મહાસુભાષિતસંગ્રહ · શ્લોક 3363-3382

અવિભાવ્યતારકમદૃષ્ટહિમ- દ્યુતિબિમ્બમસ્તમિતભાનુ નભઃ ।
અવસન્નતાપમતમિસ્રમભાદ્ અપદોષતૈવ વિગુણસ્ય ગુણઃ ॥

અવિભ્રમાલોકનદુર્ભગાણિ પ્રવ્યક્તવક્ત્રસ્તનમણ્ડલાનિ ।
અઙ્ગાનિ રે પામરકામિનીનામ્ અપુણ્યતારુણ્ય કિમાશ્રિતાનિ ॥

અવિમૃષ્યમેતદભિલષ્યતિ સ દ્વિષતાં વધેન વિષયાભિરતિમ્ ।
ભવવીતયે નહિ તથા સ વિધિઃ ક્વ શરાસનં ક્વ ચ વિમુક્તિપથઃ ॥

અવિરતં પરકાર્યકૃતાં સતાં મધુરિમાતિશયેન વચોઽમૃતમ્ ।
અપિ ચ માનસમમ્બુનિધિર્યશો વિમલશારદચન્દિરચન્દ્રિકા ॥

અવિરતકુસુમાવચાયખેદાન્ નિહિતભુજાલતયૈકયોપકણ્ઠમ્ ।
વિપુલતરનિરન્તરાવલગ્ન- સ્તનપિહિતપ્રિયવક્ષસા લલમ્બે ॥

અવિરતતરુણીસહસ્રમધ્ય- સ્થિતિવિગલત્પુરુષવ્રતા ઇવૈતે ।
પ્રતિપદમતિકાતરાઃ ક્ષિતીશાઃ પરિકલયન્તિ ભયં સમન્તતોઽપિ ॥

અવિરતમક્લમમુદ્ધૃત- ધરાતલં સુસ્મિતોલ્લસદ્વદનમ્ ।
જગદાનન્દવિધાયિનમ્ ઉપૈમિ શરણં પ્રભું શેષમ્ ॥

અવિરતમધુપાનાગારમિન્દિન્દિરાણામ્ અભિસરણનિકુઞ્જં રાજહંસીકુલસ્ય ।
પ્રવિતતબહુશાલં સદ્મ પદ્માલયાયા વિતરતિ રતિમક્ષ્ણોરેષ લીલાતડાગઃ ॥

અવિરતમિદમમ્ભઃ સ્વેચ્છયોચ્ચાલયન્ત્યા વિકચકમલકાન્તોત્તાનપાણિદ્વયેન ।
પરિકલિત ઇવાર્ઘ્યઃ કામબાણાતિથિભ્યઃ સલિલમિવ વિતીર્ણં બાલલીલાસુખાનામ્ ॥

અવિરતરતલીલાયાસજાતશ્રમાણામ્ ઉપશમમુપયાન્તં નિઃસહેઽઙ્ગેઽઙ્ગનાનામ્ ।
પુનરુષસિ વિવિક્તૈર્માતરિશ્વાવચૂર્ણ્ય જ્વલયતિ મદનાગ્નિં માલતીનાં રજોભિઃ ॥

અવિરતવિરુતકપોતીમ્ અર્પિતરસમાવૃણોતિ ઘનવલનઃ ।
નવલતિકામતિકાતર- તરલિતમદિરદ્વયીં મુદિરઃ ॥

અવિરતામ્બુજસંગતિસંગલદ્- બહલકેસરસંવલિતેવ યા ।
લલિતવસ્તુવિધાનસુખોલ્લસત્- તનુરુહા તનુરાત્મભુવોઽવતાત્ ॥

અવિરલકમલવિકાસઃ સકલાલિમદશ્ચ કોકિલાનન્દઃ ।
રમ્યોઽયમેતિ સંપ્રતિ લોકોત્કણ્ઠાકરઃ કાલઃ ॥

અવિરલકરવાલકમ્પનૈર્ ભ્રુકુટીતર્જનગર્જનૈર્મુહુઃ ।
દદૃશે તવ વૈરિણાં મદઃ સ ગતઃ ક્વાપિ તવેક્ષણે ક્ષણાત્ ॥

અવિરલધારાનિકરં જલદૈર્જલમુત્સૃજદ્ભિરતિમાત્રમ્ ।
માનિવધૂહૃદયેભ્યઃ કાલુષ્યમશેષતો મૃષ્ટમ્ ॥

અવિરલપતદ્બાષ્પોત્પીડપ્રસિક્તકપોલયા વચનવિષયઃ સંદેશોઽન્યસ્તયા વિહિતો ન તે ।
મનસિ કિમપિ ધ્યાયન્ત્યા તુ ક્ષણં તવ કાન્તયા પથિક નિહિતા દૃષ્ટિઃ કષ્ટં નવે કરુણાઙ્કુરે ॥

અવિરલપરાગસૈકત- મકરન્દતરઙ્ગિણીમનુવનાન્તમ્ ।
પિકયુવતિજાનુદઘ્નીં ગાહન્તે મધુપયોષિતસ્તૃષિતાઃ ॥

અવિરલપરિવાહૈરશ્રુણઃ સારણીનાં સ્મરદહનશિખોષ્ણશ્વાસપૂરૈશ્ચ તસ્યાઃ ।
સુભગ બત કૃશાઙ્ગ્યાઃ સ્પર્ધયાન્યોન્યમેભિઃ ક્રિયત ઇવ પુરો ભૂઃ પઙ્કિલા પાંસુલા ચ ॥

અવિરલપુલકઃ સહ વ્રજન્ત્યાઃ પ્રતિપદમેકતરઃ સ્તનસ્તરુણ્યાઃ ।
ઘટિતવિઘટિતઃ પ્રિયસ્ય વક્ષસ્- તટમુવિ કન્દુકવિભ્રમં બભાર ॥

અવિરલફલિનીવનપ્રસૂનઃ કુસુમિતકુન્દસુગન્ધિગન્ધવાહઃ ।
ગુણમસમયજં ચિરાય લેભે વિરલતુષારકણસ્તુષારકાલઃ ॥