મહાસુભાષિતસંગ્રહ · શ્લોક 4243-4262

આકર્ણ્યામ્રફલસ્તુતિં જલમભૂત્ તન્નારિકેલાન્તરં પ્રાયઃ કણ્ટકિતં તથૈવ પનસં જાતં દ્વિધોર્વારુકમ્ ।
આસ્તેઽધોમુખમેવ કાદલફલં દ્રાક્ષાફલં ક્ષુદ્રતાં શ્યામત્વં બત જામ્બવં ગતમહો માત્સર્યદોષાદિહ ॥

આકર્ષતેવોર્ધ્વમતિક્રશીયાન્ અત્યુન્નતત્વાત્ કુચમણ્ડલેન ।
નનામ મધ્યોઽતિગુરુત્વભાજા નિતાન્તમાક્રાન્ત ઇવાઙ્ગનાનામ્ ॥

આકર્ષન્તિ ન કેષામ્ અન્તઃકરણં પ્રવાલશાલિન્યઃ ।
લલના ઇવાત્ર લતિકાઃ કુસુમેષુ શિલીમુખૈર્નિચિતાઃ ॥

આકર્ષન્નિવ ગાં વમન્નિવ ખુરાન્ પશ્ચાર્ધમુજ્ઝન્નિવ સ્વીકુર્વન્નિવ ખં પિબન્નિવ દિશશ્છાયામમર્ષન્નિવ ।
સાઙ્ગારપ્રકરાં સ્પૃશન્નિવ ધરાં વાતં સમશ્નન્નિવ શ્રીમન્નાથ સ વાજિરાટ્ તવ કથં માદૃગ્ગિરાં ગોચરઃ ॥

આકર્ષેત્ કૈશિકવ્યાયે ન શિખાં ચાલયેત્ તતઃ ।
પૂર્વાપરૌ સમૌ કાર્યૌ સમાંસૌ નિશ્ચલૌ કરૌ ॥

આકલિતોરુક્રમપદ- પદ્માલંકૃત્યનલ્પપુણ્યભવમ્ ।
નિજગુણગુરુસ્વરૂપં કાવ્યઞ્જયતિ પ્રસન્નમતિમધુરમ્ ॥

આકલ્પં મુરજિન્મુખેન્દુમધુરોન્મીલન્મરુન્માધુરી- ધીરોદાત્તમનોહરઃ સુખયતુ ત્વાં પાઞ્ચજન્યધ્વનિઃ ।
લીલાલઙ્ઘિતમેઘનાદવિભવો યઃ કુમ્ભકર્ણવ્યથા- દાયી દાનવદન્તિનાં દશમુખં દિક્ચક્રમાક્રામતિ ॥

આકલ્પં યદિ વર્ષસિ પ્રતિદિનં ધારાસહસ્રૈસ્તથાપ્ય્- અમ્ભોધૌ કલયત્યગાધજઠરે કસ્તાવકીનં શ્રમમ્ ।
અમ્ભોદ ક્ષણમાત્રમુજ્ઝસિ પયઃ પૃષ્ઠે યદિ ક્ષ્માભૃતાં તત્ કિં ન પ્રસરન્તિ નિર્ઝરસરિદ્વ્યાજેન તે કીર્તયઃ ॥

આકાલ્પ્ય તલ્પં શશિકાન્તિકલ્પમ્ ઉદ્ગ્રથ્ય વીટીઃ સુરપુષ્પગર્ભાઃ ।
દ્વારે દૃગન્તાન્ પરિકલ્પયન્તી મનો મનોજસ્ય ચમચ્ચકાર ॥

આ કલ્યાદ્ આ નિશીથાચ્ચ કુક્ષ્યર્થં વ્યાપ્રિયામહે ।
ન ચ નિર્વૃણુમો જાતુ શાન્તાસ્તુ સુખમાસતે ॥

આકસ્મિકસ્મિતમુખીષુ સખીષુ વિજ્ઞા વિજ્ઞાસ્વપિ પ્રણયનિહ્નવમાચરન્તી ।
તત્રૈવ રઙ્કુનયના નયનારવિન્દમ્ અસ્પન્દમાહિતવતી દયિતે ગતેઽપિ ॥

આકાઙ્ક્ષિણં ક્ષ્માપતિમન્દિરાણિ પ્રવિશ્ય પાતાલસહોદરાણિ ।
અધોગતેર્નાન્યદુપાર્જયન્તિ ફલં ભુજઙ્ગા ઇવ વાયુભક્ષ્યાઃ ॥

આકાઙ્ક્ષોચ્ચપદેઽહમાત્મકમતિઃ કાર્યે મનોધારણા ઇત્યેવંવિધભાવજાતમુચિતં ધર્તું ન ચિત્તાન્તરે ।
વૈષમ્યસ્ય નિવારણાય મૃગયેસ્તત્કારણં નાપરે સ્વાત્મન્યેવ ગવેષયેત્યતિતરાં શ્રેયસ્કરં તે સદા ॥

આકારં વિનિગૂહતાં રિપુબલં જેતું સમુત્તિષ્ઠતાં તન્ત્રં ચિન્તયતાં કૃતાકૃતશતવ્યાપારશાખાકુલમ્ ।
મન્ત્રિપ્રોક્તનિષેવિણાં ક્ષિતિભુજામાશઙ્કિનાં સર્વતો દુઃખામ્ભોનિધિવર્તિનાં સુખલવઃ કાન્તાસમાલિઙ્ગનમ્ ॥

આકારઃ કમનીયતાકુલગૃહં લીલાલસા સા ગતિઃ સંપર્કઃ કમલાકરૈઃ કલતયા લોકોત્તરં કૂજિતમ્ ।
યસ્યેયં ગુણસંપદસ્તિ મહતી તસ્યાપિ ભવ્યસ્ય તે સંરબ્ધત્વમસદ્ગુમદ્ગુકલહે નાહં સહે હંસ હે ॥

આકારઃ સ મનોહરઃ સ મહિમા તદ્વૈભવં તદ્વયઃ સા કાન્તિઃ સ ચ વિશ્વવિસ્મયકરઃ સૌભાગ્યભાગ્યોદયઃ ।
એકૈકસ્ય વિશેષવર્ણનવિધૌ તસ્યાઃ સ એવ ક્ષમો યસ્યાસ્મિન્નુરગપ્રભોરિવ ભવેજ્જિહ્વાસહસ્રદ્વયમ્ ॥

આકારણાય માન્ત્રિકમ્ આગતદૂતસ્ય વચનમાદાય ।
કૃત્વા પ્રમાણમાદાવ્ અભિમન્ત્ર્ય ચ તત્ર મન્ત્રણ ॥

આકારદારુણોઽયં ભયમસ્માદિત્યનિશ્ચયોઽયમપિ ।
ભવતિ મહાભૈરવમપિ શિવસ્ય રૂપં શિવાયૈવ ॥

આકારપરિવૃત્તિસ્તુ બુદ્ધેઃ પરિભવઃ પુનઃ ।
આશાહાનિરિવાર્થિત્વં પરાસુત્વમિવાપરમ્ ॥

આકારમાત્રવિજ્ઞાનસંપાદિતમનોરથાઃ ।
ધન્યાસ્તે યે ન શૃણ્વન્તિ દીનાઃ ક્વાપ્યર્થિનાં ગિરઃ ॥