મહાસુભાષિતસંગ્રહ · શ્લોક 5325-5344

આલિઙ્ગ્ય પૂર્વામનુગૃહ્ય યામ્યાં સૌમ્યાં સમાલોક્ય સહસ્રભાનુઃ ।
સમ્ધ્યાશ્રિતોઽપ્યાપ નિપાતમબ્ધૌ તદ્ વારુણીસઙ્ગફલં ચકાસ્તિ ॥

આલિઙ્ગ્ય મધુરહુંકૃતિમ્ અલસોન્મિષદીક્ષણાં રહઃ કાન્તામ્ ।
યદ્ બોધયન્તિ સુપ્તાં જન્મનિ યૂનાં તદેવ ફલમ્ ॥

આલિઙ્ગ્ય મન્દિરે રમ્યે સદાનન્દવિધાયિનિ ।
કાન્તા કાન્તં કુરઙ્ગાક્ષી કુમ્ભિકુમ્ભપયોધરા ॥

આલિ પાલિલલિતૌ તવ ભાતઃ કર્ણિકારસખકર્ણિ કપોલૌ ।
પદ્મજેન રતિપઞ્ચબાણયોર્ દર્પણાવિવ સુવર્ણનિર્મિતૌ ॥

આલિ બાલિશતયા બલિરસ્મૈ દીયતાં બલિભુજે ન કદાપિ ।
કેવલં હિ કલકણ્ઠશિશૂનામ્ એષ એવ કુશલેષુ નિદાનમ્ ॥

આલિર્દિવ્યૌષધી પ્રોક્તા સૂક્ષ્મકણ્ટકસંવૃતા ।
વિમુચ્યતે વિષૈઃ પ્રાણી પીત્વા તોયેન તજ્જટામ્ ॥

આલીચાલિતપદ્મિનીદલચલત્સર્વાઙ્ગમઙ્ગીકૃત્ અ- સ્વાઙ્ગાલિઙ્ગનમર્મરીકૃતનવામ્ભોજાલિશય્ યા ચિરાત્ ।
ચૈતન્યં કથમપ્યુપેત્ય શનકૈરુન્મીલ્ય નેત્રાઞ્ચલં બાલા કેવલમેવ શૂન્યહૃદયા શૂન્યં જગત્ પશ્યતિ ॥

આલીભિઃ શપથૈરનેકકપટૈઃ કુઞ્જોદરં નીતયા શૂન્યં તચ્ ચ નિરીક્ષ્ય વિક્ષુભિતયા ન પ્રસ્થિતં ન સ્થિતમ્ ।
ન્યસ્તાઃ કિંતુ નવોઢનીરજદૃશા કુઞ્જોપકણ્ઠે રુષા તાદૃગ્ભૃઙ્ગકદમ્બડમ્બરચમત્કારસ્પૃશો દૃષ્ટયઃ ॥

આલીભિઃ સહ ભાષિતં કિમપિ તદ્વર્ત્માપિ સંવીક્ષિતં પઞ્ચેષુઃ કુસુમૈરપૂજિ કથમપ્યાધાય ચિત્તે મનાક્ ।
તેનાપિ પ્રિય ચેત્ તથા મયિ કૃપાકાર્પણ્યમાલમ્બસે પ્રાણેશ પ્રબલં તદત્ર નિખિલં તત્પ્રાતિકૂલ્યં વિધેઃ ॥

આલીષુ કેલીરભસેન બાલા મુહુર્મમાલાપમુપાલપન્તી ।
આરાદુપાકર્ણ્ય ગિરં મદીયાં સૌદામિનીયાં સુષમામયાસીત્ ॥

આલેખ્યં ગગને લિખામિ બિસિનીસૂત્રૈર્વયામ્યમ્બરં સ્વપ્નાલોકિતમાનયામિ કનકં ગ્રથ્નામિ વપ્રં હિમૈઃ ।
ઇત્યાદ્યુક્તમપિ સ્ફુટં જડમતિર્જાનાતિ સત્યં નૃપો યસ્તાદૃક્ત્રપયા ન વક્તિ સ ગતપ્રૌઢિઃ પરં વઞ્ચ્યતે ॥

આલેખ્યં નિજમુલ્લિલેખ વિજને સોલ્લેખયા રેખયા સંકલ્પાનકરોદ્ વિકલ્પબહુલાકલ્પાનનલ્પાનપિ ।
અદ્રાક્ષીદપરપ્રજાપતિમતં ચક્રે ચ તીવ્રં વ્રતં ત્વન્નિર્માણવિધૌ કિયન્ન વિદધે બદ્ધાવધાનો વિધિઃ ॥

આલોક એવ વિમુખી ક્વચિદપિ દિવસે ન દક્ષિણા ભવસિ ।
છાયેવ તદપિ તાપં ત્વમેવ મે હરસિ માનવતિ ॥

આલોકત્રસ્તનારીકૃતસભયમહાનાદધાવજ્જનૌઘ- વ્યાપ્તદ્વારપ્રદેશપ્રચુરકલકલાકર્ણનસ્તબ્ધચક્ષુઃ ।
કાષ્ઠં દણ્ડં ગૃહાણેત્યતિમુખરમુખૈસ્ તાડિતો લોષ્ટઘાતૈર્ ભીતઃ સર્પો ગૃહસ્યાનધિગતવિવરઃ કોણતઃ કોણમેતિ ॥

આલોકદાનાચ્ ચક્ષુષ્માન્ પ્રભાયુક્તો ભવેન્ નરઃ ।
તાન્ દત્ત્વા નોપહિંસેત ન હરેન્ નોપનાશયેત્ ॥

દીપહર્તા ભવેદન્ધસ્ તમોગતિરસુપ્રભઃ ।
દીપપ્રદઃ સ્વર્ગલોકે દીપમાલી વિરાજતે ॥

આલોકમાર્ગં સહસા વ્રજન્ત્યા કયાચિદુદ્વેષ્ટનવાન્તમાલ્યઃ ।
બદ્ધું ન સંભાવિત એવ તાવત્ કરેણ રુદ્ધોઽપિ ચ કેશપાશઃ ॥

આલોકયતિ પન્થાનં દાસ્યતીત્યાગતઃ કિલ ।
રચયત્યાદરાદ્ વેણીં યદિ નાન્યૈર્વશીકૃતા ॥

આલોકયતિ પયોધરમ્ ઉપમન્દિરમભિનવામ્બુભરનીલમ્ ।
દયિતારચિતચિતાનલ- ધૂમોદ્ગમશઙ્કયા પથિકઃ ॥

આલોકયેદ્ બુદ્ધિગુણોપપન્નૈશ્ ચરૈશ્ચ દૂતૈશ્ચ પરપ્રચારમ્ ।
એતૈર્વિયુક્તો ભવતિ ક્ષિતીન્દ્રો જનૈરનેત્રૈશ્ચ સમાનધર્મા ॥