મહાસુભાષિતસંગ્રહ · શ્લોક 4865-4884

આનીયતે શરીરેણ ક્ષીણોઽપિ વિભવઃ પુનઃ ।
વિભવઃ પુનરાનેતું શરીરં ક્ષીણમક્ષમઃ ॥

આનીલચૂચુકશિલીમુખમુદ્ગતૈક- રોમાવલીવિપુલનાલમિદં પ્રિયાયાઃ ।
ઉત્તુઙ્ગસંગતપયોધરપદ્મયુગ્મં નાભેરધઃ કથયતીવ મહાનિધાનમ્ ॥

આનીલાં કરપલ્લવૈરપનયન્નચ્છાં તમઃકઞ્ચુકીમ્ આશાં સંપ્રતિ વાસવીમનુસરન્નક્ષીણરાગઃ શશી ।
અસ્યાશ્ચ સ્તનસઙ્ગિનીમિવ વહન્નઙ્ગેન કસ્તૂરિકામ્ આલિઙ્ગત્યયમાદરેણ રજનીમર્ધોન્મિષત્તારકામ્ ॥

આનુકૂલ્યેન દૈવસ્ય વર્તિતવ્યં સુખાર્થિના ।
દુસ્તરં પ્રતિકૂલં હિ પ્રતિસ્રોત ઇવામ્ભસઃ ॥

આનૃશંસ્યં ક્ષમા સત્યમ્ અહિંસા દમ આર્જવમ્ ।
પ્રીતિઃ પ્રસાદો માધુર્યં માર્દવં ચ યમા દશ ॥

આનૃશંસ્યં પરો ધર્મઃ ક્ષમા ચ પરમં બલમ્ ।
આત્મજ્ઞાનં પરં જ્ઞાનં ન સત્યાદ્ વિદ્યતે પરમ્ ॥

આનૃશંસ્યં પરો ધર્મઃ સર્વપ્રાણભૃતાં મતઃ ।
તસ્માદ્ રાજાનૃશંસ્યેન પાલયેત્ કૃપણં જનમ્ ॥

આનૃશંસ્યમનુક્રોશઃ શ્રુતં શીલં દમઃ શમઃ ।
રાઘવં શોભયન્ત્યેતે ષડ્ગુણાઃ પુરુષોત્તમમ્ ॥

આનેતું ન ગતા કિમુ પ્રિયસખી ભીતો ભુજઙ્ગાત્ કિમુ ક્રુદ્ધો વા પ્રતિષેધવાચિ કિમસૌ પ્રાણેશ્વરો વર્તતે ।
ઇત્થં કર્ણસુવર્ણકેતકરજઃપાતોપઘાતચ્છલાદ્ અક્ષ્ણોઃ કાપિ નવોઢનીરજમુખી બાષ્પોદકં મુઞ્ચતિ ॥

આન્તરમપિ બહિરિવ હિ વ્યઞ્જયિતું રસમશેષતઃ સતતમ્ ।
અસતી સત્કવિસૂક્તિઃ કાચઘટીતિ ત્રયં વેદ ॥

આન્તરે ચૈવ બાહ્યે ચ રાજા યશ્ચૈવ સર્વદા ।
આદિષ્ટો નૈવ કમ્પેત સ રાજવસતિં વસેત્ ॥

આન્તરેભ્યઃ પરાન્ રક્ષેત્ પરેભ્યઃ પુનરાન્તરાન્ ।
પરાન્ પરેભ્યઃ સ્વાન્ સ્વેભ્યઃ સર્વાન્ રક્ષેત સર્વદા ॥

આન્દોલનૈર્મદ્વપુષા લગન્તીં સ્મરામિ વેણીં પુરુષાયિતાયાઃ ।
સમાચરન્ત્યાઃ સુરતોપદેશં તસ્યાઃ કશાવલ્લિમિવ પ્રિયાયાઃ ॥

આન્દોલયન્ ગિરિનિકુઞ્જકરઞ્જરાજીર્ નાજીગણઃ કલભ કંચન પૌરુષેણ ।
ઈષત્સમુન્મિષિતલોચનકોણ એવ કણ્ઠીરવે કિમિતિ જીવિતમુજ્જહાસિ ॥

આન્દોલયન્તી વપુરાયતાક્ષી હિન્દોલિકાયાં કનકાઙ્ગયષ્ટિઃ ।
અતર્કિ લોકૈર્ગગનાન્તરસ્થા સ્વર્દેવતેવાખિલરૂપરમ્યા ॥

આન્દોલયસ્યવિરતં ગગનાર્કમઙ્કે તારાગણં ચ શશિનં ચ તથેતરાણિ ।
તેજાંસિ ભાસુરતડિત્પ્રભૃતીનિ સાધો ચિત્રં તથાપિ ન જહાસિ યદાન્ધ્યમન્તઃ ॥

આન્દોલલોલકેશીં ચલકાઞ્ચીકિઙ્કિણીગણક્વણિતામ્ ।
સ્મરસિ પુરુષાયિતાં તાં સ્મરચામરચિહ્નયષ્ટિમિવ ॥

આન્ધ્રત્વમાન્ધ્રભાષા ચ પ્રાભાકરપરિશ્રમઃ ।
તત્રાપિ યાજુષી શાખા નાલ્પસ્ય તપસઃ ફલમ્ ॥

આન્ધ્રી પ્રીતિનિબન્ધનૈકનિપુણા લાટી વિદગ્ધપ્રિયા કર્ણાટી સુરતોપચારચતુરા નારી શુચિશ્ચોલિકા ।
આભીરી પુરુષાયિતપ્રિયરતા લજ્જાન્વિતા ગૂર્જરી કાશ્મીરી રતિલાલસા નિધુવને ધૃષ્ટા મહારાષ્ટ્રકી ॥

આન્વીક્ષિકીં ત્રયીં વાર્તાં દણ્ડનીતિં ચ પાર્થિવઃ ।
તદ્વિદ્યૈસ્તત્ક્રિયોપેતૈશ્ ચિન્તયેદ્ વિનયાન્વિતઃ ॥