મહાસુભાષિતસંગ્રહ · શ્લોક 2143-2162

અપ્યુન્નતપદારૂઢઃ પૂજ્યાન્ નૈવાપમાનયેત્ ।
નહુષઃ શક્રતાં પ્રાપ્ય ચ્યુતોઽગસ્ત્યાવમાનનાત્ ॥

અપ્યુન્મત્તાત્ પ્રલપતો બાલાચ્ચ પરિસર્પતઃ ।
સર્વતઃ સારમાદદ્યાદ્ અશ્મભ્ય ઇવ કાઞ્ચનમ્ ॥

અપ્યુપાયૈસ્ત્રિભિસ્તાત યોઽર્થઃ પ્રાપ્તું ન શક્યતે ।
તસ્ય વિક્રમકાલાંસ્તાન્ યુક્તાનાહુર્મનીષિણઃ ॥

અપ્યુદ્દામવ્યસનસરણેઃ સંગમે કામુકાનાં ભદ્રં ભદ્રે ભુવનજયિનસ્ત્વત્કલાકૌલશસ્ય ।
અપ્યુત્સાહપ્રચુરસુહૃદઃ કામકેલીનિવાસાઃ પ્રૌઢોત્સાહાસ્તવ સુવદને સ્વસ્તિમન્તો વિલાસાઃ ॥

અપ્યેકવંશજનુષોઃ પશ્યત પૂર્ણત્વતુચ્છતાભાજોઃ ।
જ્યાકાર્મુકયોઃ કશ્ચિદ્ ગુણભૂતઃ કશ્ચિદપિ ભર્તા ॥

અપ્યેતદ્રજનીમયં જગદથો નિદ્રામયી સા નિશા નિદ્રા સ્વપ્નમયી ભવેદથ ચ સ સ્વપ્નો મૃગાક્ષીમયઃ ।
સેયં માનમયી મમ પ્રિયતમા તચ્ચાટુચેષ્ટામયો માદૃક્ ક્વેતિ સમીહિતૈકવિધયે સંકલ્પ તુભ્યં નમઃ ॥

અપ્યેવ દહનં સ્પૃષ્ટ્વા વને તિષ્ઠન્તિ પાદપાઃ ।
રાજદોષપરામૃષ્ટાસ્ તિષ્ઠન્તે નાપરાધિનઃ ॥

અપ્યૌત્સુક્યે મહતિ દયિતપ્રાર્થનાસુ પ્રતીપાઃ કાઙ્ક્ષન્ત્યોઽપિ વ્યતિકરસુખં કાતરાઃ સ્વાઙ્ગદાને ।
આબાધ્યન્તે ન ખલુ મદનેનૈવ લબ્ધાન્તરત્વાદ્ આબાધન્તે મનસિજમપિ ક્ષિપ્તકાલાઃ કુમાર્યઃ ॥

અપ્રકટવર્તિતસ્તન- મણ્ડલિકાનિભૃતચક્રદર્શિન્યઃ ।
આવેશયન્તિ હૃદયં સ્મરચર્યાગુપ્તયોગિન્યઃ ॥

અપ્રકટીકૃતશક્તિઃ શક્તોઽપિ જનાત્ તિરસ્ક્રિયાં લભતે ।
નિવસન્નન્તર્દારુણિ લઙ્ઘ્યો વહ્નિર્ન તુ જ્વલિતઃ ॥

અપ્રગલ્ભસ્ય યા વિદ્યા કૃપણસ્ય ચ યદ્ધનમ્ ।
યચ્ચ બાહુબલં ભીરોર્ વ્યર્થમેતત્ ત્રયં ભુવિ ॥

અપ્રગલ્ભાઃ પદન્યાસે જનનીરાગહેતવઃ ।
સન્ત્યેકે બહુલાલાપાઃ કવયો બાલકા ઇવ ॥

અપ્રણોદ્યોઽતિથિઃ સાયં સૂર્યોઢો ગૃહમેધિના ।
કાલે પ્રાપ્તસ્ત્વકાલે વા નાસ્યાનશ્નન્ ગૃહે વસેત્ ॥

અપ્રણાદ્યોઽતિથિઃ સાયં સૂર્યોઢો ગૃહમેધિનામ્ ।
પૂજયા તસ્ય દેવત્વં પ્રયાન્તિ ગૃહમેધિનઃ ॥

અપ્રતિકૃત્યાત્માનં સહસાનર્થેષુ ન પ્રવર્તેત ।
શિરસિ ધૃતેઽમૃતકિરણે વિષમઘસદ્વિષમનેત્રોઽપિ ॥

અપ્રતિબુદ્ધે શ્રોતરિ વક્તુર્વાક્યં પ્રયાતિ વૈફલ્યમ્ ।
નયનવિહીને ભર્તરિ લાવણ્યમિવેહ ખઞ્જનાક્ષીણામ્ ॥

અપ્રતિષ્ઠાશ્ચ યે કેચિદ્ અધર્મશરણાશ્ચ યે ।
તેષાં પ્રતિષ્ઠા ગઙ્ગેહ શરણં શર્મ વર્મ ચ ॥

અપ્રત્યક્ષાણિ શાસ્ત્રાણિ વિવાદસ્તત્ર કેવલમ્ ।
પ્રત્યક્ષં જ્યૌતિષં શાસ્ત્રં ચન્દ્રાર્કૌ યત્ર સાક્ષિણૌ ॥

અપ્રત્યાકલિતપ્રભાવવિભવે સર્વાશ્રયામ્ભોનિધૌ વાસો નાલ્પતપઃફલં યદપરં દોષોઽયમેકો મહાન્ ।
શમ્બૂકોઽપિ યદત્ર દુર્લભતરૈ રત્નૈરનર્ઘૈઃ સહ સ્પર્ધામેકનિવાસકારણવશાદેકાન્તતો વાઞ્છતિ ॥

અપ્રદાતા સમૃદ્ધોઽસૌ દરિદ્રશ્ચ મહામનાઃ ।
અશ્રુતશ્ચ સમુન્નદ્ધસ્ તમાહુર્મૂઢચેતસમ્ ॥