મહાસુભાષિતસંગ્રહ · શ્લોક 2303-2322

અભિમતવસ્તૂપહૃતા- વપિ ગુરુગર્વાદનાદરસ્તન્વ્યાઃ ।
સ્ખલિતેઽપિ પ્રિયસ્ય સં- યમતાડનમિત્યેવ બિબ્બોકઃ ॥

અભિમતસિદ્ધિરશેષા ભવતિ હિ પુરુષસ્ય પુરુષકારેણ ।
દૈવમિતિ યદપિ કથયસિ પુરુષગુણઃ સોઽપ્યદૃષ્ટાખ્યઃ ॥

અભિમન્ત્ર્ય શુચિવિધાનાદ્ આજ્યાઢ્યં હસ્તિકર્ણજં ચૂર્ણમ્ ।
યોઽશ્નાતિ સ હિ નરઃ સ્યાદ્ યથેષ્ટચેષ્ટોઽપિ દીર્ઘાયુઃ ॥

અભિમાનધનં યેષાં ચિરં જીવન્તિ તે નરાઃ ।
અભિમાનવિહીનાનાં કિં ધનેન કિમાયુષા ॥

અભિમાનધનસ્ય ગત્વરૈર્ અસુભિઃ સ્થાસ્નુ યશશ્ચિચીષતઃ ।
અચિરાંશુવિલાસચઞ્ચલા નનુ લક્ષ્મીઃ ફલમાનુષઙ્ગિકમ્ ॥

અભિમાનવતાં પુંસામ્ આત્મસારમજાનતામ્ ।
અન્ધાનામિવ દૃશ્યન્તે પતનાન્તાઃ પ્રવૃત્તયઃ ॥

અભિમાનવતાં બ્રહ્મન્ યુક્તાયુક્તવિવેકિનામ્ ।
યુજ્યતેઽવશ્યભોગ્યાનાં દુઃખાનામપ્રકાશનમ્ ॥

અભિમાનવતો મનસ્વિનઃ પ્રિયમુચ્ચૈઃ પદમારુરુક્ષતઃ ।
વિનિપાતનિવર્તનક્ષમં મતમાલમ્બનમાત્મપૌરુષમ્ ॥

અભિમાનિતભૂતેન સાનુબન્ધરસેન તુ ।
યતઃ સર્વેન્દ્રિયપ્રીતિઃ સ કામઃ પ્રોચ્યતે બુધૈઃ ॥

અભિમાનિનમુદ્ભ્રાન્તમ્ આત્મસંભાવિતં શઠમ્ ।
ક્રોધનં ચૈવ નૃપતિં વ્યસને ઘ્નન્તિ વૈરિણઃ ॥

અભિમુખગતે યસ્મિન્નેવ પ્રિયે બહુશો વદત્ય્ અવનતમુખં તૂષ્ણીમેવ સ્થિતં મૃગનેત્રયા ।
અથ કિલ બલાલ્લીલાલોલં સ એષ તથેક્ષિતઃ કથમપિ યથા દૃષ્ટ્યા મન્યે કૃતં શ્રુતિલઙ્ઘનમ્ ॥
અભિમુખમધુરતરેભ્યઃ પરાઙ્મુખાક્રોશનાત્ કુશીલેભ્યઃ ।
અભ્યન્તરકલુષેભ્યો ભેતવ્યં મિત્રશત્રુભ્યઃ ॥

અભિમુખનિહતસ્ય સતસ્ તિષ્ઠતુ તાવજ્જયોઽથ વા સ્વર્ગઃ ।
ઉભયબલસાધુવાદઃ શ્રવણમુખોઽસ્ત્યેવ ચાત્યર્થમ્ ॥

અભિમુખપતયાલુભિર્લલાટ- શ્રમસલિલૈરવિધૌતપત્રલેખઃ ।
કથયતિ પુરુષાયિતં વધૂનાં મૃદિતહિમદ્યુતિદુર્મનાઃ કપોલઃ ॥

અભિમુખપતિતૈર્ગુણપ્રકર્ષાદ્ અવજિતમુદ્ધતિમુજ્જ્વલાં દધાનૈઃ ।
તરુકિસલયજાલમગ્રહસ્તૈઃ પ્રસભમનીયત ભઙ્ગમઙ્ગનાનામ્ ॥

અભિમુખમુપયાતિ માં સ્મ કિંચિત્ ત્વમભિદધાઃ પટલે મધુવ્રતાનામ્ ।
મધુસુરભિમુખાબ્જગન્ધલબ્ધેર્ અધિકમધિ ત્વદનેન મા નિપાતિ ॥

અભિમુખાગતમાર્ગણધોરણિ- ધ્વનિતપલ્લવિતામ્બરગહ્વરે ।
વિતરણે ચ રણે ચ સમુદ્યતે ભવતિ કોઽપિ પરં વિરલઃ પરઃ ॥

અભિમુખે મયિ સંહૃતમીક્ષિતં હસિતમન્યનિમિત્તકૃતોદયમ્ ।
વિનયવારિતવૃત્તિરતસ્તયા ન વિવૃતો મદનો ન ચ સંવૃતઃ ॥

અભિમુનિ સહસા હૃતે પરસ્યા ઘનમરુતા જઘનાંશુકૈકદેશે ।
ચકિતમવસનોરુ સત્રપાયાઃ પ્રતિયુવતીરપિ વિસ્મયં નિનાય ॥

અભિયાતિ નઃ સતૃષ એષ ચક્ષુષો હરિરિત્યખિદ્યત નિતમ્બિનીજનઃ ।
ન વિવેદ યઃ સતતમેનમીક્ષતે ન વિતૃષ્ણતાં વ્રજતિ ખલ્વસાવપિ ॥

અભિયુક્તં બલવતા દુર્લભં હીનસાધનમ્ ।
હૃતસ્વં કામિનં ચોરમ્ આવિશન્તિ પ્રજાગરાઃ ॥