મહાસુભાષિતસંગ્રહ · શ્લોક 3383-3402

અવિરલમદજલનિવહં ભ્રમરકુલાનીકસેવિતકપોલમ્ ।
અભિમતફલદાતારં કામેશં ગણપતિં વન્દે ॥

અવિરલમદધારાધૌતકુમ્ભઃ શરણ્યઃ ફણિવરવૃતગાત્રઃ સિદ્ધસાધ્યાદિવન્દ્યઃ ।
ત્રિભુવનજનવિઘ્નધ્વાન્તવિધ્વંસદક્ષો વિતરતુ ગજવક્ત્રઃ સંતતં મઙ્ગલં વઃ ॥

અવિરલમિવ દામ્ના પૌણ્ડરીકેણ નદ્ધઃ સ્નપિત ઇવ ચ દુગ્ધસ્રોતસા નિર્ભરેણ ।
કવલિત ઇવ કૃત્સ્નશ્ચક્ષુષા સ્ફારિતેન પ્રસભમમૃતમેઘેનેવ સાન્દ્રેણ સિક્તઃ ॥

અવિરલવિગલન્મદજલ- કપોલપાલીનિલીનમધુપકુલઃ ।
ઉદ્ભિન્નનવશ્મશ્રુ- શ્રેણિરિવ દ્વિપમુખો જયતિ ॥

અવિરલવિલોલજલદઃ કુટજાર્જુનનીપસુરભિવનવાતઃ ।
અયમાયાતઃ કાલો હન્ત મૃતાઃ પથિકગેહિન્યઃ ॥

અવિરુદ્ધં સુખસ્થં યો દુઃખમાર્ગે નિયોજયેત્ ।
જન્મજન્માન્તરે દુઃખી સ નરઃ સ્યાદસંશયમ્ ॥

અવિલમ્બિ સુવૃત્તં ચ ઉદરં ચાતિપૂજિતમ્ ।
નાતિદીર્ઘં સમં પૃષ્ઠં કિંચિચ્ચ વિનતં શુભમ્ ॥

અવિલમ્બે કૃત્યસિદ્ધૌ માન્ત્રિકૈરાપ્યતે યશઃ ।
વિલમ્બે કર્મબાહુલ્યં વિખ્યાપ્યાવાપ્યતે ધનમ્ ॥

અવિવિક્તાવતિસ્તબ્ધૌ સ્તનાવાઢ્યાવિવાદૃતૌ ।
વિવિક્તાવાનતાવેવ દરિદ્રાવિવ ગર્હિતૌ ॥

અવિવેકમતિર્નૃપતિર્ મન્ત્રી ગુણવત્સુ વક્રિતગ્રીવઃ ।
યત્ર ખલાશ્ચ પ્રબલાસ્ તત્ર કથં સજ્જનાવસરઃ ॥

અવિવેકવૃથાશ્રમાવિવાર્થં ક્ષયલોભાવિવ સંશ્રિતાનુરાગમ્ ।
વિજિગીષુમિવાનયપ્રમાદાવ્ અવસાદં વિશિખૌ વિનિન્યતુસ્તમ્ ॥

અવિવેકિ કુચદ્વંદ્વં હન્તુ નામ જગત્ત્રયમ્ ।
શ્રુતિપ્રણયિનોરક્ષ્ણોર્ અયુક્તં જનમારણમ્ ॥

અવિવેકિનિ ભૂપાલે નશ્યન્તિ ગુણિનાં ગુણાઃ ।
પ્રવાસરસિકે કાન્તે યથા સાધ્વ્યાઃ સ્તનોન્નતિઃ ॥

અવિવેકિનિ ભૂપે યઃ કરોત્યાશાં સમૃદ્ધયે ।
યાસ્યામ્યહમનેનેતિ કરોત્યાશાં સ મૃદ્ધયે ॥

અવિવેકો હિ સર્વેષામ્ આપદાં પરમં પદમ્ ।
વિવેકરહિતો લોકે પશુરેવ ન સંશયઃ ॥

અવિશદચલં નેત્રપ્રાન્તાવલોકનમસ્ફુટં ચકિતચકિતા વાચઃ સ્પર્શઃ ક્વચિજ્જનસંકુલે ।
ઇતિ તવ મયા પ્રેમારમ્ભે ય એવ નિરીક્ષિતાઃ કઠિનમનસો દૃષ્ટા ભાવાસ્ત એવ વિરજ્યતઃ ॥

અવિશીર્ણકાન્તપાત્રે નવ્યદશે સુમુખિ સંભૃતસ્નેહે ।
મદ્ગેહદીપકલિકે કથમુપયાતાસિ નિર્વાણમ્ ॥

અવિશુદ્ધકુલોત્પન્ના દેહાર્પણજીવિકા શઠાચરણા ।
ક્વાહં રૂપાજીવા ક્વ ભવન્તઃ શ્લાઘનીયજન્મગુણાઃ ॥

અવિશ્રાન્તો વાતો દહન ઇવ સોયં જનયતિ પ્રસક્તં સાતત્યાદ્ દલયતિ કુલાદ્રીનપિ જલમ્ ।
પ્રસૂતે કૃત્યેષુ વ્યવસિતિરનિર્વ્યૂઢસુદૃઢા ફલાવાપ્તિં લોકે પ્રતિકલમસંભાવ્યવિભવામ્ ॥

અવિશ્રામં વહેદ્ ભારં શીતોષ્ણં ચ ન વિન્દતિ ।
સસંતોષસ્તથા નિત્યં ત્રીણિ શિક્ષેત ગર્દભાત્ ॥