મહાસુભાષિતસંગ્રહ · શ્લોક 4685-4704

આદરેણ યથા સ્તૌતિ ધનવન્તં ધનેચ્છયા ।
તથા ચેદ્ વિશ્વકર્તારં કો ન મુચ્યેત બન્ધનાત્ ॥

આદરેણાર્જવેનૈવ શૌર્યાદ્ દાનેન વિદ્યયા ।
પ્રત્યુત્થાનાભિગમનૈર્ આનન્દસ્મિતભાષણૈઃ ।
ઉપકારૈઃ સ્વાશયેન વશીકુર્યાજ્જગત્ સદા ॥

આ દર્શનાત્ પ્રવિષ્ટા સા મે સુરલોકસુન્દરી હૃદયમ્ ।
બાણેન મકરકેતોઃ કૃતમાર્ગમવન્ધ્યપાતેન ॥

આદર્શાય શશાઙ્કમણ્ડલમિદં હર્મ્યાય હેમાચલં દીપાય દ્યુમણિં મહીમિવ કથં નો ભિક્ષવે દત્તવાન્ ।
દિત્સાપલ્લવિતપ્રમોદસલિલવ્યાકીર્ણનેત્રામ્બુજો જાનીમો ભૃગુનન્દનસ્તદખિલં ન પ્રાયશો દૃષ્ટવાન્ ॥

આદાતવ્યં ન દાતવ્યં પ્રિયં બ્રૂયન્ નિરર્થકમ્ ।
આશાં કાલવતીં કુર્યાત્ કાલં વિઘ્નેન યોજયેત્ ॥

આદાતું સકૃદીક્ષિતેઽપિ કુસુમે હસ્તાગ્રમાલોહિતં લાક્ષારઞ્જનવાર્તયાપિ સહસા રક્તં તલં પાદયોઃ ।
અઙ્ગાનામનુલેપનસ્મરણમપ્યત્યન્તખેદાવહં હન્તાધીરદૃશઃ કિમન્યદલકામોદોઽપિ ભારાયતે ॥

આદાનં ચૈવ તૂણીરાત્ સંધાનં કર્ષણં તથા ।
ક્ષેપણં ચ ત્વરાયુક્તો બાણસ્ય કુરુતે તુ યઃ ।
નિત્યાભ્યાસવશાત્ તસ્ય શીઘ્રસંધાનતા ભવેત્ ॥

આદાનપાનલેપૈઃ કાશ્ચિદ્ ગરલોપતાપહારિણ્યઃ ।
સદસિ સ્થિતૈવ સિદ્ધૌ- ષધિવલ્લી કાપિ જીવયતિ ॥

આદાનમપ્રિયકરં દાનં ચ પ્રિયકારકમ્ ।
અભીપ્સિતાનામર્થાનાં કાલે યુક્તં પ્રશસ્યતે ॥

આદાય કરમાઢ્યેભ્યઃ કીકટેષ્વપિ વર્ષસિ ।
પ્રપીય વારિ સિન્ધુભ્યઃ સ્થલેષ્વિવ ઘનાઘનઃ ॥

આદાય ચાપમચલં કૃત્વાહીનં ગુણં વિષમદૃષ્ટિઃ ।
યશ્ચિત્રમચ્યુતશરો લક્ષ્યમભાઙ્ક્ષીન્નમસ્તસ્મૈ ॥

આદાય દણ્ડં સકલાસુ દિક્ષુ યોઽયં પરિભ્રામ્યતિ ભાનુભિક્ષુઃ ।
અબ્ધૌ નિમજ્જન્નિવ તાપસોઽયં સંધ્યાભ્રકાષાયમધત્ત સાયમ્ ॥

આદાય ધનમનલ્પં દદાનયા સુભગ તાવકં વાસઃ ।
મુગ્ધા રજકગૃહિણ્યા કૃતા દિનૈઃ કતિપયૈર્નિઃસ્વા ॥

આદાય પત્રં ત્વરિતં યદિ શ્વા દૂર્વાં નવાં વા નવગોમયં વા ।
પ્રયાતિ યાતુઃ પરતસ્ તદાનીં રાજપ્રસાદં નિયતં બ્રવીતિ ॥

આદાય પ્રતિપક્ષકીર્તિનિવહાન્ બ્રહ્માણ્ડમૂષાન્તરે નિર્વિઘ્નં ધમતા નિતાન્તમુદિતૈઃ સ્વૈરેવ તેજોઽગ્નિભિઃ ।
તત્તાદૃક્પુટપાકશોધિતમિવ પ્રાપ્તં ગુણોત્કર્ષિણાં પિણ્ડસ્થં ચ મહત્તરં ચ ભવતા નિઃક્ષારતારં યશઃ ॥

આદાય માંસમખિલં સ્તનવર્જમઙ્ગાન્ માં મુઞ્ચ વાગુરિક યામિ કુરુ પ્રસાદમ્ ।
સીદન્તિ શષ્પકવલગ્રહણાનભિજ્ઞા મન્માર્ગવીક્ષણપરાઃ શિશવો મદીયાઃ ॥

આદાય વકુલગન્ધાન્ અન્ધીકુર્વન્ પદે પદે ભ્રમરાન્ ।
અયમેતિ મન્દમન્દં કાવેરીવારિપાવનઃ પવનઃ ॥

આદાય વારિ પરિતઃ સરિતાં મુખેભ્યઃ કિં તાવદર્જિતમનેન દુરર્ણવેન ।
ક્ષારીકૃતં ચ વડવાદહને હુતં ચ પાતાલકુક્ષિકુહરે વિનિવેશિતં ચ ॥

આદાય વારિ યત એવ જહાતિ ભૂયસ્ તત્રૈવ યઃ સ જલદઃ પ્રથમો જડાનામ્ ।
વાન્તં પ્રતીપ્સતિ તદેવ તદેવ યસ્તુ સ્રોતઃપતિઃ સ નિરપત્રપસાર્થવાહઃ ॥

આદાય વિપ્રસ્વમપિ નાશયેદ્ રાજ્યઘાતિનઃ ।
આદાયાસ્થિ દધીચેસ્તુ શક્રો દૈત્યાન્ જઘાન હિ ॥