મહાસુભાષિતસંગ્રહ · શ્લોક 2423-2442

અમન્ત્રમક્ષરં નાસ્તિ નાસ્તિ મૂલમનૌષધમ્ ।
અયોગ્યઃ પુરુષો નાસ્તિ યોજકસ્તત્ર દુર્લભઃ ॥

અમન્ત્રમક્ષરં નાસ્તિ નાસ્તિ મૂલમનૌષધમ્ ।
નિર્ધના પૃથિવી નાસ્તિ હ્યામ્નાયાઃ ખલુ દુર્લભાઃ ॥

અમન્દતરવાર્યગ્રધારાહતમહીભૃતઃ ।
ચિત્રચાપધરા વીરા વિદ્યોતન્તે ઘના ઇવ ॥

અમન્દમણિનૂપુરક્વણનચારુચારીક્રમં ઝણજ્ઝણિતમેખલાસ્ખલિતતારહારચ્છટમ્ ।
ઇદં તરલકઙ્કણાવલિવિશેષવાચાલિતં મનો હરતિ સુભ્રુવઃ કિમપિ કન્દુકક્રીડિતમ્ ॥

અમન્દમત્તમાતઙ્ગ આસારાભ્યુદયાન્વિતઃ ।
ઇત્યાદિલક્ષણોપેતઃ સ્કન્ધાવારઃ પ્રશસ્યતે ॥

અમન્દાનન્દનિષ્યન્દમ્ અપાસ્તાન્યક્રિયાક્રમમ્ ।
જગજ્જન્મોત્સવે તસ્યાઃ પીતામૃતમિવાભવત્ ॥

અમન્દાનન્દાનાં ગલદલઘુસંતાપવિપદાં પદામ્ભોજદ્વન્દ્વં શિરસિ દધતામિન્દુશિરસઃ ।
કદા નઃ કાલિન્દીસલિલશબલૈરમ્બરસરિત્ તરઙ્ગૈરઙ્ગારીભવતિ ભવબન્ધેન્ધનચયઃ ॥

અમન્યતાસૌ કુસુમેષુ ગર્ભગં પરાગમન્ધંકરણં વિયોગિનામ્ ।
સ્મરેણ મુક્તેષુ પુરા પુરારયે તદઙ્ગભસ્મેવ શરેષુ સંગતમ્ ॥

અમરતરુકુસુમસૌરભ- સેવનસંપૂર્ણસકલકામસ્ય ।
પુષ્પાન્તરસેવેયં ભ્રમરસ્ય વિડમ્બના મહતી ॥

અમરયુવતિગીતોદ્ગ્રીવસારઙ્ગશૃઙ્ગો- લ્લિખિતશશિસુધામ્ભઃશાદ્વલારામરમ્યામ્ ।
સુરપતિગજગણ્ડસ્રંસિદાનામ્બુધારા પ્રસવસુરભિમાશાં વાસવીયાં નમામિ ॥

અમરીમુખસીધુમાધુરીણાં લહરી કાચન ચાતુરી કલાનામ્ ।
તરલીકુરુતે મનો મદીયં મુરલીનાદપરંપરા મુરારેઃ ॥

અમરુકકવિત્વડમરુક- નાદેન વિનુહ્નુતા ન સંચરતિ ।
શૃઙ્ગારભણિતિરન્યા ધન્યાનાં શ્રવણવિવરેષુ ॥

અમરૈરમૃતં ન પીતમબ્ધેર્ ન ચ હાલાહલમુલ્બણં હરેણ ।
વિધિના નિહિતં ખલસ્ય વાચિ દ્વયમેતદ્ બહિરેકમન્તરન્યત્ ॥

અમરૈર્ગતં મધુકરૈશ્ચલિતં પ્રવરૈઃ પ્રયાતમપિ પદ્મદૃશામ્ ।
વિભવે ગતે સકલમેવ ગતં ધ્રુવમેકમઞ્ચતિ યશઃ સરસઃ ॥

અમર્ત્યાઃ સન્તુ મર્ત્યા વા ચેતનાઃ સન્ત્વચેતનાઃ ।
દાનમેવ પુરસ્કૃત્ય સ્તૂયન્તે ભુવનૈસ્ત્રિભિઃ ॥

અમર્ષિણા કૃત્યમિવ ક્ષમાશ્રયં મદોદ્ધતેનેવ હિતં પ્રિયં વચઃ ।
બલીયસા તદ્વિધિનેવ પૌરુષં બલં નિરસ્તં ન રરાજ જિષ્ણુના ॥

અમર્ષોપગૃહીતાનાં મન્યુસંતપ્તચેતસામ્ ।
પરસ્પરાપકારેણ પુંસાં ભવતિ વિગ્રહઃ ॥

અમલમૃણાલકાણ્ડકમનીયકપોલરુચેસ્ તરલસલીલનીલનલિનપ્રતિફુલ્લદૃશઃ ।
વિકસદશોકશોણકરકાન્તિભૃતઃ સુતનોર્ મદલુલિતાનિ હન્ત લલિતાનિ હરન્તિ મનઃ ॥

અમલાત્મસુ પ્રતિફલન્નભિતસ્ તરુણીકપોલફલકેષુ મુહુઃ ।
વિસસાર સાન્દ્રતરમિન્દુરુચામ્ અધિકાવભાસિતદિશાં નિકરઃ ॥

અમલીમસમચ્છિદ્રમ્ અક્રૌર્યમતિસુન્દરમ્ ।
અદેયમપ્રતિગ્રાહ્યમ્ અહો જ્ઞાનં મહાધનમ્ ॥