મહાસુભાષિતસંગ્રહ · શ્લોક 2243-2262

અભગ્નવૃત્તાઃ પ્રસભાદ્ આકૃષ્ટા યૌવનોદ્ધતૈઃ ।
ચક્રન્દુરુચ્ચકૈર્મુષ્ટિગ્રાહ્યમધ્યા ધનુર્લતા ॥

અભયં સત્ત્વસંશુદ્ધિર્ જ્ઞાનયોગવ્યવસ્થિતિઃ ।
દાનં દમશ્ચ યજ્ઞશ્ચ સ્વાધ્યાયસ્તપ આર્જવમ્ ॥

અહિંસા સત્યમક્રોધસ્ ત્યાગઃ શાન્તિરપૈશુનમ્ ।
દયા ભૂતેષ્વલોલુપ્ત્વં માર્દવં હ્રીરચાપલમ્ ॥

તેજઃ ક્ષમા ધૃતિઃ શૌચમ્ અદ્રોહો નાતિમાનિતા ।
ભવન્તિ સંપદં દૈવીમ્ અભિજાતસ્ય ભારત ॥

દમ્ભો દર્પોઽતિમાનશ્ચ ક્રોધઃ પારુષ્યમેવ ચ ।
અજ્ઞાનં ચાભિજાતસ્ય પાર્થ સંપદમાસુરીમ્ ॥

દૈવી સંપદ્વિમોક્ષાય નિબન્ધાયાસુરી મતા ॥

અભયં સર્વભૂતેભ્યો દત્ત્વા યશ્ચરતે મુનિઃ ।
તસ્યાપિ સર્વભૂતેભ્યો ન ભયં વિદ્યતે ક્વચિત્ ॥

અભયં સર્વભૂતેભ્યો યો દદાતિ દયાપરઃ ।
અભયં તસ્ય ભૂતાનિ દદતીત્યનુશુશ્રુમઃ ॥

અભયં સર્વભૂતેભ્યો યો દદાતિ દયાપરઃ ।
તસ્ય દેહવિમુક્તસ્ય ક્ષય એવ ન વિદ્યતે ॥

અભયમભયં દેવ બ્રૂમસ્તવાસિલતાવધૂઃ કુવલયદલશ્યત્મા શત્રોરુરઃસ્થલશાયિની ।
સમયસુલભાં કીર્તિં ભવ્યામસૂત સુતામસાવ્ અપિ રમયિતું રાગાન્ધેવ ભ્રમત્યખિલં જગત્ ॥

અભયસ્ય હિ યો દાતા સ પૂજ્યઃ સતતં નૃપઃ ।
સત્રં હિ વર્ધતે તસ્ય સદૈવાભયદક્ષિણમ્ ॥

અભયસ્યૈવ યો દાતા તસ્યૈવ સુમહત્ફલમ્ ।
ન હિ પ્રાણસમં દાનં ત્રિષુ લોકેષુ વિદ્યતે ॥

અભવદભિનવપ્રરોહભાજાં છવિપરિપાટિષુ યઃ પુરાઙ્ગકાનામ્ ।
અહહ વિરહવૈકૃતે સ તસ્યાઃ ક્રશિમનિ સંપ્રતિ દૂર્વયા વિવાદઃ ॥

અભવ્યજીવો વચનં પઠન્નપિ જિનસ્ય મિથ્યાત્વવિષં ન મુઞ્ચતિ ।
યથા વિષં રૌદ્રવિષોઽતિ પન્નગઃ સશર્કરં ચારુ પયઃ પિબન્નપિ ॥

અભાવિ સિન્ધ્વા સંધ્યાભ્રસદૃગ્રુધિરતોયયા ।
હૃતે યોદ્ધું જનઃ પાંશૌ સ દૃગ્રુધિ રતો યયા ॥

અભાવે ન નરસ્તસ્માદ્ ભાવઃ સર્વત્ર કારણમ્ ।
ચિત્તં શોધય યત્નેન કિમન્યૈર્બાહ્યશોધનૈઃ ॥

અભાવે પટ્ટસૂત્રસ્ય હારિણી સ્નાયુરિષ્યતે ।
ગુણાર્થમથવા ગ્રાહ્યાઃ સ્નાયવો મહિષીગવામ્ ॥
અભિગમ્યાસ્તે સદ્ભિર્ વ્યપગતમાનાવમાનદોષાશ્ચ ।
યે સ્વગૃહમુપગતાનાં શ્રમમુપચારૈર્વ્યપનયન્તિ ॥

અભિજનવતો ભર્તુઃ શ્લાઘ્યે સ્થિતા ગૃહિણીપદે વિભવગરુભિઃ કૃત્યૈરસ્ય પ્રતિક્ષણમાકુલા ।
તનયમચિરાત્ પ્રાચીવાર્કં પ્રસૂય ચ પાવનં મમ વિરહજાં ન ત્વં વત્સે શુચં ગણયિષ્યસિ ॥

અભિજાતજનવ્યથાવહા બહલોષ્મપ્રસરા વિદાહિનઃ ।
પ્રખલા ઇવ દૃષ્ટિમાગતા ભુવિ તાપાય નિદાઘવાસરાઃ ॥

અભિતાપસંપદમથોષ્ણરુચિર્ નિજતેજસામસહમાન ઇવ ।
પયસિ પ્રપિત્સુરપરામ્બુનિધેર્ અધિરોઢુમસ્તગિરિમભ્યપતત્ ॥