મહાસુભાષિતસંગ્રહ · શ્લોક 2263-2282

અભિતિગ્મરશ્મિ ચિરમાવિરમા- દવધાનખિન્નમનિમેષતયા ।
વિગલન્મધુવ્રતકુલાશ્રુજલં ન્યમિમીલદબ્જનયનં નલિની ॥

અભિતો નિતરાં સલિલં જલદે દાતું સમુદ્યતે ભવતિ ।
તદપિ બહુલમલ્પં વા પાત્રાધીનં મતં પતનમ્ ॥

અભિત્તાવુત્થિતે ચિત્રે દૃશ્યતે ભિત્તિરાતતા ।
અહો વિચિત્રા માયેયં ભગ્નં તુણ્ડં શિલાપ્લુતા ॥

અભિદ્રોહેણ ભૂતાનામ્ અર્જયન્ ગત્વરીઃ શ્રિયઃ ।
ઉદન્વાનિવ સિન્ધૂનામ્ આપદામેતિ પાત્રતામ્ ॥

અભિધાય તદા તદપ્રિયં શિશુપાલોઽનુશયં પરં ગતઃ ।
ભવતોઽભિમનાઃ સમીહતે સરુષઃ કર્તુમુપેત્ય માનનામ્ ॥

અભિધાવતિ માં મૃત્યુર્ અયમુદ્ગૂર્ણમુદ્ગરઃ ।
કૃપણં પુણ્ડરીકાક્ષ રક્ષ માં શરણાગતમ્ ॥

અભિધ્યાલુ પરસ્વેષુ નેહ નામુત્ર નન્દતિ ।
તસ્માદભિધ્યા સંત્યાજ્યા સર્વદાભીપ્સતા સુખમ્ ॥

અભિનયશસ્તૌ હસ્તૌ પાદૌ પરિભૂતકિસલયૌ સલયૌ ।
અઙ્ગં રઞ્જિતરઙ્ગં નૃત્તં પુંભાવશાલિ સમવૃત્તમ્ ॥

અભિનયાન્ પરિચેતુમિવોદ્યતા મલયમારુતકમ્પિતપલ્લવા ।
અમદયત્ સહકારલતા મનઃ સકલિકા કલિકામજિતામપિ ॥

અભિનવં ગલિતાંશુકદર્શિતં દધતિ યત્સ્તનયોરુપરિસ્થિતમ્ ।
વસનમણ્ડલમણ્ડનમઙ્ગનાસ્ તદધિકં પ્રતિપક્ષમનોજ્વરમ્ ॥

અભિનવકુશસૂત્રસ્પર્ધિ કર્ણે શિરીષં કુરવકપરિધાનં પાટલાદામ કણ્ઠે ।
તનુસરસજલાર્દ્રોન્મીલિતઃ સુન્દરીણાં દિનપરિણતિજન્મા કોઽપિ વેશશ્ચકાસ્તિ ॥

અભિનવજવાપુષ્પસ્પર્ધી તવાધરપલ્લવો હસિતકુસુમોન્મેષચ્છાયાદરચ્છુરિતાન્તરઃ ।
નયનમધુપશ્રેણીં યૂનામનારતમાહરંસ્ તરુણિ તનુતે તારુણ્યશ્રીર્વિલાસવતંસતામ્ ॥

અભિનવનલિનીકિસલય- મૃણાલવલયાદિ દવદહનરાશિઃ ।
સુભગ કુરઙ્ગદૃશોઽસ્યા વિધિવશતસ્ત્વદ્વિયોગપવિપાતે ॥

અભિનવનલિનીવિનોદલુબ્ધો મુકુલિતકૈરવિણીવિયોગભીરુઃ ।
ભ્રમતિ મધુકરોઽયમન્તરાલે શ્રયતિ ન પઙ્કજિનીં કુમુદ્વતીં વા ॥

અભિનવનવનીતપ્રીતમાતામ્રનેત્રં વિકચનલિનલક્ષ્મીસ્પર્ધિ સાનન્દવક્ત્રમ્ ।
હૃદયભવનમધ્યે યોગિભિર્ધ્યાનગમ્યં નવગગનતમાલશ્યામલં કંચિદીડે ॥

અભિનવનવનીતસ્નિગ્ધમાપીતદુગ્ધં દધિકણપરિદિગ્ધં મુગ્ધમઙ્ગં મુરારેઃ ।
દિશતુ ભુવનકૃચ્છ્રચ્છેદિતાપિચ્છગુચ્છચ્ છવિ નવશિખિપિચ્છાલાઞ્છિતં વાઞ્છિતં વઃ ॥

અભિનવપલ્લવરશના શિશિરતરતુષારજલમઙ્ગલસ્નાતા ।
પુષ્પવતી ચૂતલતા પ્રિયેવ દદૃશે ફલાભિમુખી ॥

અભિનવપુલકાલીમણ્ડિતા ગણ્ડપાલી નિગદતિ વિનિગૂઢાનન્દહિન્દોલિચેતઃ ।
સુદતિ વદતિ પુણ્યૈઃ કસ્ય ધન્યૈર્મનોજ- પ્રસરમસકૃદેતચ્ચાપલં લોચનસ્ય ॥

અભિનવમુખમુદ્રં ક્ષુદ્રકૂપોપવીતં પ્રશિથિલવિપુલત્વં જ્વાલકોચ્છવાસિપાલમ્ ।
પરિણતિપરિપાટિવ્યાકૃતેનારુણિમ્ના હતહરિતિમશેષં નાગરઙ્ગં ચકાસ્તિ ॥

અભિનવયવસશ્રીશાલિનિ ક્ષ્માતલેઽસ્મિન્ અતિશયપરભાગં ભેજિરે જિષ્ણુગોપાઃ ।
કુવલયશયનીયે મુગ્ધમુગ્ધેક્ષણાયા મણય ઇવ વિમુક્તાઃ કામકેલિપ્રસઙ્ગાત્ ॥