મહાસુભાષિતસંગ્રહ · શ્લોક 3103-3122

અલં હિમાનીપરિદીર્ણગાત્રઃ સમાપિતઃ ફાલ્ગુનસંગમેન ।
અત્યન્તમાકાઙ્ક્ષિતકૃષ્ણવર્ત્મા ભીષ્મો મહાત્માજનિ માઘતુલ્યઃ ॥

અલકતમઃ પરિપીતં સુસ્મિતસુષમાપુરસ્કૃતં મધુરમ્ ।
કો ન સુધાનિધિસહજં સુમુખિ મુખં હન્ત સંમનુતામ્ ॥

અલકાશ્ચ ખલાશ્ચૈવ મૂર્ધ્નિ ભીરુજનૈર્ધૃતાઃ ।
ઉપર્યુપરિ સત્કારેઽપ્યાવિષ્કુર્વન્તિ વક્રતામ્ ॥

અલકેષુ ચૂર્ણભાસઃ સ્વેદલવાભાન્ કપોલફલકેષુ ।
નવઘનકૌતુકિનીનાં વારિકણાન્ પશ્યતિ કૃતાર્થઃ ॥

અલક્તકો યથા રક્તો નરઃ કામી તથૈવ ચ ।
હૃતસારસ્તથા સોઽપિ પાદમૂલે નિપાત્યતે ॥

અલક્તકો યથા રક્તો નિષ્પીડ્ય પુરુષસ્ તથા ।
અબલાભિર્બલાદ્ રક્તઃ પાદમૂલે નિપાત્યતે ॥

અલક્ષિતકુચાભોગં ભ્રમન્તી નૃત્યભૂમિષુ ।
સ્મરેણાપિ સરોજાક્ષી ન લક્ષ્યીક્રિયતે શરૈઃ ॥

અલક્ષિતગતાગતૈઃ કુલવધૂકટાક્ષૈરિવ ક્ષણાનુનયશીતલૈઃ પ્રણયકેલિકોપૈરિવ ।
સુવૃત્તમસૃણોન્નતૈર્મૃગદૃશામુરોજૈરિવ ત્વદીયતુરગૈરિદં ધરણિચક્રમાક્રમ્યતે ॥

અલક્ષ્મીરાવિશત્યેનં શયાનમલસં નરમ્ ।
નિઃસંશયં ફલં લબ્ધ્વા દક્ષો ભૂતિમુપાશ્નુતે ॥

અલઘુતા જઠરસ્ય કુચૌ ગતા ચરણચઞ્ચલતા નયને ગતા ।
સખિ વિલોકય મે તનુચેષ્ટિતં વિનિમયપ્રગતં નવયૌવનમ્ ॥

અલઘૂપલપઙ્ક્તિશાલિનીઃ પરિતો રુદ્ધનિરન્તરામ્બરાઃ ।
અધિરૂઢનિતમ્બભૂમયો ન વિમુઞ્ચન્તિ ચિરાય મેખલાઃ ॥

અલઙ્ઘ્યં તત્તદુદ્વીક્ષ્ય યદ્યદુચ્ચૈર્મહીભૃતામ્ ।
પ્રિયતાં જ્યાયસીં મા ગાન્ મહતાં કેન તુઙ્ગતા ॥

અલઙ્ઘ્યં સર્વેષામિહ ખલુ ફલં કર્મજનિતં વિપત્ કર્મપ્રૈષ્યા વ્યથયતિ ન જાતાસિ હૃદયમ્ ।
યદજ્ઞાઃ કુર્વન્તિ પ્રસભમુપહાસં ધનમદાદ્ ઇદં ત્વન્તર્ગાઢં પરમપરિતાપં જનયતિ ॥

અલબ્ધં ચૈવ લિપ્સેત લબ્ધં રક્ષેત્ પ્રયત્નતઃ ।
રક્ષિતં વર્ધયેચ્ચૈવ વૃદ્ધં પાત્રેષુ નિક્ષિપેત્ ॥

અલબ્ધદુગ્ધાદિરસો રસાવહં તદુદ્ભવો નિમ્બરસં કૃમિર્યથા ।
અદૃષ્ટજૈનેન્દ્રવચોરસાયનસ્ તથા કુતત્ત્વં મનુતે રસાયનમ્ ॥

અલબ્ધમિચ્છેદ્દણ્ડેન લબ્ધં રક્ષેદવેક્ષયા ।
રક્ષિતં વર્ધયેદ્ વૃદ્ધ્યા વૃદ્ધં પાત્રેષુ નિક્ષિપેત્ ॥

અલબ્ધમીહેદ્ધર્મેણ લબ્ધં યત્નેન પાલયેત્ ।
પાલિતં વર્ધયેન્નીત્યા વૃદ્ધં પાત્રેષુ નિક્ષિપેત્ ॥

અલબ્ધલિપ્સા ન્યાયેન લબ્ધસ્ય ચ વિવર્ધનમ્ ।
પરિવૃદ્ધસ્ય વિધિવત્ પાત્રે સંપ્રતિપાદનમ્ ॥

અલબ્ધવેતનો લુબ્ધો માની ચાપ્યવમાનિતઃ ।
ક્રુદ્ધશ્ચ કોપિતોઽકસ્માત્ તથા ભીતશ્ચ ભીષિતઃ ॥

યથાભિલષિતૈઃ કામૈર્ ભિન્દ્યાદેતાંશ્ચતુર્વિધાન્ ।
પરપક્ષે સ્વપક્ષે ચ યથાવત્ પ્રશમં નયેત્ ॥