મહાસુભાષિતસંગ્રહ · શ્લોક 5606-5625

આસીન્ મે મનસિ હૃતા ન સા મૃતા સા યા દૃષ્ટેર્વ્રજતિ ન ગોચરં પ્રિયા મે ।
જ્યોત્સ્ના હિ સ્ફુટધવલાપિ કૌમુદીન્દોર્ અન્ધાનાં બહલતમોમલીમસૈવ ॥

આસીમા કાલિકા યસ્ય ક્ષુદ્રાઙ્ગં કુણ્ડલીકૃતમ્ ।
ક્ષુદ્રવજ્રકનામાનં પ્રાહ નાગાર્જુનો મુનિઃ ॥

આસીમાન્તાન્ નિવર્તન્તે સુહૃદઃ સહ બન્ધુભિઃ ।
સુકૃતં દુષ્કૃતં વાપિ ગચ્છન્તમનુગચ્છતિ ॥

આસીસ્ત્વં નિશિરાજરક્તહૃદયેતીર્ષ્યાલુના વજ્રિણા પ્રાતઃ શઙ્કિતયેવ દિવ્યપદવીં ગત્વાત્મનઃ શુદ્ધયે ।
ઔર્વોત્તાપિતવાર્ધિતાપકતલાદાદાય મુક્તો બહિઃ પ્રાચ્યાસૌ દિવિ તપ્તમાષક ઇવ પ્રદ્યોતનો દ્યોતતે ॥

આસુરં કુલમનાદરણીયં ચિત્તમેતદમલીકરણીયમ્ ।
રામધામ શરણીકરણીયં લીલયા ભવજલં તરણીયમ્ ॥

આસે ચેત્ સ્વગૃહે કુટુમ્બભરણં કર્તું ન શક્તોઽસ્મ્યહં સેવે ચેત્ સુખસાધનં મુનિવનં મુષ્ણન્તિ માં તસ્કરાઃ ।
શ્વભ્રે ચેત્ સ્વતનું ત્યજામિ નરકાદ્ ભીરાત્મહત્યાવશાન્ નો જાને કરવાણિ દૈવ કિમહં મર્તું ન વા જીવિતુમ્ ॥

આસેવ્યતે મુખં સર્વૈર્ વિદ્યાનાં યોષિતામપિ ।
હૃદયગ્રાહિણસ્ તાસાં દ્વિત્રાઃ સન્તિ ન સન્તિ વા ॥

આસ્કન્દન્ કથમપિ યોષિતો ન યાવદ્ ભીમત્યઃ પ્રિયકરધાર્યમાણહસ્તાઃ ।
ઔત્સુક્યાત્ ત્વરિતમમૂસ્તદમ્બુ તાવત્ સંક્રાન્તપ્રતિમતયા દધાવિવાન્તઃ ॥

આસ્કન્દિતો ભુજલતાચલિતાગ્રશાખામ્ આલિઙ્ગિતો યુવતિભિઃ કલિકાર્થિનીભિઃ ।
ધન્યોઽસિ ચમ્પકતરો કુસુમાનુરૂપૈર્ આસાં ઘનસ્તનફલૈઃ ફલિતોઽસિ યચ્ચ ॥

આસ્કન્ધાવધિ કણ્ઠકાણ્ડવિપિને દ્રાક્ ચન્દ્રહાસાસિના છેત્તું પ્રક્રમિતે મયૈવ તરસા ત્રુટ્યચ્છિરાસંતતૌ ।
અસ્મેરં ગલિતાશ્રુગદ્ગદપદં ભિન્નભ્રુવા યદ્યભૂદ્ વક્ત્રેષ્વેકમપિ સ્વયં સ ભગવાંસ્તન્મે પ્રમાણં શિવઃ ॥

આ સ્તન્યપાનાજ્ જનની પશૂનામ્ આ દારલાભાચ્ચ નરાધમાનામ્ ।
આગેહકર્માવધિ મધ્યમાનામ્ આ જીવિતાત્ તીર્થમિવોત્તમાનામ્ ॥

આસ્ત ભાવમધિગચ્છતોસ્ તયોઃ સંમદેષુ કરજક્ષતાર્પણા ।
ફાણિતેષુ મરિચાવચૂર્ણના સા સ્ફુટં કટુરપિ સ્પૃહાવહા ॥

આસ્તાં કિં બહુભિઃ પરોપકૃતયઃ સંસારસારં ફલં સિદ્ધં તત્ પ્રતિકૂલવર્તિનિ વિધૌ ન સ્તોકમપ્યત્ર નઃ ।
એતે સ્મઃ કિલ માનુષા વયમપિ વ્યર્થં વ્યપેતાયુષો યેષાં સ્વોદરપૂર્તિરેવ હિ કિમપ્યષ્ટૌ મહાસિદ્ધયઃ ॥

આસ્તાં ક્લમાપહરણં જલધેર્જલેન દૂરે દવાગ્નિ પરિદીપિતમાનસાનામ્ ।
એતાવદસ્તુ યદિ તોયકણૈર્ન જિહ્વા દન્દહ્યતે દ્વિગુણતાં ચ ન યાતિ તૃષ્ણા ॥

આસ્તાં ગાઢતરાનુશીલનવિધિઃ સંસ્પર્શનં દૂરતઃ સંશ્લેષે વિષયીકૃતોઽસિ ન મનાગક્ષ્ણોઃ પદં પ્રાપિતઃ ।
કિં બ્રૂમઃ સહકાર તાવકગુણાનન્યાદૃશૈર્દુર્લભાન્ સૌરભ્યેણ યદધ્વગાનપિ મુહુઃ પ્રીણાસિ દૂરાદપિ ॥

આસ્તાં ચક્ષુરિદં તિરોઽઞ્ચતિ કિયચ્ચેતોઽપિ યદ્વૈભવૈર્ નિષ્પ્રત્યાશમયં મુને જલનિધિર્ગણ્ડૂષિતઃ સત્તપઃ ।
એતેનૈવ વિરન્તુમર્હસિ ન તે ગણ્ડૂષપાનાધિકા કાચિત્ ખ્યાતિરતઃપરં પરમસૌ પર્જન્યનીવીવ્યયઃ ॥

આસ્તાં તત્ કરકાનિપાતકૃતભીમણ્ડૂકનિર્મજ્જન- ક્ષેમૈકક્ષમવારિ પલ્વલશતં સિન્ધું તમેવ સ્તુમઃ ।
કુપ્યચ્છક્રકરસ્વરુપ્રહરણક્ષુણ્ણાખિલાઙ્ગક્ષરત્- કીલાલેન ગિરિવ્રજેન શરણં યદ્ગર્ભવાસઃ કૃતઃ ॥

આસ્તાં તાવત્ કિમન્યેન દૌરાત્મ્યેનેહ યોષિતામ્ ।
વિધૃતં સ્વોદરેણાપિ ઘ્નન્તિ પુત્રમપિ સ્વકમ્ ॥

આસ્તાં તાવદકીર્તિર્મે ત્વયા તથ્યં તુ કથ્યતામ્ ।
ચિત્તં કથમિવાસીત્ તે હરિવંશીરવશ્રુતૌ ॥

આસ્તાં તાવદસીમપૌરુષજુષઃ સંમાનિતાત્યદ્ભુત- પ્રારમ્ભાભ્યધિકક્રિયસ્ય સ ખલુ પ્રાચ્યઃ પ્રચારો હરેઃ ।
જીર્ણસ્યાપિ ચ વિન્ધ્યકન્દરદરીદ્વારાવતારાક્ષમૈર્ અઙ્ગૈરઙ્ગભૃતો દલન્તિ દરતો ગન્ધેન ગન્ધદ્વિપાઃ ॥