મહાસુભાષિતસંગ્રહ · શ્લોક 3683-3702

અસત્યશીલા વિકૃતા દુર્ગ્રાહ્યહૃદયાઃ સદા ।
યુવત્યઃ પાપસંકલ્પાઃ ક્ષણમાત્રાદ્ વિરાગિણઃ ॥

અસત્યસંધસ્ય સતશ્ ચલસ્યાસ્થિરચેતસઃ ।
નૈવ દેવા ન પિતરઃ પ્રતીચ્છન્તીતિ નઃ શ્રુતમ્ ॥

અસત્યસ્ય વણિગ્મૂલં શાખાસ્તસ્ય વરાઙ્ગનાઃ ।
કાયસ્થાઃ પત્રપુષ્પાણિ ફલાનિ દ્યૂતકારિણઃ ॥

અસત્યાઃ સત્યસંકાશાઃ સત્યાશ્ચાસત્યરૂપિણઃ ।
દૃશ્યન્તે વિવિધા ભાવાસ્ તસ્માદ્ યુક્તં પરીક્ષણમ્ ॥

અસત્યા ચ હતા વાણી તથા પૈશુન્યવાદિની ।
સંદિગ્ધોઽપિ હતો મન્ત્રો વ્યગ્રચિત્તો હતો જપઃ ॥

અસત્યાત્મગુણે શસ્ત્રં હસ્તાભ્યાં વિનિવાર્યતે ।
એષાપિ ન ગતિઃ ક્ષેમ્યા ન ચાન્યા વિદ્યતે ક્વચિત્ ॥

અસત્યેનૈવ જીવન્તિ વેશ્યાઃ સત્યવિવર્જિતાઃ ।
એતાઃ સત્યેન નશ્યન્તિ મદ્યેનેવ કુલાઙ્ગનાઃ ॥

અસત્સંપર્કદોષેણ અધસ્તાદ્ યાન્તિ સાધવઃ ।
માર્ગસ્તિમિરદોષેણ સમોઽપિ વિષમાયતે ॥

અસત્સઙ્ગાદ્ ગુણજ્ઞોઽપિ વિષયાસક્તમાનસઃ ।
અકસ્માત્ પ્રલયં યાતિ ગીતરક્તો યથા મૃગઃ ॥

અસદૃશજનેષુ યાચ્ઞા મહતાં નહિ લાઘવાય સુહૃદર્થે ।
હરિરપિ પાણ્ડુસુતેભ્યઃ સ્વયમર્થી ધાર્તરાષ્ટ્રેષુ ॥

અસદ્ધર્મસ્ત્વયં સ્ત્રીણામ્ અસ્માકં ભવતિ પ્રભો ।
પાપીયસો નરાન્ યદ્વૈ લજ્જાં ત્યક્ત્વા ભજામહે ॥

અસદ્ભિઃ સેવિતો રાજા સ્વયં સન્નપિ દૂષ્યતે ।
કિં સેવ્યો ભોગિસંવીતો ગન્ધવાનપિ ચન્દનઃ ॥

અસદ્ભિરસતામેવ ભુજ્યન્તે ધનસંપદઃ ।
ફલં કિમ્પાકવૃક્ષસ્ય ધ્વાઙ્ક્ષા ભક્ષન્તિ નેતરે ॥

અસદ્વૃત્તો નાયં ન ચ સખિ ગુણૈરેષ રહિતઃ પ્રિયો મુક્તાહારસ્તવ ચરણમૂલે નિપતિતઃ ।
ગૃહાણૈનં મુગ્ધે વ્રજતુ તવ કણ્ઠપ્રણયિતામ્ ઉપાયો નાસ્ત્યન્યો હૃદયપરિતાપોપશમને ॥

અસન્તોઽભ્યર્થિતાઃ સદ્ભિઃ કિંચિત્કાર્યં કદાચન ।
મન્યન્તે સન્તમાત્માનમ્ અસન્તમપિ વિતશ્રુમ્ ॥

અસન્તો યે નિવર્તન્તે વેદેભ્ય ઇવ નાસ્તિકાઃ ।
નરકં ભજમાનાસ્તે પ્રતિપદ્યન્તિ કિલ્બિષમ્ ॥

અસન્થિતપદા સુવિહ્વલાઙ્ગી મદસ્ખલિતચેષ્ટિતૈર્મનોજ્ઞા ।
ક્વ યાસ્યસિ વરોરુ સુરતકાલે વિષમા કિં વાનવાસિકા ત્વમ્ ॥

અસભ્યઃ પિશુનશ્ચૈવ કૃતઘ્નો દીર્ઘવૈરિણઃ ।
ચત્વારઃ કર્મચણ્ડાલાઃ જાતિચણ્ડાલપઞ્ચમાઃ ॥

અસમગ્રવિલોકિતેન કિં તે દયિતં પશ્ય વરોરુ નિર્વિશઙ્કમ્ ।
નહિ જાતુ કુશાગ્રપીતમમ્ભઃ સુચિરેણાપિ કરોત્યપેતતૃષ્ણમ્ ॥

અસમઞ્જસમસમઞ્જસ- મસઞ્જસમેતદાપતિતમ્ ।
વલ્લવકુમારબુદ્ધ્યા હરિ હરિ હરિરીક્ષતઃ કુતુકાત્ ॥