તિ વિશ્વેઽધ્વગાઃ ।
દ્વિત્રૈઃ ક્વાપિ કિલ શ્રુતાશ્રુતમપિ સ્પષ્ટાન્યપુષ્ટારુતં વિષ્વઙ્મૂર્છતિ દુઃસહો વિરહિણીગેહેષુ હાહારવઃ ॥

એકદ્વૈઃ કિમભાવિ સૂરિભિરથ દ્વિત્રાણિ મિત્રાણિ કિં વ્યાપન્નાનિ ગતાશ્ચ કિં ત્રિચતુરા ઘોરા મહાવ્યાધયઃ ।
સપ્તાષ્ટૈરલમિષ્ટમેતદપિ નશ્ચેતઃ ક્ષણાન્ પઞ્ચષાન્ સ્વાત્મન્યેવ રમસ્વ તેજસિ ગતે કાલેઽથવા સર્વતઃ ॥

એકદ્વૈર્દિવસૈર્ભવિષ્યતિ મનાગ્ દોરન્તરં દન્તુરં દ્વિત્રૈરેવ દિનૈશ્ચ લોચનપથં રોમાવલી યાસ્યતિ ।
કિં ચાભૂદિવ વાસરૈસ્ત્રિચતુરૈશ્ચાઞ્ચલ્યમસ્યા દૃશોસ્ તજ્જેતું જગતીમનઙ્ગ કિમતીવાયાસમાલંબસે ॥

એકદ્વૈર્મધુબિન્દુભિર્મધુલિહઃ સ્યાદેવ કુક્ષિમ્ભરિઃ કસ્મિન્ વા કુસુમે ભવન્તિ સુલભા તેઽમી પુનઃ પઞ્ચષાઃ ।
કાલઃ કોઽપિ સ તાદૃશઃ પરિણતો યેનૈકતૃષ્ણાકુલો યદ્યત્ પુષ્પમુપાગમત્ કૃપણવત્ તેનાસ્ય મા કુઞ્ચિતમ્ ॥

એકધાતુર્દ્વિખણ્ડઃ સ્યાદ્ યત્રોદ્ગ્રાહસ્તતઃ પરમ્ ।
તૃતીયં કિંચિદુચ્ચં સ્યાત્ ખણ્ડં ગમકશોભનમ્ ॥

એકનિભા યત્ર મહી તૃણતરુવલ્મીકગુલ્મપરિહીના ।
તસ્યાં યત્ર વિકારો ભવતિ ધરિત્ર્યાં જલં તત્ર ॥

એકન્તુ લોકવેદેભ્યઃ સારમાકૃષ્ય કથ્યતે ।
પ્રાણાત્યયેઽપિ ન ત્યાજ્યો ન્યાય્યો ધર્મશ્લથઃ પથઃ ॥

એકપઙ્ક્ત્યુપવિષ્ટાનાં વિપ્રાણાં સહભોજને ।
યદ્યેકોઽપિ ત્યજેદન્નં સર્વૈરુચ્છિષ્ટભોજનમ્ ॥

એકપત્નીસમાસક્તૈર્ ભવદ્ભિઃ સંહતૈર્મિથઃ ।
સ્થાતવ્યમપ્રસાદેન ભેદમૂલં હિ યોષિતઃ ॥