મહાસુભાષિતસંગ્રહ · શ્લોક 3503-3522

અશુદ્ધા તુ ભવેન્ નારી યાવચ્છલ્યં ન મુઞ્ચતિ ।
નિઃસૃતે તુ તતઃ શલ્યે રજસા શુધ્યતે તતઃ ॥

અશુદ્ધીનાં તુ સર્વાસામ્ આલયાઃ કુત્સિતાઃ સ્ત્રિયઃ ।
સદા શૌચં ન કુર્વન્તિ ભુઞ્જતેઽન્નં તથાવિધાઃ ॥

અશુભપુષિ કલાવપ્યપ્રમત્તાઃ સ્વધર્માદ્ અનુદિનમુપકારાનાચરન્તે બુધાનામ્ ।
બહુજનપરિપુષ્ટા બદ્ધદીક્ષાસ્ત એતે તનુસુખમપિ હિત્વા તન્વતે રાજસેવામ્ ॥

અશુભોદયે જનાનાં નશ્યતિ બુદ્ધિર્ન વિદ્યતે રક્ષા ।
સુહૃદોઽપિ સન્તિ રિપવો વિષમવિષં જાયતેઽપ્યમૃતમ્ ॥

અશૃણ્વન્નપિ બોદ્ધવ્યો મન્ત્રિભિઃ પૃથિવીપતિઃ ।
યથા સ્વદોષનાશાય વિદુરેણામ્બિકાસુતઃ ॥

અશેષચક્ષુઃશ્રવણં પ્રતિકૂલો ભવન્નપિ ।
વિનતાનન્દહેતુર્યઃ સ પુમાનાપ્તનન્દનઃ ॥

અશેષદોષાપગમપ્રકાશ- મિત્રાગમોત્સાહમહોત્સવાર્હમ્ ।
વિકાસશોભાં જનયત્યજસ્રં ધનં જનાનાં દિનમમ્બુજાનામ્ ॥

અશેષલઙ્કાપતિસૈન્યહન્તા શ્રીરામસેવાચરણૈકકર્તા ।
અનેકદુઃખાહતલોકગોપ્તા ત્વસૌ હનૂમાંસ્તવ સૌખ્યકર્તા ॥

અશેષવિઘ્નપ્રતિષેધદક્ષ- મન્ત્રાક્ષતાનામિવ દિઙ્મુખેષુ ।
વિક્ષેપલીલા કરશીકરાણાં કરોતુ વઃ પ્રીતિમિભાનનસ્ય ॥

અશોકનિર્ભર્ત્સિતપદ્મરાગમ્ આકૃષ્ટહેમદ્યુતિકર્ણિકારમ્ ।
મુક્તાકલાપીકૃતસિન્દુવારં વસન્તપુષ્પાભરણં વહન્તી ॥

અશોકે શોકાર્તઃ કિમસિ બકુલેઽપ્યાકુલમના નિરાનન્દઃ કુન્દે સહ ચ સહકારૈર્ન રમસે ।
કુસુમ્ભે વિશ્રમ્ભં યદિહ ભજસે કણ્ટકશતૈર્ અસંદિગ્ધં દગ્ધભ્રમર ભવિતાસિ ક્ષતવપુઃ ॥

અશોચ્યઃ શોચતે શોચ્યં કિં વા શોચ્યો ન શોચ્યતે ।
કશ્ચ કસ્યેહ શોચ્યોઽસ્તિ દેહેઽસ્મિન્ બુદ્બુદોપમે ॥

અશોચ્યાનન્વશોચસ્ત્વં પ્રજ્ઞાવાદાંશ્ચ ભાષસે ।
ગતાસૂનગતાસૂંશ્ચ નાનુશોચન્તિ પણ્ડિતાઃ ॥

અશોચ્યાનીહ ભૂતાનિ યો મૂઢસ્તાનિ શોચતિ ।
તદ્દુઃખાલ્લભતે દુઃખં દ્વાવનર્થૌ નિષેવતે ॥

અશોચ્યો નિર્ધનઃ પ્રાજ્ઞોઽશોચ્યઃ પણ્ડિતબાન્ધવઃ ।
અશોચ્યા વિધવા નારી પુત્રપૌત્રપ્રતિષ્ઠિતા ॥

અશ્નાતિ યઃ સંસ્કુરુતે નિહન્તિ દદાતિ ગૃહ્ણાત્યનુમન્યતે ચ ।
એતે ષડપ્યત્ર વિનિન્દનીયા ભ્રમન્તિ સંસારવને નિરન્તમ્ ॥

અશ્નાતિ યો માંસમસૌ વિધત્તે વધાનુમોદં ત્રસદેહભાજામ્ ।
ગૃહ્ણાતિ રેપાંસિ તતસ્તપસ્વી તેભ્યો દુરન્તં ભવમેતિ જન્તુઃ ॥

અશ્નાભ્યાચ્છાદયામીતિ પ્રાપશ્યન્ પાપપૂરુષઃ ।
નામર્ષં કુરુતે યસ્તુ પુરુષઃ સોઽધમઃ સ્મૃતઃ ॥

અશ્નીત પિબત ખાદત જાગ્રત સંવિશત તિષ્ઠત વા ।
સકૃદપિ ચિન્તયતાહ્નઃ સાવધિકો દેહબન્ધ ઇતિ ॥

અશ્મના સાધયેલ્લોહં લોહેનાશ્માનમેવ ચ ।
બિલ્બાનિવ કરે બિલ્વૈર્ મ્લેચ્છાન્ મ્લેચ્છૈઃ પ્રસાધયેત્ ॥