મહાસુભાષિતસંગ્રહ · શ્લોક 3163-3182

અલસારુણલોચનારવિન્દાં પરિભોગોચિતધૂસરૈકચેલામ્ ।
શિથિલાકુલવેણિબન્ધરમ્યામ્ અબલામન્તિકશાયિનીં દિદૃક્ષે ॥

અલસૈર્મદેન સુદૃશઃ શરીરકૈઃ સ્વગૃહાન્ પ્રતિ પ્રતિયયુઃ શનૈઃ શનૈઃ ।
અલઘુપ્રસારિતવિલોચનાઞ્જલિ- દ્રુતપીતમાધવરસૌઘનિર્ભરૈઃ ॥

અલસો મન્દબુદ્ધિશ્ચ સુખી ચ વ્યાધિપીડિતઃ ।
નિદ્રાલુઃ કામુકશ્ચૈવ ષડેતે શાસ્ત્રવર્જિતાઃ ॥

અલાબું વર્તુલાકારં વાર્તાકં કુન્દસંનિભમ્ ।
પ્રાણાન્તેઽપિ ન ચાશ્નીયાન્ મસૂરાન્નં સવલ્કલમ્ ॥

અલાબુબીજં ત્રપુસસ્ય બીજં તસ્યૈવ તોયેન ચ તન્નિષિક્તમ્ ।
આલેપનાદ્યૈર્વિધિવત્ પ્રયુક્તં હન્યાદ્વિષં તક્ષકસંભવં ચ ॥

અલાભાત્ પુરુષાણાં હિ ભયાત્ પરિજનસ્ય ચ ।
વધબન્ધભયાચ્ચાપિ સ્વયં ગુપ્તા ભવન્તિ તાઃ ॥

અલિકુલમઞ્જુલકેશી પરિમલબહુલા રસાવહા તન્વી ।
કિશલયપેશલપાણિઃ કોકિલકલભાષિણી પ્રિયતમા મે ॥

અલિનીલાલકલતં કં ન હન્તિ ઘનસ્તનિ ।
આનનં નલિનચ્છાયનયનં શશિકાન્તિ તે ॥

અલિપટલૈરનુયાતાં સહૃદયહૃદયજ્વરં વિલુમ્પન્તીમ્ ।
મૃગમદપરિમલલહરીં સમીર પામરપુરે કિરસિ ॥

અલિભિરઞ્જનબિન્દુમનોહરૈઃ કુસુમપઙ્ક્તિનિપાતિભિરઙ્કિતઃ ।
ન ખલુ શોભયતિ સ્મ વનસ્થલીં ન તિલકસ્તિલકઃ પ્રમદામિવ ॥

અલિયુવા વિલલાસ ચિરાય યસ્ ત્રિદશશૈવલિનીકમલોદરે ।
વિધિવિયોગનિયોગવશીકૃતો ગતતરૌ સ મરૌ રમતે કથમ્ ॥

અલિરનુસરતિ પરિમલં લક્ષ્મીરનુસરતિ નયગુણસમૃદ્ધિમ્ ।
નિમ્નમનુસરતિ સલિલં વિધિલિખિતં બુદ્ધિરનુસરતિ ॥

અલિરયં નલિનીદલમધ્યગઃ કમલિનીમકરન્દમદાલસઃ ।
વિધિવશાત્ પરદેશમુપાગતઃ કુટજપુષ્પરસં બહુ મન્યતે ॥

અલિર્મૃગો વા નેત્રં વા યત્ર કિંચિદ્ વિભાસતે ।
અરવિન્દં મૃગાઙ્કો વા મુખં વેદં મૃગીદૃશઃ ॥

અલિવલયૈરલકૈરિવ કુસુમસ્તબકૈઃ સ્તનૈરિવ વસન્તે ।
ભાન્તિ લતા લલના ઇવ પાણિભિરિવ કિસલયૈઃ સપદિ ॥

અલીક એવ ત્વદ્ભાવો મદ્ભાવોઽલીક એવ ચ ।
અનુભૂતોઽપ્યસદ્રૂપઃ સ્વપ્ને સ્વમરણં યથા ॥

અલીકરૂપો યદિ મધ્યભાગઃ પયોધરાકારભૃતશ્ચ કેશાઃ ।
ઉત્સઙ્ગશોભાપિ સરોરુહાક્ષ્યાઃ કરસ્ય શોભાં કલયેન્ન કસ્માત્ ॥

અલીકવ્યામુક્તપ્રચુરકબરીબન્ધનમિષાદ્ ઉદઞ્ચદ્દોર્વલ્લીદ્વયધૃતપરીવેશનિહિતઃ ।
અયં જૃમ્ભારમ્ભસ્ફટિકશુચિદન્તાંશુનિચયો મુખેન્દુર્ગૌરાઙ્ગ્યા ગલિતમૃગજ્ઞક્ષ્મા વિજયતે ॥

અલીનાં માલાભિર્વિરચિતજટાભારમહિમા પરાગૈઃ પુષ્પાણામુપરચિતભસ્મવ્યતિકરઃ ।
વનાનામાભોગે કુસુમવતિ પુષ્પોચ્ચયપરો મરુન્ મન્દં મન્દં વિચરતિ પરિવ્રાજક ઇવ ॥

અલુપ્તસત્ત્વકોશાનાં મહત્ત્વં મહતાં હિ કિમ્ ।
આકર્ણિતાં પરસ્યાર્તિં ન ચેચ્છિન્દન્તિ તત્ક્ષણમ્ ॥