મહાસુભાષિતસંગ્રહ · શ્લોક 3723-3742

અસહ્યાન્યપિ સોઢાનિ ગદિતાન્યપ્રિયાણ્યપિ ।
સ્થિતઃ પરગૃહદ્વારિ તૃષ્ણે નિવૃત્તિમાપ્નુહિ ॥

અસાધના વિત્તહીના બુદ્ધિમન્તઃ સુહૃન્મતાઃ ।
સાધયન્ત્યાશુ કાર્યાણિ કાકકૂર્મમૃગાખુવત્ ॥

અસાધુઃ સાધુર્વા ભવતિ ખલુ જાત્યૈવ પુરુષો ન સઙ્ગાદ્ દૌર્જન્યં ન હિ સુજનતા કસ્યચિદપિ ।
પ્રરૂઢે સંસર્ગે મણિભુજગયોર્જન્મજનિતે મણિર્નાહેર્દોષાન્ સ્પૃશતિ ન તુ સર્પો મણિગુણાન્ ॥

અસાધુ પરિગન્તવ્યં ન ચ સાધુ ચ સંવલમ્ ।
સંવલં કુરુ યત્નેન મરણં ધ્રુવનિશ્ચયમ્ ॥

અસાધ્યં નારભેત્ પ્રાજ્ઞઃ અકાર્યં નૈવ કારયેત્ ।
અનૃતં નૈવ જલ્પેત અભક્ષ્યં નૈવ ભક્ષયેત્ ॥

અસાધ્યં શત્રુમાલોક્ય દાયાદં તસ્ય ભેદયેત્ ।
રાજ્યકામં સમર્થં ચ યથા રામો વિભીષણમ્ ॥

અસાધ્યં સાધુમન્ત્રાણાં તીવ્રં વાગ્વિષમુત્સૃજત્ ।
દ્વિજિહ્વં વદનં ધત્તે દુષ્ટો દુર્જનપન્નગઃ ॥

અસાધ્યમન્યથા દોષં પરિચ્છિદ્ય શરીરિણામ્ ।
યથા વૈદ્યસ્તથા રાજા શસ્ત્રપાણિર્વિષહ્યતિ ॥

અસાધ્યાયાઃ સુખં સિદ્ધિઃ સિદ્ધાયાશ્ચાનુરઞ્જનમ્ ।
રક્તાયાશ્ચ રતિઃ સમ્યક્ કામશાસ્ત્રપ્રયોજનમ્ ॥

અસામાન્યોલ્લેખં વિરસહતહેવાકિનમલં વિધિં વન્દે નિન્દામ્યુત બત ન જાને કિમુચિતમ્ ।
અનર્ઘં નિર્માણં લલિતતનુ યસ્યેહ ભવતી ન યઃ કૃત્વાપિ ત્વાં પરિહરતિ સર્ગવ્યસનિતામ્ ॥

અસારં સંસારં પરિમુષિતરત્નં ત્રિભુવનં નિરાલોકં લોકં મરણશરણં બાન્ધવજનમ્ ।
અદર્પં કન્દર્પં જનનયનનિર્માણમફલં જગજ્જીર્ણારણ્યં કથમસિ વિધાતું વ્યવસિતઃ ॥

અસારઃ સંસારઃ સરસકદલીસારસદૃશો લસદ્વિદ્યુલ્લેખાચકિતચપલં જીવિતમિદમ્ ।
યદેતત્ તારુણ્યં નગગતનદીવેગસદૃશમ્ અહો ધાર્ષ્ટ્યં પુંસાં તદપિ વિષયાન્ ધાવતિ મનઃ ॥

અસારઃ સર્વતઃ સારો વાચા સારસમુચ્ચયઃ ।
વાચા સા ચલિતા યેન સુકૃતં તેન હારિતમ્ ॥

અસારભૂતે સંસારે સારં સારઙ્ગલોચના ।
તદર્થં ધનમિચ્છન્તિ તત્ત્યાગે ચ ધનેન કિમ્ ॥

અસારભૂતે સંસારે સારભૂતા નિતમ્બિની ।
ઇતિ સંચિન્ત્ય વૈ શંભુર્ અર્ધાઙ્ગે કામિનીં દધૌ ॥

અસારાઃ સન્ત્યેતે વિરતિવિરસા વાથ વિષયા જુગુપ્સન્તાં યદ્ વા નનુ સકલદોષાસ્પદમિતિ ।
તથાપ્યન્તસ્તત્ત્વપ્રણિહિતધિયામપ્યતિબલસ્ તદીયોઽનાખ્યેયઃ સ્ફુરતિ હૃદયે કોઽપિ મહિમા ॥

અસારે ખલુ સંસારે સારં શ્વશુરમન્દિરમ્ ।
ક્ષીરાબ્ધૌ ચ હરિઃ શેતે શિવઃ શેતે હિમાલયે ॥

અસારે ખલુ સંસારે સારં શ્વશુરમન્દિરમ્ ।
હરો હિમાલયે શેતે વિષ્ણુઃ શેતે મહોદધૌ ॥

અસારે ખલુ સંસારે સારમેતચ્ચતુષ્ટયમ્ ।
કાશ્યાં વાસઃ સતાં સઙ્ગો ગઙ્ગામ્ભઃ શંભુસેવનમ્ ॥

અસારે ખલુ સંસારે સુખભ્રાન્તિઃ શરીરિણામ્ ।
લાલાપાનમિવાઙ્ગુષ્ઠે બાલાનાં સ્તન્યવિભ્રમઃ ॥