મહાસુભાષિતસંગ્રહ · શ્લોક 2323-2342

અભિયુક્તો બલવતા તિષ્ઠન્ દુર્ગે પ્રયત્નવાન્ ।
તદ્બલીયસ્તરાહ્વાનં કુર્વીતાત્મવિમુક્તયે ॥

અભિયુક્તો યદા પશ્યેન્ ન કાંચિદ્ ગતિમાત્મનઃ ।
યુધ્યમાનસ્તદા પ્રાજ્ઞો મ્રિયતે રિપુણા સહ ॥

અભિયોક્તા બલી યસ્માદ્ અલબ્ધ્વા ન નિવર્તતે ।
ઉપહારાદૃતે તસ્માત્ સંધિરન્યો ન વિદ્યતે ॥

અભિરામેઽભિનિવેશં વિદધાના વિવિધલાભનિરપેક્ષા ।
ઉપહસ્યસે સુમધ્યે વિદગ્ધવારાઙ્ગનાવારૈઃ ॥

અભિલક્ષ્યં સ્થિરં પુણ્યં ખ્યાતં સદ્ભિર્નિષેવિતમ્ ।
સેવેત સિદ્ધિમન્વિચ્છઞ્ શ્લાઘ્યં વિન્ધ્યમિવેશ્વરમ્ ॥

અભિલષત ઉપાયં વિક્રમં કીર્તિલક્ષ્મ્યોર્ અસુગમમરિસૈન્યૈરઙ્કમભ્યાગતસ્ય ।
જનક ઇવ શિશુત્વે સુપ્રિયસ્યૈકસૂનોર્ અવિનયમપિ સેહે પાણ્ડવસ્ય સ્મરારિઃ ॥

અભિલષતિ ન ખલુ પુરુષઃ શ્રિયમપિ કીર્ત્યા વિનાકૃતાં કુશલઃ ।
ક્ષણિકાય વસ્તુને કસ્ ત્યજતીહ ચિરસ્થિરં શ્રેયઃ ॥

અભિલષતિ પદ્મયોનૌ નિઃસ્વવધૂનાં સુતાન્ સ્રષ્ટુમ્ ।
સ્વં સ્વં વિશઙ્કમાના વેપન્તે ક્રકચવર્ત્તિનો લોકાઃ ॥

અભિલષતોરનુભાવાન્ તિલોત્તમાયાઃ કિલોત્તમાનુભયોઃ ।
સુન્દોપસુન્દયોરપિ નાશો ભેદાદુદાહ્રિયતે ॥

અભિલષન્તિ તવાધરમાધુરીં તદિહ કિં હરિણાક્ષિ મુધા બુધાઃ ।
સુરસુધામધરીકુરુતે યતસ્ ત્વદધરોઽધરતામગમત્ તતઃ ॥

અભિલષસિ યદીન્દો વક્ત્રલક્ષ્મીં મૃગાક્ષ્યાઃ પુનરપિ સકૃદબ્ધૌ મજ્જ સંક્ષાલયાઙ્કમ્ ।
સુવિમલમથ બિમ્બં પારિજાતપ્રસૂનૈઃ સુરભય વદ નો ચેત્ ત્વં ક્વ તસ્યા મુખં ક્વ ॥

અભિલષિતાધિકવરદે પ્રણિપતિતજનાર્તિહારિણિ શરણ્યે ।
ચરણૌ નમામ્યહં તે વિદ્યાધરદેવતે ગૌરિ ॥

અભિવર્ષતિ યોઽનુપાલયન્ વિધિબીજાનિ વિવેકવારિણા ।
સ સદા ફલશાલિનીં ક્રિયાં શરદં લોક ઇવાધિતિષ્ઠતિ ॥

અભિવાદનશીલસ્ય નિત્યં વૃદ્ધોપસેવિનઃ ।
ચત્વારિ તસ્ય વર્ધન્ત આયુઃ પ્રજ્ઞા યશો બલમ્ ॥

અભિવાદયેત વૃદ્ધમ્ આસનં ચાસ્ય દર્શયેત્ ।
કૃતાઞ્જલિરુપાસીત ગચ્છન્તં પૃષ્ઠતોઽન્વિયાત્ ॥

અભિવાદ્ય યથા વૃદ્ધાન્ સન્તો ગચ્છન્તિ નિર્વૃતિમ્ ।
એવં સજ્જનમાક્રુશ્ય મૂર્ખો ભવતિ નિર્વૃતઃ ॥

અભિવીક્ષ્ય સામિકૃતમણ્ડનં યતીઃ કરરુદ્ધનીવિગલદંશુકાઃ સ્ત્રિયઃ ।
દધિરેઽધિભિત્તિ પટહપ્રતિસ્વનૈઃ સ્ફુટમટ્ટહાસમિવ સૌધપઙ્ક્તયઃ ॥

અભિશપ્તઃ પુણ્યકાર્યે પ્રવૃત્તોઽપિ ન સિદ્ધિભાક્ ।
ભર્ત્રાનુગમનોદ્યુક્તા રેણુકા જનમારિકા ॥

અભિશસ્તવત્ પ્રપશ્યન્તિ દરિદ્રં પાર્શ્વતઃ સ્થિતમ્ ।
દારિદ્ર્યં પાતિકં લોકે કસ્તચ્છંસિતુમર્હતિ ॥

અભિષિષેણયિષું ભુવનાનિ યઃ સ્મરમિવાખ્યત લોધ્રરજશ્ચયઃ ।
ક્ષુભિતસૈન્યપરાગવિપાણ્ડુર- દ્યુતિરયં તિરયન્નુદભૂદ્દિશઃ ॥