મહાસુભાષિતસંગ્રહ · શ્લોક 2403-2422

અભ્યુન્નતા પુરસ્તાદ્ અવગાઢા જઘનગૌરવાત્ પશ્ચાત્ ।
દ્વારેઽસ્ય પાણ્ડુસિકતે પદપઙ્ક્તિર્દૃશ્યતેઽભિનવા ॥

અભ્યુન્નતેઽપિ જલદે જગદેકસાર- સાધારણપ્રણયહારિણિ હા યદેતે ।
ઉલ્લાસલાસ્યલલિતં તરવો ન યાન્તિ હે દાવપાવક સ તાવક એવ દોષઃ ॥

અભ્યુન્નતેવાઙ્ઘ્રિનખાઙ્કુરાણાં દ્યુતિર્વિરેજે હરિણી દૃશોઽસ્યાઃ ।
પુઙ્ખાવલી પઞ્ચશરા યુધાનાં લાવણ્યદર્પદ્વિગુણીકૃતેવ ॥

અભ્યુન્નતોઽસિ સલિલૈઃ પરિપૂરિતોઽસિ ત્વામર્થયન્તિ વિહગાસ્તૃષિતાસ્તથૈતે ।
કાલઃ પયોધર પરોપકૃતેસ્તવાયં ચણ્ડાનિલવ્યતિકરે ક્વ ભવાન્ ક્વ તે વા ॥

અભ્યુપયુક્તાઃ સદ્ભિર્ ગતાગતૈરહરહઃ પ્રખિન્દાનાઃ ।
કૃપણજનસંનિકર્ષં પ્રાપ્યાર્થાઃ પ્રસ્વપન્તીવ ॥

અભ્યુલ્લસન્તિ વિનિવારિતચન્દનાનામ્ એણીદૃશાં વપુષિ કુઙ્કુમપત્રલેખાઃ ।
અભ્યાગતાઃ કરસરોજપદારવિન્દ- સંરક્ષણાય કિરણા ઇવ તિગ્મભાનોઃ ॥

અભ્યુષ્ણાત્ સઘૃતાદન્નાદ્ અચ્છિદ્રાચ્ચૈવ વાસસઃ ।
અપરપ્રેષ્યભાવાચ્ચ ભૂય ઇચ્છન્ પતત્યધઃ ॥

અભ્યેત્ય યાચિતોઽપિ ત્યક્ત્વા લજ્જાં મયા વિગતલજ્જઃ ।
ચિચ્છેદૈષ મમાશાં સહસા પ્રતિષેધશસ્ત્રેણ ॥

અભ્રચ્છાયા ખલપ્રીતિઃ સમુદ્રાન્તે ચ મેદિની ।
અલ્પેનૈવ વિનશ્યન્તિ યૌવનાનિ ધનાનિ ચ ॥

અભ્રચ્છાયા ખલપ્રીતિર્ નવસસ્યાનિ યોષિતઃ ।
કિંચિત્કાલોપભોગ્યાનિ યૌવનાનિ ધનાનિ ચ ॥

અભ્રચ્છાયા ખલપ્રીતિર્ વેશ્યારાગો વિભૂતયઃ ।
મહીભુજાં પ્રસાદશ્ચ પઞ્ચૈતે ચઞ્ચલાઃ સ્મૃતાઃ ॥

અભ્રચ્છાયા તૃણાદગ્નિઃ ખલપ્રીતિઃ સ્થલે જલમ્ ।
વેશ્યારાગઃ કુમિત્રં ચ ષડેતે બુદ્બુદોપમાઃ ॥

અભ્રચ્છાયા તૃણાદગ્નિઃ પરાધીનં ચ યત્ સુખમ્ ।
અજ્ઞાનેષુ ચ વૈરાગ્યં ક્ષિપ્રમેતદ્ વિનશ્યતિ ॥

અભ્રધ્વાનૈર્મુખરિતદિશઃ શ્રેણયસ્તોયદાનાં ધારાસારૈર્ધરણિવલયં સર્વતઃ પ્લાવયન્તિ ।
તેન સ્નેહં વહતિ વિપુલં મત્સખીયુક્તમેતત્ ત્વમ્ નિઃસ્નેહો યદસિ તદિદં નાથ મે વિસ્મયાય ॥

અભ્રપુષ્પમપિ દિત્સતિ શીતં સાર્થિના વિમુખતા યદભાજિ ।
સ્તોકકસ્ય ખલુ ચઞ્ચુપુટેન મ્લાનિરુલ્લસતિ તદ્ઘનસંઘે ॥

અભ્રવૃન્દં વિશાખાન્તં પ્રસૂત્યન્તં ચ યૌવનમ્ ।
રાજ્યાન્તં નરકં તદ્વદ્ યાચનાન્તં હિ ગૌરવમ્ ॥

અભ્રૂવિલાસમસ્પૃષ્ટમદરાગં મૃગેક્ષણમ્ ।
ઇદં તુ નયનદ્વન્દ્વં તવ તદ્ગુણભૂષિતમ્ ॥

અમજ્જદાકણ્ઠમસૌ સુધાસુ પ્રિયં પ્રિયાયા વચનં નિપીય ।
દ્વિષન્મુખેઽપિ સ્વદતે સ્તુતિર્યા તન્મિષ્ટતા નેષ્ટમુખે ત્વમેયા ॥

અમદયન્મધુગન્ધસનાથયા કિસલયાધરસંગતયા મનઃ ।
કુસુમસંભૃતયા નવમલ્લિકા સ્મિતરુચા તરુચારુવિલાસિની ॥

અમનસ્કં ગતે ચિત્તે જાયતે કર્મણાં ક્ષયઃ ।
યથા ચિત્રપટે દગ્ધે દહ્યતે ચિત્રસંચયઃ ॥