મહાસુભાષિતસંગ્રહ · શ્લોક 2283-2302

અભિનવવધૂરોષસ્વાદઃ કરીષતનૂનપાદ્ અસરલજનાશ્લેષક્રૂરસ્તુષારસમીરણઃ ।
ગલિતવિભવસ્યાજ્ઞેવાદ્ય દ્યુતિર્મસૃણા રવેર્ વિરહિવનિતાવક્ત્રૌપમ્યં બિભર્તિ નિશાકરઃ ॥

અભિનવવિષવલ્લીપાદપદ્મસ્ય વિષ્ણોર્ મદનમથનમૌલેર્માલતીપુષ્પમાલા ।
જયતિ જયપતાકા કાપ્યસૌ મોક્ષલક્ષ્મ્યાઃ ક્ષપિતકલિકલઙ્કા જાહ્નવી નઃ પુનાતુ ॥

અભિનવસેવકવિનયૈઃ પ્રાઘુણકોક્તૈર્વિલાસિનીરુદિતૈઃ ।
ધૂર્તજનવચનનિકરૈર્ ઇહ કશ્ચિદવઞ્ચિતો નાસ્તિ ॥

અભિનષતિ વૈનતેયં ચામરસહિતઃ સસત્યભામો યઃ ।
નારાયણઃ સ સાક્ષાદ્ વિબુધસમર્ચ્યઃ સદા જયતુ ॥

અભિન્નવેલૌ ગમ્ભીરાવ્ અમ્બુરાશિર્ભવાનપિ ।
અસાવઞ્જનસંકાશસ્ ત્વં તુ ચામીકરદ્યુતિઃ ॥

અભિન્નેષ્વપિ કાર્યેષુ ભિદ્યતે મનસઃ ક્રિયા ।
અન્યથૈવ સ્તનં પુત્રશ્ ચિન્તયત્યન્યથા પતિઃ ॥

અભિપતતિ ઘનં શૃણોતિ ગર્જાઃ સહતિ શિલાઃ સહતે તડિત્તરઙ્ગાન્ ।
વિધુવતિ ગરુતં રુતં વિધત્તે જલપૃષતે કિયતેઽપિ ચાતકોઽયમ્ ॥

અભિપ્રાયં યો વિદિત્વા તુ ભર્તુઃ સર્વાણિ કાર્યાણિ કરોત્યતન્દ્રીઃ ।
વક્તા હિતાનામનુરક્ત આર્યઃ શક્તિજ્ઞ આત્મેવ હિ સોઽનુકમ્પ્યઃ ॥

વાક્યં તુ યો નાદ્રિયતેઽનુશિષ્ટઃ પ્રત્યાહ યશ્ચાપિ નિયુજ્યમાનઃ ।
પ્રજ્ઞાભિમાની પ્રતિકૂલવાદી ત્યાજ્યઃ સ તાદૃક્ત્વરયૈવ ભૃત્યઃ ॥

અભિપ્રાયાનુસારેણ પ્રકટીકુરુતે પ્રિયમ્ ।
અહો મહાપ્રભાવાનાં ભૂપતીનાં વસુંધરા ॥

અભિપ્રેતાર્થસિદ્ધ્યર્થં પૂજિતો યઃ સુરૈરપિ ।
સર્વવિઘ્નચ્છિદે તસ્મૈ ગણાધિપતયે નમઃ ॥

અભિભવતિ મનઃ કદમ્બવાયૌ મદમધુરે ચ શિખણ્ડિનાં નિનાદે ।
જન ઇવ ન ધૃતેશ્ચચાલ જિષ્ણુર્ ન હિ મહતાં સુકરઃ સમાધિભઙ્ગઃ ॥

અભિભૂતોઽપિ નોત્સાહં જહ્યાજ્જાતુ સ્વસિદ્ધયે ।
નષ્ટાઙ્ગોઽપિ ગ્રસત્યેવ સૈંહિકેયો મુહુર્દ્વિષૌ ॥

અભિભૂતોઽપ્યવજ્ઞાતો યો રાજ્ઞાં દ્વારિ તિષ્ઠતિ ।
સ તુ રાજ્ઞાં શ્રિયં ભુઙ્ક્તે નાભિમાની કદાચન ॥

અભિભૂય વિભૂતિમાર્તવીં મધુગન્ધાતિશયેન વીરુધામ્ ।
નૃપતેરમરસ્રગાપ સા દયિતોરુસ્તનકોટિસુસ્થિતમ્ ॥

અભિભૂય સતામવસ્થિતિં જડજેષુ પ્રતિપાદ્ય ચ શ્રિયમ્ ।
જગતીપરિતાપકૃત્ કથં જલધૌ નાવપતેદસૌ રવિઃ ॥

અભિમતફલદાતા ત્વં ચ કલ્પદ્રુમશ્ચ પ્રકટમિહ વિશેષં કંચનોદાહરામઃ ।
કથમિહ મધુરોક્તિપ્રેમસંમાનમિશ્રં તુલયતિ સુરશાખી દેવ દાનં ત્વદીયમ્ ॥

અભિમતફલસિદ્ધિસિદ્ધમન્ત્રા- વલિ બલિજિત્પરમેષ્ઠિનોરુપાસ્યે ।
ભગવતિ મદનારિનારિ વન્દે નિખિલનગાધિપભર્તૃદારિકે ત્વામ્ ॥

અભિમતમભિતઃ કૃતાઙ્ગભઙ્ગા કુચયુગમુન્નતિવિત્તમુન્નમય્ય ।
તનુરભિલષિતં ક્લમચ્છલેન વ્યવૃણુત વેલ્લિતબાહુવલ્લરીકા ॥

અભિમતમહામાનગ્રન્થિપ્રભેદપટીયસી ગુરુતરગુણગ્રામામ્ભોજસ્ફુટોજ્જ્વલચન્દ્રિકા ।
વિપુલવિલસલ્લજ્જાવલ્લીવિદારકુઠારિકા જઠરપિઠરી દુઃપૂરેયં કરોતિ વિડમ્બનામ્ ॥