મહાસુભાષિતસંગ્રહ · શ્લોક 3303-3322

અવાકિરન્ વયોવૃદ્ધાસ્ તં લાજૈઃ પૌરયોષિતઃ ।
પૃષતૈર્મન્દરોદ્ધૂતૈઃ ક્ષીરોર્મય ઇવાચ્યુતમ્ ॥

અવાક્ષિરાસ્તમસ્યન્ધે કિલ્બિષી નરકં પતેત્ ।
યઃ પ્રશ્નં વિતથં બ્રૂયાત્ પૃષ્ટઃ સન્ ધર્મનિશ્ચયે ॥

અવાચ્યવાદાંશ્ચ બહૂન્ વદિષ્યન્તિ તવાહિતાઃ ।
નિન્દન્તસ્તવ સામર્થ્યં તતો દુઃખતરં નુ કિમ્ ॥

અવાપ સાપત્રપતાં સ ભૂપતિર્ જિતેન્દ્રિયાણાં ધુરિ કીર્તિતસ્થિતિઃ ।
અસંવરે શમ્બરવૈરિવિક્રમે ક્રમેણ તત્ર સ્ફુટતામુપેયુષિ ॥

અવાપુસ્તાપમત્યર્થં શફર્યઃ પલ્વલોદકે ।
પુત્રક્ષેત્રાદિસક્તેન મમત્વેન યથા ગૃહી ॥

અવાપ્તઃ પ્રાગલ્ભ્યં પરિણતરુચઃ શૈલતનયે કલઙ્કો નૈવાયં વિલસતિ શશાઙ્કસ્ય વપુષિ ।
અમુષ્યેયં મન્યે વિગલદમૃતસ્યન્દશિશિરે રતિશ્રાન્તા શેતે રજનિરમણી ગાઢમુરસિ ॥

અવાપ્તૈર્દ્રાઘિમ્ણા પરિચયમુદન્વત્તટભુવામ્ અસૌ ભાતિ શ્યામદ્યુતિભિરુદકૈર્મેખલભુવઃ ।
અગસ્ત્યસ્યાકાર્ષીદ્ વચનમિતિ કોપાદુદધિના ગૃહીતઃ કેશેષુ પ્રસભમિવ વિન્ધ્યક્ષિતિધરઃ ॥

અવાપ્યતે વા કિમિયદ્ભવત્યા ચિત્તૈકપદ્યામપિ વિદ્યતે યઃ ।
યત્રાન્ધકારઃ કિલ ચેતસોઽપિ જિહ્મેતરૈર્બ્રહ્મ તદપ્યવાપ્યમ્ ॥

અવાપ્યાન્ કામયસ્વાર્થાન્ નાનવાપ્યાન્ કદાચન ।
પ્રત્યુત્પન્નાનનુભવન્ મા શુચસ્ત્વમનાગતાન્ ॥

અવામભાગેન યદા વલિત્વા શ્વા પૃષ્ઠકણ્ડૂતિમપાકરોતિ ।
તદહ્નિ તત્રૈવ કૃતાન્તગેહે રોગાભિભૂતો નિયતં પ્રયાતિ ॥

અવાલુકાશ્લક્ષ્ણમૃદા પૂરિતે ગર્તશોધનમ્ ।
કોદણ્ડાર્ધમિતે ખાતે જલસિક્તે વપેત્તરુમ્ ।
કદલીક્ષીરિણૌ રોપ્યૌ મૂલે દત્ત્વા તુ ગોમયમ્ ॥

અવાહિતા વિનશ્યન્તિ સર્વકર્મક્ષમા અપિ ।
કૃશા વ્યાધિપરીતાઙ્ગા જાયન્તેઽત્યન્તવાહનાત્ ॥

અવિકારિણમપિ સજ્જનમ્ અનિશમનાર્યઃ પ્રબાધતેઽત્યર્થમ્ ।
કમલિન્યા કિમિહ કૃતં હિમસ્ય યત્તાં સદા દહતિ ॥

અવિકૃતકૃતભૌમરવા સુસ્થાનસ્થા સુચેષ્ટિતા વામે ।
યાત્રાસુ દૃષ્ટમાત્રા દુર્ગા દુર્ગાણિ તારયતિ ॥

અવિક્રિયાં ચૈવ સમાશ્રિતાઃ સમં હરન્તિ જાલં મમ પક્ષિણો હ્યમી ।
વિવાદમેષ્યન્તિ પરસ્પરં યદા સમાગમિષ્યન્તિ ચ મદ્વશં તદા ॥

અવિક્રેયં લવણં પક્વમન્નં દધિ ક્ષીરં મધુ તૈલં ઘૃતં ચ ।
તિલા માંસં મૂલફલાનિ શાકં રક્તં વાસઃ સર્વગન્ધા ગુડશ્ચ ॥

અવિગ્રહસ્યાપ્યતુલેન હેતુના સમેતભિન્નદ્વયમૂર્તિ તિષ્ઠતઃ ।
તવૈવ નાન્યસ્ય જગત્સુ દૃશ્યતે વિરુદ્ધવેષાભરણસ્ય કાન્તતા ॥

અવિચારયતો યુક્તિકથનં તુષખણ્ડનમ્ ।
નીચેષૂપકૃતં રાજન્ બાલુકાસ્વિવ મૂત્રિતમ્ ॥

અવિચારેણ યત્ કર્મ કૃતં તન્મર્મકૃન્તનમ્ ।
પ્રસહ્ય સીતાહરણાદ્ અતીતા રાવણશ્રિયઃ ॥

અવિજિત્ય ય આત્માનમ્ અમાત્યાન્ વિજિગીષતે ।
અમિત્રાન્ વાજિતામાત્યઃ સોઽવશઃ પરિહીયતે ॥