મહાસુભાષિતસંગ્રહ · શ્લોક 2003-2022

અપાર્થકમનાયુષ્યં ગોવિષાણસ્ય ભક્ષણમ્ ।
દન્તાશ્ચ પરિઘૃષ્યન્તે રસશ્ચાપિ ન લભ્યતે ॥

અપાર્થેતરયુક્તાનાં વ્યાસસંગ્રહશાલિનામ્ ।
અપિ ગોપાલગીતાનાં નિવેશો નિગમાદિષુ ॥

અપાસ્તપાથેયસુધોપયોગૈસ્ ત્વચ્ચુમ્બિનૈવ સ્વમનોરથેન ।
ક્ષુધં ચ નિર્વાપયતા તૃષં ચ સ્વાદીયસાધ્વા ગમિતઃ સુખં તૈઃ ॥

અપાસ્તપાથોરુહિ શાયિતં કરે કરોતિ લીલાકમલં કિમાનનમ્ ।
તનોષિ હારં કિયદસ્રુણઃ સ્રવૈર્ અદોષનિર્વાસિતભૂષણે હૃદિ ॥

અપાસ્તસ્તારાભિર્વિધન ઇવ કામી યુવતિભિર્ મધુચ્છત્રચ્છાયાં સ્પૃશતિ શશલક્ષ્મા પરિણતઃ ।
અયં પ્રાચીકર્ણાભરણરચનાશોકકુસુમ- ચ્છટાલક્ષ્મીચૌરઃ કલયતિ રવિઃ પૂર્વમચલમ્ ॥

અપાસ્ય લક્ષ્મીહરણોત્થવૈરિતામ્ અચિન્તયિત્વા ચ તદદ્રિમન્થનમ્ ।
દદૌ નિવાસં હરયે મહોદધિર્ વિમત્સરા ધીરધિયાં હિ વૃત્તયઃ ॥

અપિ કલ્પાનિલસ્યૈવ તરઙ્ગસ્ય મહોદધેઃ ।
શક્યતે પ્રસરો રોદ્ધું નાનુરક્તસ્ય ચેતસઃ ॥

અપિ કાપુરુષો ભીરુઃ સ્યાચ્ચેન્નૃપતિસેવકઃ ।
તથાપિ ન પરાભૂતિં જનાદાપ્નોતિ માનવઃ ॥

અપિ કાપુરુષો ભીરુઃ સ્યાચ્ચેન્નૃપતિસેવકઃ ।
યદાપ્નોતિ ફલં લોકાત્ તસ્યાંશમપિ નો ગુણી ॥

અપિ કાપુરુષો માર્ગે દ્વિતીયઃ ક્ષેમકારકઃ ।
કર્કટેન દ્વિતીયેન જીવિતં પરિરક્ષિતમ્ ॥

અપિ કાલસ્ય યઃ કાલઃ સોઽપિ કાલમપેક્ષતે ।
કર્તું જગન્તિ હન્તું વા કાલસ્તેન જગત્પ્રભુઃ ॥

અપિ કીર્ત્યર્થમાયાન્તિ નાશં સદ્યોઽતિમાનિનઃ ।
ન ચેચ્છન્ત્યયશોમિશ્રમ્ અપ્યેવાનન્ત્યમાયુષઃ ॥

અપિ કુઞ્જરકર્ણાગ્રાદ્ અપિ પિપ્પલપલ્લવાત્ ।
અપિ વિદ્યુદ્વિલસિતાદ્ વિલોલં લલનામનઃ ॥

અપિ ક્રિયાર્થં સુલભં સમિત્કુશં જલાન્યપિ સ્નાનવિધિક્ષમાણિ તે ।
અપિ સ્વશક્ત્યા તપસિ પ્રવર્તસે શરીરમાદ્યં ખલુ ધર્મસાધનમ્ ॥

અપિ ઘોરાપરાધસ્ય ધર્મમાશ્રિત્ય તિષ્ઠતઃ ।
સ હિ પ્રચ્છાદ્યતે દોષઃ શૈલો મેઘૈરિવાસિતૈઃ ॥

અપિ ચાપ્યફલં કર્મ પશ્યામઃ કુર્વતો જનાન્ ।
નાન્યથા હ્યભિજાનન્તિ વૃત્તિં લોકે કથંચન ॥

અપિ ચિન્તામણિશ્ચિન્તાપરિશ્રમમપેક્ષતે ।
ઇદં ત્વચિન્તિતં મન્યે કૃતમાશ્ચર્યમાર્યયા ॥

અપિ ચેત્ સુદુરાચારો ભજતે મામનન્યભાક્ ।
સાધુરેવ સ મન્તવ્યઃ સમ્યગ્ વ્યવસિતો હિ સઃ ॥

અપિ ચેદસિ પાપેભ્યઃ સર્વેભ્યઃ પાપકૃત્તમઃ ।
સર્વં જ્ઞાનપ્લવેનૈવ વૃજિનં સંતરિષ્યસિ ॥

અપિ જનકસુતાયાસ્તચ્ચ તચ્ચાનુરૂપં સ્ફુટમિહ શિશુયુગ્મે નૈપુણોન્નેયમસ્તિ ।
નનુ પુનરિવ તન્મે ગોચરીભૂતમક્ષ્ણોર્ અભિનવશતપત્રશ્રીમદાસ્યં પ્રિયાયાઃ ॥