મહાસુભાષિતસંગ્રહ · શ્લોક 5405-5425

આવૃણ્વાના ઝગિતિ જઘનં મદ્દુકૂલાઞ્ચલેન પ્રેઙ્ખત્ક્રીડાકુલિતકબરીબન્ધનવ્યગ્રપાણિઃ ।
અર્ધોચ્છ્વાસસ્ફુટનખપદાલંકૃતાભ્યાં સ્તનાભ્યાં દૃષ્ટા ધાર્ષ્ટ્યસ્મૃતિનતમુખી મોહનાન્તે મયા સા ॥

આવૃતં જ્ઞાનમેતેન જ્ઞાનિનો નિત્યવૈરિણા ।
કામરૂપેણ કૌન્તેય દુષ્પૂરેણાનલેન ચ ॥

આવૃતાન્યપિ નિરન્તરમુચ્ચૈર્ યોષિતામુરસિજદ્વિતયેન ।
રાગિણામિત ઇતો વિમૃશદ્ભિઃ પાણિભિર્જગૃહિરે હૃદયાનિ ॥

આવૃત્ય શ્રીમદેનાન્ધાન્ અન્યોન્યકૃતસંવિદઃ ।
સ્વૈરં હસન્તિ પાર્શ્વસ્થા બાલોન્મત્તપિશાચવત્ ॥

આવેદયિતુમસ્માકં કૃતજ્ઞત્વં પ્રભું પ્રતિ ।
પન્થાઃ શ્રેયસ્કરો નાન્યઃ તૂષ્ણીં તોષેણ વર્તનાત્ ॥

આવેદ્યતામવિદિતં કિમથાપ્યનુક્તં વક્તવ્યમાન્તરરુજોપશમાય નાલમ્ ।
ઇત્યુચ્યતે કિમપિ તચ્છ્રવણે નિધાતું માતઃ પ્રસીદ મલયધ્વજપાણ્ડ્યકન્યે ॥

આવેપતે ભ્રમતિ સર્પતિ મોહમેતિ કાન્તં વિલોકયતિ કૂજતિ દીનદીનમ્ ।
અસ્તં હિ ભાનુમતિ ગચ્છતિ ચક્રવાકી હા જીવિતેઽપિ મરણં પ્રિયવિપ્રયોગઃ ॥

આશઙ્ક્ય પ્રણતિં પટાન્તપિહિતૌ પાદૌ કરોત્યાદરાદ્ વ્યાજેનાગતમાવૃણોતિ હસિતં ન સ્પષ્ટમુદ્વીક્ષતે ।
મય્યાલાપવતિ પ્રતીપવચના સખ્યા સમં ભાષતે તન્વ્યાસ્ તિષ્ઠતુ નિર્ભરપ્રણયિતા માનોઽપિ રમ્યોદયઃ ॥

આશયા કૃતદાસો યઃ સ દાસઃ સર્વદેહિનામ્ ।
આશા દાસીકૃતા યેન તસ્ય દાસાયતે જગત્ ॥

આશાં કાલવતીં કુર્યાત્ કાલં વિઘ્નેન યોજયેત્ ।
વિગ્નં નિમિત્તતો બ્રૂયાન્ નિમિત્તં ચાપિ હેતુતઃ ॥

આશાઃ કાઞ્ચનપુષ્પકુડ્મલકુલચ્છન્ના ન કાઃ ક્ષ્માતલે સૌજન્યામૃતવર્ષિભિસ્ તિલકિતં સેવ્યૈર્ન કિં મણ્ડલમ્ ।
પન્થાનઃ સુચિરોપચારરુચિરૈર્વ્યાપ્તા ન કૈઃ સંસ્તુતૈસ્ તેષામત્ર વસન્તિ નિહ્નુતગુણાઃ કાલેન યે મોહિતાઃ ॥

આશાઃ ખર્વય ગર્વયાતિમુખરાનુન્નાદિનો બર્હિણઃ સર્વાંસ્ત્રાસય ગર્જિતૈઃ કલગિરો હંસાન્ સમુત્સારય ।
દ્રાગાસ્કન્દય મિત્રમણ્ડલમલં સદ્વર્ત્મ સંદૂષય શ્રીમન્નબ્દ નયત્યયં ન પવનો યાવદ્ દશાં કામપિ ॥

આશાઃ પૂરયતિ શ્રિયં વિતરતિ ત્રૈલોક્યતાપં હરત્ય્ અવ્યાજામૃતસેચનં વિદધતિ પ્રીતિં પરાં તન્વતિ ।
એતેન પ્રસભં ચિરં જલમુચા કાલેન દૂરીકૃતે પૂર્ણે રાજનિ જાતમુલ્બણતમસ્તોમાવશેષં જગત્ ॥

આશાઃ પ્રકાશયતિ યસ્તિમિરાણિ ભઙ્ક્ત્વા બોધં દૃશાં દિશતિ ભૂરિગુણેષ્વભીષ્ટઃ ।
ખેદાય યસ્ય ન પરોપકૃતિષ્વટાટ્યા ધીમાન્ નમસ્યતિ ન કસ્તમિનં પ્રશસ્યમ્ ॥

આશાઃ પ્રસાદયતુ પુષ્યતુ વા ચકોરાન્ કામં તનોતુ કુમુદેષુ મુદં સુધાંશુઃ ।
એકઃ સ એવ પરમુત્કટરાહુદન્ત- પત્રપ્રવેશસમદુઃખસુખઃ કુરઙ્ગઃ ॥

આશાઃ સંતમસોપલેપમલિનાઃ પીયૂષગૌરૈઃ કરૈર્ આલિમ્પન્નયમુદ્ગતૈર્દિવમિમાં કર્પૂરપૂરં સૃજન્ ।
ચન્દ્રશ્ચન્દ્રશિલૈકકુટ્ટિમમયં ક્ષોણીતલં કલ્પયન્ પશ્યોદ્ગચ્છતિ પાકપાણ્ડુરશરચ્છાયોપમેયચ્છવિઃ ॥

આશાખનિરગાધેયં દુષ્પૂરા કેન પૂર્યતે ।
યા મહદ્ભિરપિ ક્ષિપ્તૈઃ પૂરકૈરેવ ખન્યતે ॥

આશાખનિરગાધેયમ્ અધઃકૃતજગત્ત્રયા ।
ઉદ્ધૃત્યોદ્ધૃત્ય તત્રસ્થાન્ અહો સદ્ભિઃ સમીકૃતા ॥

આશાગર્તઃ પ્રતિપ્રાણિ યસ્મિન્ વિશ્વમણૂપમમ્ ।
કસ્ય કિં કિયદાયાતિ વૃથા યા વિષયૈષિતા ॥

આશાગૃહીતા વિકલા ભવન્તિ હતત્રપા ન્યસ્તગુણાભિમાનાઃ ।
ભ્રામ્યન્તિ મત્તા ઇવ નષ્ટસંજ્ઞા દેહીતિવાચસ્ તરલસ્વભાવાઃ ॥