મહાસુભાષિતસંગ્રહ · શ્લોક 2863-2882

અરિષઙ્વર્ગ એવાયમ્ અસ્યાસ્તાત પદાનિ ષટ્ ।
તેષામેકમપિ ચ્છિન્દન્ ખઞ્જય ભ્રમરીં શ્રિયમ્ ॥

અરિષ્ટાનિ મહારાજ શૃણુ વક્ષ્યામિ તાનિ તે ।
યેષામાલોકનાન્ મૃત્યુઃ નિજં જાનાતિ યોગવિત્ ॥

અરુંતુદં પરુષં રૂક્ષવાચં વાક્કણ્ટકૈર્વિતુદન્તં મનુષ્યાન્ ।
વિદ્યાદલક્ષ્મીકતમં જનાનાં મુખે નિબદ્ધાં નિરૃતિં વહન્તમ્ ॥

અરુચિર્નિશયા વિના શશી શશિના સાપિ વિના મહત્તમઃ ।
ઉભેયેન વિના મનોભવ- સ્ફુરિતં નૈવ ચકાસ્તિ કામિનોઃ ॥

અરુણકિરણજાલૈરન્તરિક્ષે ગતર્ક્ષે ચલતિ શિશિરવાતે મન્દમન્દં પ્રભાતે ।
યુવતિજનકદમ્બે નાથમુક્તૌષ્ઠબિમ્બે ચરમગિરિનિતમ્બે ચન્દ્રબિમ્બં લલમ્બે ॥

અરુણકિરણે વહ્નૌ લાજાનુડૂનિ જુહોતિ યા પરિણયતિ તાં સંધ્યામેતામવૈમિ મણિર્દિવઃ ।
ઇયમિવ સ એવાગ્નિભ્રાન્તિં કરોતિ પુરાયતઃ કરમપિ ન કસ્તસ્યૈવોત્કઃ સકૌતુકમીક્ષિતુમ્ ॥

અરુણજલજરાજીમુગ્ધહસ્તાગ્રપાદા બહુલમધુપમાલાકજ્જલેન્દીવરાક્ષી ।
અનુપતતિ વિરાવૈઃ પત્રિણાં વ્યાહરન્તી રજનિમચિરજાતા પૂર્વસંધ્યા સુતેવ ॥

અરુણદલનલિન્યા સ્નિગ્ધપાદારવિન્દા કઠિનતનુધરણ્યાં યાત્યકસ્માત્ સ્ખલન્તી ।
અવનિ તવ સુતેયંપાદવિન્યાસદેશે ત્યજ નિજ કઠિનત્વં જાનકી યાત્યરણ્યમ્ ॥

અરુણનયનં સભ્રૂભઙ્ગં દરસ્ફુરિતાધરં સુતનુ શશિનઃ ક્લિષ્ટાં કાન્તિં કરોતુ તવાનનમ્ ।
કૃતમનુનયૈઃ કોપોઽયં તે મનસ્વિનિ વર્ધતામ્ ઇતિ ગદિતયાશ્લિષ્ટો દેવ્યા શિવાય શિવોઽસ્તુ વઃ ॥

અરુણમપિ વિદ્રુમદ્રું મૃદુલતરં ચાપિ કિસલયં બાલે ।
અધરીકરોતિ નિતરાં તવાધરો મધુરિમાતિશયાત્ ॥

અરુણરાગનિષેધિભિરંશુકૈઃ શ્રવણલબ્ધપદૈશ્ચ યવાઙ્કુરૈઃ ।
પરભૃતાવિરુતૈશ્ચ વિલાસિનઃ સ્મરબલૈરબલૈકરસાઃ કૃતાઃ ॥

અરુણિતાખિલશૈલવના મુહુર્ વિદધતી પથિકાન્ પરિતાપિનઃ ।
વિકચકિંશુકસંહતિરુચ્ચકૈર્ ઉદવહદ્દવહવ્યવહશ્રિયમ્ ॥

અરુણે ચ તરુણિ નયને તવ મલિનં ચ પ્રિયસ્ય મુખમ્ ।
મુખમાનતં ચ સખિતે જ્વલિતશ્ચાસ્યાન્તરે સ્મરજ્વલનઃ ॥

અરુણોદયવેલાયાં દશાહેન ફલં લભેત્ ।
ગોવિસર્જનવેલાયાં સદ્યઃ ફલદ ઇષ્યતે ॥

અરુન્ધતીકામપુરંધ્રિલક્ષ્મી- જમ્ભદ્વિષદ્દારનવામ્બિકાનામ્ ।
ચતુર્દશીયં તદિહોચિતૈવ ગુલ્ફદ્વયાપ્તા યદદૃશ્યસિદ્ધિઃ ॥

અરુષ્યન્ ક્રુશ્યમાનસ્ય સુકૃતં નામ વિન્દતિ ।
દુષ્કૃતં ચાત્મનો મર્ષી રુષ્યત્યેવાપમાર્ષ્ટિ વૈ ॥

અરૂપોઽપિ સુરૂપોઽપિ આઢ્યોઽપિ દ્રવ્યવર્જિતઃ ।
દુઃશીલઃ શીલયુક્તો વા સ્ત્રીણાં ભર્તાધિદેવતા ॥

અરે ચેતોમત્સ્ય ભ્રમણમધુના યૌવનજલે ત્યજ ત્વં સ્વચ્છન્દં યુવતિજલધૌ પશ્યસિ ન કિમ્ ।
તનૂજાલીજાલં સ્તનયુગલતુમ્બીફલયુતં મનોભૂઃ કૈવર્તઃ ક્ષિપતિ રતિતન્તુ પ્રતિમુહુઃ ॥

અરે દૈવ ત્વદાયત્તં કામં વિત્તાદિ ગચ્છતુ ।
મમાયત્તં પુનર્વૃત્તં હર્તું કસ્યેહ યોગ્યતા ॥

અરે યમભટાઃ શઠાઃ કપટવિગ્રહે તૂદ્ભટા નિવેદયત વો યમં ન ચ તવાધિકારો મયિ ।
અહં ચ શિવસુન્દરીચરણયુગ્મપઙ્કેરુહ- સ્ખલન્મધુસુધારસં સમપિબં ન જાનીથ રે ॥