મહાસુભાષિતસંગ્રહ · શ્લોક 3623-3642

અસંદધાનો માનાન્ધઃ સમેનાપિ હતો ભૃશમ્ ।
આમકુમ્ભમિવાભિત્ત્વા નાવતિષ્ઠેત શક્તિમાન્ ॥

અસંદિગ્ધમના ભૂત્વા વદેદિક્ષુરસો યથા ।
વિક્ષુબ્ધો વચસા યો હિ વાક્યશલ્યેન હન્યતે ॥

અસંપત્તૌ પરો લાભો ગુહ્યસ્ય કથનં તથા ।
આપદ્વિમોક્ષણં ચૈવ મિત્રસ્યૈતત્ ફલત્રયમ્ ॥

અસંપન્નઃ કથં બન્ધુર્ અસહિષ્ણુઃ કથં પ્રભુઃ ।
અનાત્મવિત્ કથં વિદ્વાન્ અસંતુષ્ટઃ કથં સુખી ॥

અસંપાદયતઃ કંચિદર્થં જાતિક્રિયાગુણૈઃ ।
યદૃચ્છાશબ્દવત્પુંસઃ સંજ્ઞાયૈ જન્મ કેવલમ્ ॥

અસંપ્રાપ્તરજા ગૌરી પ્રાપ્તે રજસિ રોહિણી ।
અવ્યઞ્જના ભવેત્ કન્યા કુચહીના ચ નગ્નિકા ॥

અસંભવં હેમમૃગસ્ય જન્મ તથાપિ રામો લુલુભે મૃગાય ।
પ્રાયઃ સમાપન્નવિપત્તિકાલે ધિયોઽપિ પુંસાં મલિના ભવન્તિ ॥

અસંભવગુણસ્તુત્યા જાયતે સ્વાત્મનસ્ત્રપા ।
કર્ણિકારં સુગન્ધીતિ વદન્ કો નોપહસ્યતે ॥

અસંભાવ્યં ન વક્તવ્યં પ્રત્યક્ષમપિ દૃશ્યતે ।
શિલા તરતિ પાનીયં ગીતં ગાયતિ વાનરઃ ॥

અસંભાષ્યં ન ભાષેત ભાષસે યદિ તત્તથા ।
પરેષાં હિ સમુદ્વેગે નાત્મનશ્ચ શુભં ફલમ્ ॥

અસંભૃતં મણ્ડનમઙ્ગયષ્ટેર્ અનાસવાખ્યં કરણં મદસ્ય ।
કામસ્ય પુષ્પવ્યતિરિક્તમસ્ત્રં બાલ્યાત્ પરં સાથ વયઃ પ્રપેદે ॥

અસંભેદ્યઃ શુચિર્દક્ષઃ કૃતાન્નસ્ય પરીક્ષકઃ ।
સૂદાનાં ચ વિશેષજ્ઞઃ સૂદાધ્યક્ષો વિધીયતે ॥

અસંભોગેન સામાન્યં કૃપણસ્ય ધનં પરૈઃ ।
અસ્યેદમિતિ સંબન્ધો હાનૌ દુઃખેન ગમ્યતે ॥

અસંભ્રમો વિલજ્જત્વમ્ અવજ્ઞા પ્રતિવાદિનિ ।
હાસો રાજ્ઞઃ સ્તવશ્ચેતિ પઞ્ચૈતે જયહેતવઃ ॥

અસંમતઃ કસ્તવ મુક્તિમાર્ગં પુનર્ભવક્લેશભયાત્ પ્રપન્નઃ ।
બદ્ધશ્ચિરં તિષ્ઠતુ સુન્દરીણામ્ આરેચિતભ્રૂચતુરૈઃ કટાક્ષૈઃ ॥

અસંમાને તપોવૃદ્ધિઃ સંમ્માનાચ્ચ તપઃક્ષયઃ ।
પૂજયા પુણ્યહાનિઃ સ્યાન્ નિન્દયા સદ્ગતિર્ભવેત્ ॥

અસંમુખાલોકનમાભિમુખ્યં નિષેધ એવાનુમતિપ્રકારઃ ।
પ્રત્યુત્તરં મુદ્રણમેવ વાચાં નવાઙ્ગનાનાં નવ એવ પન્થાઃ ॥

અસંવિભાગી દુષ્ટાત્મા કૃતઘ્નો નિરપત્રપઃ ।
તાદૃઙ્નરાધમો લોકે વર્જનીયો નરાધિપ ॥

અસંવૃતસ્ય કાર્યાણિ પ્રાપ્તાન્યપિ વિશેષતઃ ।
નિઃસંશયં વિપદ્યન્તે ભિન્નપ્લવ ઇવોદધૌ ॥

અસંવૃતાકારતયા ભિન્નમન્ત્રસ્ય ભૂપતેઃ ।
સકૃચ્છિદ્રઘટસ્યેવ ન તિષ્ઠત્યુદયોદકમ્ ॥