મહાસુભાષિતસંગ્રહ · શ્લોક 3223-3242

અવચિતકુસુમા વિહાય વલ્લીર્ યુવતિષુ કોમલમાલ્યમાલિનીષુ ।
પદમુપદધિરે કુલાન્યલીનાં નપરિચયો મલિનાત્મનાં પ્રધાનમ્ ॥

અવચિતબલિપુષ્પા વેદિસંમાર્ગદક્ષા નિયમવિધિજલાનાં બર્હિષાં ચોપનેત્રી ।
ગિરિશમુપચચાર પ્રત્યહં સા સુકેશી નિયમિતપરિખેદા તચ્છિરશ્ચન્દ્રપાદૈઃ ॥

અવજિતમધુના તવાહમક્ષ્ણો રુચિરતયેત્યવનમ્ય લજ્જયેવ ।
શ્રવણકુવલયં વિલાસવત્યા ભ્રમરરુતૈરુપકર્ણમાચચક્ષે ॥

અવજ્ઞયા દીયતે યત્ તથૈવાશ્રદ્ધયાપિ ચ ।
તદાહુરધમં દાનં મુનયઃ સત્યવાદિનઃ ॥

અવજ્ઞયા ન દાતવ્યં કસ્ય ચિલ્લીલયાપિ વા ।
અવજ્ઞયા કૃતં હન્યાદ્ દાતારં નાત્ર સંશયઃ ॥

અવજ્ઞયા યદહસદુચ્ચકૈર્બલઃ સમુલ્લસદ્દશનમયૂખમણ્ડલઃ ।
રુષારુણીકૃતમપિ તેન તત્ક્ષણં નિજં વપુઃ પુનરનયન્નિજાં રુચિમ્ ॥

અવજ્ઞાતોઽપિ દુષ્ટેન ગુણો દોષો ન મન્યતે ।
નહિ ચમ્પકસૌગન્ધ્યં પૂતિર્ભૃઙ્ગાવહેલયા ॥

અવજ્ઞાનસહસ્રૈસ્તુ દોષાઃ કષ્ટતરા ધને ।
ધને સુખકલા યા ચ સાપિ દુઃખૈર્વિધીયતે ॥

અવજ્ઞાસ્ફુટિતં પ્રેમ સમીકર્તું ક ઈશ્વરઃ ।
સંધિં ન યાતિ સ્ફુટિતં લાક્ષાલેપેન મૌક્તિકમ્ ॥

અવતારા હ્યસંખેયા હરેઃ સત્ત્વનિધેર્દ્વિજાઃ ।
યથા વિદાસિનઃ કુલ્યાઃ સરસઃ સ્યુઃ સહસ્રશઃ ॥

અવતિ નિખિલલોકં યઃ પિતેવાદૃતાત્મા દહતિ દુરિતરાશિં પાવકો વેન્ધનૌકમ્ ।
વિતરતિ શિવસૌખ્યં હન્તિ સંસારશત્રું વિદધતુ શુભબુદ્ધ્યા તં બુધા ધર્મમત્ર ॥

અવતુ વઃ સવિતુસ્તુરગાવલી સ્ફુરતિ મધ્યગતારુણનાયકા ।
સમભિલમ્ભિતતુઙ્ગપયોધરા મરકતૈકલતેવ નભઃશ્રિયઃ ॥

અવદ્યજમ્બાલગવેષણાય કૃતોદ્યમાનાં ખલસૈરિભાણામ્ ।
કવીન્દ્રવાઙ્નિર્જરનિર્ઝરિણ્યાં સંજાયતે વ્યર્થમનોરથત્વમ્ ॥

અવદ્યમુક્તે પથિ યઃ પ્રવર્તતે પ્રવર્તયત્યન્યજનં ચ નિઃસ્પૃહઃ ।
સ સેવિતવ્યઃ સ્વહિતૈષિણા ગુરુઃ સ્વયં તરંસ્તારયિતું ક્ષમઃ પરમ્ ॥

અવધાનેન મૌનેન કાષાયેણ જટાજિનૈઃ ।
વિશ્વાસયિત્વા દ્વેષ્ટારમ્ અવલુમ્પેદ્ યથા વૃકઃ ॥

અવધારય ધર્મેષુ પ્રધાનમવધાનતઃ ।
નિર્ભરાનન્દકન્દાય ગોવિન્દાય મનોઽર્પય ॥

અવધાર્ય કાર્યગુરુતામભવન્ ન ભયાય સાન્દ્રતમસંતમસમ્ ।
સુતનોઃ સ્તનૌ ચ દયિતોપગમે તનુરોમરાજિપથવેપથવે ॥

અવધિદિનાવધિજીવાઃ પ્રસીદ જીવન્તુ પથિકજનજાયાઃ ।
દુર્લઙ્ઘ્યવર્ત્મશૈલૌ સ્તનૌ પિધેહિ પ્રપાપાલિ ॥

અવધિદિવસઃ પ્રાપ્તશ્ચાયં તનોર્વિરહસ્ય વા રવિરયમુપૈત્યસ્તં સખ્યો મમાપિ ચ જીવિતમ્ ।
તદલમફલૈરાશાબન્ધૈઃ પ્રસીદ નમોઽસ્તુ તે હૃદય સહસા પાકોત્પીડં વિડમ્બય દાડિમમ્ ॥

અવધિદિવસઃ સોઽયં નાત્રાગતઃ કિમિયત્ ક્ષણં વિતર નયને પશ્યૈતન્મે પુરઃ સખિ સાહસમ્ ।
ઇયમિયમહં રૂઢજ્વાલાકરાલિતરોદસીં મલયજરસાભ્યક્તૈરઙ્ગૈઃ પતામ્યભિ કૌમુદીમ્ ॥