મહાસુભાષિતસંગ્રહ · શ્લોક 7472-7491

એકતઃ સર્વપાપાનિ મદ્યપાનં તથૈકતઃ ।
એકતઃ સર્વદાનાનિ બ્રહ્મચર્યં તથૈકતઃ ॥

એકતશ્ચતુરો વેદાઃ સાઙ્ગોપાઙ્ગાઃ સવિસ્તરાઃ ।
સ્વાધીનાસ્તે નરશ્રેષ્ઠ સત્યમેકં કિલૈકતઃ ॥

એકતશ્ચતુરો વેદા બ્રહ્મચર્યં તથૈકતઃ ।
એકતઃ સર્વપાપાનિ મદ્યપાનં તથૈકતઃ ॥

એકતશ્ચ સુરસુન્દરીજનઃ શ્રીઃ પ્રતીચ્છતિ યુયુત્સુમન્યતઃ ।
પાપ્મના સહ પલાયતોઽયશશ્ ચૈકતઃ કુલકલઙ્કકારણમ્ ॥

એકતામિવ ગતસ્ય વિવેકઃ કસ્યચિન્ ન મહતોઽપ્યુપલેભે ।
ભાસ્વતા નિદધિરે ભુવનાનામ્ આત્મનીવ પતિતેન વિશેષાઃ ॥

એકતો દિવસાન્ બાલા ગણયત્યેકતોઽન્તકઃ ।
ન વિદ્મઃ પ્રથમં કસ્ય યાસ્યામો વયમન્તિકમ્ ॥

એકતોઽપરિતોષશ્ચેદ્ અન્યમન્યં મહીભુજમ્ ।
નિદાઘપાન્થવચ્છાયામ્ અન્યામન્યામુપાશ્રયેત્ ॥
એકતોઽપિ ભુવિ ભૂરિશોઽભવન્ દીપકાદહહ પશ્ય દીપકાઃ ।
અન્ધકારનિધનાય ભાનુમન્- મુક્તદિવ્યવિશિખાદિવેષવઃ ॥

એકતોઽભ્યુદિતમિન્દુમણ્ડલં સ્મેરમાસ્યમસિતભ્રુવોઽન્યતઃ ।
ચઞ્ચુકોરકપુટીં ચકોરિકા ચાલયત્યુભયતોઽપિ ધાવતિ ॥

એકતો માતૃવાત્સલ્યં પરતો ગુણકોટયઃ ।
અનયોઃ સમતાં વક્તું નાલં બ્રહ્માદયઃ સુરાઃ ॥

એકતો વા કુલં કૃત્સ્નમ્ આત્મા વા કુલવર્ધન ।
ન સમં સર્વમેવેતિ બુધાનામેષ નિશ્ચયઃ ॥

એકતોવ્યાધિદુર્ભિક્ષપ્રમુખા વિપદોઽખિલાઃ ।
પ્રજાનામેકતસ્ત્વેકા લુબ્ધતા વસુધાપતેઃ ॥

એકત્ર કૌલવ્રતભઙ્ગશઙ્કા વિદગ્ધતાભઙ્ગભયં પરત્ર ।
ઇત્યાકુલાનાં કુલકામિનીનાં ગતાગતૈરેવ ગતા ત્રિયામા ॥

એકત્ર નાસ્ય રતિરિત્યવધૂયમાનઃ કોપાદિવ શ્વસનકમ્પવિઘૂર્ણિતાયાઃ ।
રક્તચ્છદં મધુસુગન્ધિ સરોરુહિણ્યા ભૃઙ્ગશ્ ચુચુમ્બ કમલાનનમાદરેણ ॥

એકત્ર પ્રપઠન્તિ સામ ચ યજુશ્ચાન્યત્ર વેદાન્તરં હિંસ્રાશ્ચાપિ મૃગાયિતાશ્ચ પરતો યાગોત્થધૂમઃ શિવઃ ।
આતિથ્યાદિવિધિઃ પરત્ર વિધિવત્ પાદ્યાદિનાપાદ્યતે નાનાશાસ્ત્રવિવેચનં ચ વટુભિઃ સંતન્યતે સઙ્ગતૈઃ ॥

એકત્ર પ્રાકૃતૈઃ સામ્યમ્ અન્યત્ર પરતન્ત્રતા ।
શુકસ્ય પરિતોષાય ન વનં ન ચ પત્તનમ્ ॥

એકત્ર મધુનો બિન્દૌ ભક્ષતેઽસંખ્યદેહિનઃ ।
યો હિ ન સ્યાત્ કૃપા તસ્ય તસ્માન્ મધુ ન ભક્ષયેત્ ॥

એકત્ર વાસાદવસાનભાજસ્ તામ્બૂલલક્ષ્મ્યા ઇવ સંસ્મરન્તી ।
વક્ત્રેષુ યદ્વૈરિવિલાસિનીનાં હાસપ્રભા તાનવમાસસાદ ॥

એકત્ર સાર્થે વ્રજતાં બહૂનાં તુલ્યેઽપિ જાતે શકુને ફલાનિ ।
નાનાપ્રકારાણિ ભવન્તિ યેન તં હંસચારં પ્રવિચારયામઃ ॥

એકત્ર સ્ફટિકતટાંશુભિન્નનીરા નીલાશ્મદ્યુતિભિદુરામ્ભસોઽપરત્ર ।
કાલિન્દીજલજનિતશ્રિયઃ શ્રયન્તે વૈદગ્ધીમિહ સરિતઃ સુરાપગાયાઃ ॥

એકત્રાદદતે જલં જલધરવ્યૂહાઃ પરત્રાપ્યમી દીપ્યદ્દિક્કરિણઃ પરત્ર વડવાવક્ત્રોદ્ગતા વહ્નયઃ ।
એતાવત્ સતતવ્યયેઽપિ સુતરામાશ્ચર્યમમ્ભોનિધેસ્ તા એવ સ્થિતયઃ સ એવ મહિમા સૈવાસ્ય ગમ્ભીરતા ॥