મહાસુભાષિતસંગ્રહ · શ્લોક 3643-3662

અસંશયં ક્ષત્રપરિગ્રહક્ષમા યદાર્યમસ્યામભિલાષિ મે મનઃ ।
સતાં હિ સંદેહપદેષુ વસ્તુષુ પ્રમાણમન્તઃકરણપ્રવૃત્તયઃ ॥

અસંશયં ન્યસ્તમુપાન્તરક્તતાં યદેવ રોદ્ધું રામણીભિરઞ્જનમ્ ।
હૃતેઽપિ તસ્મિન્ સલિલેન શુક્લતાં નિરાસ રાગો નયનેષુ ન શ્રિયમ્ ॥

અસંશયં મહાબાહો મનો દુર્નિગ્રહં ચલમ્ ।
અભ્યાસેન તુ કૌન્તેય વૈરાગ્યેણ ચ ગૃહ્યતે ॥

અસંશયં વિજાનીહિ કાલે સર્વં ફલિષ્યતિ ।
ધૃતિં ધારય વિસ્રબ્ધં ભવેત્ સર્વં સમઞ્જસમ્ ॥

અસકલકલિકાકુલીકૃતાલિ- સ્ખલનવિકીર્ણવિકાસિકેશરાણામ્ ।
મરુદવનિરુહાં રજો વધૂભ્યઃ સમુપહરન્ વિચકાર કોરકાણિ ॥

અસકલનયનાવલોકનેન સ્મિતપરિહાસમનોહરૈર્વચોભિઃ ।
કમલમુખિ મુરારિરેવમેવં કથય કિયન્તિ દિનાનિ વઞ્ચનીયઃ ॥

અસકલનયનેક્ષિતાનિ લજ્જા ગતમલસં પરિપાણ્ડુતા વિષાદઃ ।
ઇતિ વિવિધમિયાય તાસુ ભૂષાં પ્રભવતિ મણ્ડયિતું વધૂરનઙ્ગઃ ॥

અસકૃદસકૃન્નષ્ટાં નષ્ટાં મૃગો મૃગતૃષ્ણિકાં શ્રમપરિગતોઽપ્યુત્પક્ષ્માક્ષઃ પરૈતિ પુનઃ પુનઃ ।
ગણયતિ ન તન્માયાતોયં હતઃ સલિલાશયા ભવતિ હિ મતિસ્તૃષ્ણાન્ધાનાં વિવેકપરાઙ્મુખી ॥

અસકૃન્ ન નેઽતિ સાવધિ- નિષેધબોધિશ્રુતિર્મયા કલિતા ।
ગમયતિ પરમનવરતં યા તમખણ્ડાર્થરૂપમાનન્દમ્ ॥

અસકૃદેકરથેન તરસ્વિના હરિહયાગ્રસરેણ ધનુર્ભૃતા ।
દિનકરાભિમુખા રણરેણવો રુરુધિરે રુધિરેણ સુરદ્વિષામ્ ॥

અસકૃદ્ યુધિ વિજિતાદપિ ભીતો બાર્હદ્રથાજ્જલે દુર્ગમ્ ।
કૃત્વા હરિર્ન્યવાત્સીદ્ વિજિતોઽપ્યાશઙ્કનીયોઽરિઃ ॥

અસકૃન્ ન વદેદાશાં પ્રાર્થયેદ્ દેવતાં સકૃત્ ।
નાલાયની પઞ્ચ પતીન્ પ્રાપોચ્ચાર્ય પુનઃ પુનઃ ॥

અસક્તમારાધયતો યથાયથં વિભજ્ય ભક્ત્યા સમપક્ષપાતયા ।
ગુણાનુરાગાદિવ સખ્યમીયિવાન્ ન બાધતેઽસ્ય ત્રિગણઃ પરસ્પરમ્ ॥

અસઙ્ગસંગદોષેણ સત્યાશ્ચ મતિવિભ્રમઃ ।
એકરાત્રપ્રસઙ્ગેન કાષ્ઠઘણ્ટાવિડમ્બના ॥

અસજ્જનઃ સજ્જનસઙ્ગિસઙ્ગાત્ કરોતિ દુઃસાધ્યમપીહ સાધ્યમ્ ।
પુષ્પાશ્રયાચ્છંભુશિરોઽધિરૂઢા પિપીલિકા ચુમ્બતિ ચન્દ્રબિમ્બમ્ ॥

અસજ્જનાયાશુ વરં ન દદ્યાત્ પ્રીતિતો નૃપઃ ।
વરં ભસ્માસુરાયેશઃ દત્ત્વા નીલિફલં ગતઃ ॥

અસજ્જનાશ્ચેન્ મધુરૈર્વચોભિઃ શક્યન્ત એવ પ્રતિકર્તુમાર્યૈઃ ।
તત્કેતકીરેણુભિરમ્બુરાશેર્ બન્ધક્રિયાયામપિ કઃ પ્રયાસઃ ॥

અસજ્જનેન સંપર્કાદ્ અનયં યાન્તિ સાધવઃ ।
મધુરં શીતલં તોયં પાવકં પ્રાપ્ય તપ્યતે ॥

અસતઃ શ્રીમદાન્ધસ્ય દારિદ્ર્યં પરમાઞ્જનમ્ ।
આત્મૌપમ્યેન ભૂતાનિ દરિદ્રઃ પરમીક્ષતે ॥

અસતાં ચ પરિક્ષેપઃ સતાં ચ પરિગૂહનમ્ ।
અભૂતાનાં ચ હિંસાનામ્ અધર્માણાં ચ વર્જનમ્ ॥