મહાસુભાષિતસંગ્રહ · શ્લોક 7252-7271

ઉલ્લઙ્ઘ્યાપિ સખીવચઃ સમુચિતામુત્સૃજ્ય લજ્જામલં હિત્વા ભીતિભરં નિરસ્ય ચ નિજં સૌભાગ્યગર્વં મનાક્ ।
આજ્ઞાં કેવલમેવ મન્મથગુરોરાદાય નૂનં મયા ત્વં નિઃશેષવિલાસિવર્ગગણનાચૂડામણિઃ સંશ્રિતઃ ॥

ઉલ્લસત્સૌરભૈઃ પુષ્પૈર્ બિભ્રન્માલાં સુગુમ્ફિતામ્ ।
પર્ય્યન્તસ્થાયિનોઽપ્યન્યાન્ આમોદયતિ ભૂપતિઃ ॥

ઉલ્લસિતભ્રૂઃ કિમતિ- ક્રાન્તં ચિન્તયસિ નિસ્તરઙ્ગાક્ષિ ।
ક્ષુદ્રાપચારવિરસઃ પાકઃ પ્રેમ્ણો ગુડસ્યેવ ॥

ઉલ્લસિતભ્રૂધનુષા તવપૃથુના લોચનેન રુચિરાઙ્ગિ ।
અચલા અપિ ન મહાન્તઃ કે ચઞ્ચલભાવમાનીતાઃ ॥

ઉલ્લસિતલાઞ્છનોઽયં જ્યોત્સ્નાવર્ષી સુધાકરઃ સ્ફુરતિ ।
આસક્તકૃષ્ણચરણઃ શકટ ઇવ પ્રકટિતક્ષીરઃ ॥

ઉલ્લસિતશીતદીધિતિ- કલોપકણ્ઠે સ્ફુરન્તિ તારૌઘાઃ ।
કુસુમાયુધવિધૃતધનુર્- નિર્ગતમકરન્દબિન્દુનિભાઃ ॥

ઉલ્લાપયન્ત્યા દયિતસ્ય દૂતીં વધ્વા વિભૂષાં ચ નિવેશયન્ત્યાઃ ।
પ્રસન્નતા કાપિ મુખસ્ય જજ્ઞે વેષશ્રિયા નુ પ્રિયવાર્તયા નુ ॥

ઉલ્લાસોઽધરપલ્લવસ્ય તનુતે પર્યાપ્તમસ્યાઃ સ્મિતે વિન્યાસો નયનાઞ્ચલસ્ય ગમયત્યુત્સાહવત્ સાહસમ્ ।
રત્યાગારપથામુખીનગમકં વૈજાત્યકક્ષાવધિઃ પર્યઙ્કે પદરોપણં પુનરપર્યન્તા વિપર્યસ્તતા ॥

ઉલ્લાસો વિરુતેન મઙ્ગલબલિગ્રાસેન વિશ્વાસનં સંચારેણ કૃતો વિલોચનયુગે બાષ્પોદ્ગમાવગ્રહઃ ।
યાતોઽસ્તમ્ રવિરેષ સંપ્રતિ પુરઃ સ્વસ્ત્યસ્તુ તે ગમ્યતામ્ એતે ત્વામનુયાન્તુ સંપ્રતિ મમ પ્રાણાઃ પ્રિયાન્વેષિણઃ ॥

ઉલ્લાસ્ય કાલકરવાલમહામ્બુવાહં દેવેન યેન જરઠોર્જિતગર્જિતેન ।
નિર્વાપિતઃ સકલ એવ રણે રિપૂણાં ધારા જલૈસ્ ત્રિજગતિ જ્વલિતઃ પ્રતાપઃ ॥

ઉલ્લાસ્યતાં સ્પૃષ્ટનલાઙ્ગમઙ્ગં તાસાં નલચ્છાયપિબાપિ દૃષ્ટિઃ ।
અશ્મૈવ રત્યાસ્ તદનર્તિ પત્યા છેદેઽપ્યબોધં યદહર્ષિ લોમ ॥

ઉલ્લેખં નિજમીક્ષતે ભણિતિષુ પ્રૌઢિં પરાં શિક્ષતે સંધત્તે પદસંપદઃ પરિચયં ધત્તે ધ્વનેરધ્વનિ ।
વૈચિત્ર્યં વિતનોતિ વાચકવિધૌ વાચસ્પતેરન્તિકે દેવ ત્વદ્ગુણવર્ણનાય કુરુતે કિં કિં ન વાગ્દેવતા ॥

ઉવાચ ધાત્ર્યા પ્રથમોદિતં વચો યયૌ તદીયામવલમ્બ્ય ચાઙ્ગુલિમ્ ।
અભૂચ્ચ નમ્રઃ પ્રણિપાતશિક્ષયા પિતુર્મુદં તેન તતાન સોઽર્ભકઃ ॥

ઉશના વેદ યચ્છાસ્ત્રં યચ્ચ વેદ બૃહસ્પતિઃ ।
સ્ત્રીબુદ્ધ્યા ન વિશિષ્યેતે તાઃ સ્મ રક્ષ્યાઃ કથં નરૈઃ ॥

ઉષઃકાલશ્ચ ગર્ગશ્ચ શકુનં ચ બૃહસ્પતિઃ ।
અઙ્ગિરાશ્ચ મનોત્સાહો વિપ્રવાક્યં જનાર્દનઃ ॥

ઉષઃ શશંસ ગાર્ગ્યસ્તુ શકુનં તુ બૃહસ્પતિઃ ।
મનોજયં તુ માણ્ડવ્યો વિપ્રવાક્યં જનાર્દનઃ ॥

ઉષસિ ગુરુસમક્ષં લજ્જમાના મૃગાક્ષી રતિરુતમનુકર્તું રાજકીરે પ્રવૃત્તે ।
તિરયતિ શિશુલીલાનર્તનચ્છદ્મતાલ- પ્રચલવલયમાલાસ્ફાલકોલાહલેન ॥

ઉષસિ ગુરુસમીપે વાસસા સાવધાના પ્રિયલિખિતનખાઙ્કં ગોપયન્તી સમન્તાત્ ।
કિમિદમિતિ સખીભિઃ સાદરં પૃચ્છ્યમાના હરિ હરિ હરિણાક્ષી હ્રીસમુદ્રે નિમગ્ના ॥

ઉષસિ નિબિડયન્ત્યાઃ કુણ્ડલં કેલિપર્યા- વિલવિગલિતમન્તઃ કર્ણપાલિ પ્રિયાયાઃ ।
સરસહસિતતિર્યગ્ભઙ્ગુરાપાઙ્ગરીતિઃ સુકૃતિભિરવલીઢા લોચનાભ્યાં મુખશ્રીઃ ॥

ઉષસિ પરિવર્તયન્ત્યા મુક્તાદામોપવીતતાં નીતમ્ ।
પુરુષાયિતવૈદગ્ધ્યં વ્રીડાવતિ કૈર્ન કલિતં તે ॥