મહાસુભાષિતસંગ્રહ · શ્લોક 1943-1962

અપરોક્ષધનો ગમ્યઃ શ્રીમાનપિ નાન્યથેતિ નિર્દિષ્ટમ્ ।
કન્દર્પશાસ્ત્રકારૈઃ કુતઃ કથા લુપ્તવિભવસ્ય ॥

અપર્ણેયં ભૂભૃદ્વનમટતિ વલ્કામ્બરધરા જટાલો દિગ્વાસાઃ શિખરિણિ શિવોઽયં નિવસતિ ।
ઇતિ ભ્રાન્ત્યાન્યોઽન્યં ક્ષણમિલિતયોઃ ક્ષોણિતિલક દ્વિષદ્દમ્પત્યોસ્તે શિવ શિવ ભવન્તિ પ્રણતયઃ ॥

અપર્ણૈવ લતા સેવ્યા વિદ્વદ્ભિરિતિ મે મતિઃ ।
યયા વૃતઃ પુરાણોઽપિ સ્થાણુઃ સૂતેઽમૃતં ફલમ્ ॥

અપર્યન્તસ્ય કાલસ્ય કિયાનંશઃ શરચ્છતમ્ ।
તન્માત્રપરમાયુર્યઃ સ કથં સ્વપ્તુમર્હતિ ॥

અપર્યાપ્તભુજાયામઃ સખેદોઽસ્યાઃ સખીજનઃ ।
શ્રોણ્યાં કથંચિત્ કુરુતે રશનાદામબન્ધનમ્ ॥

અપવર્જિતવિપ્લવે શુચૌ હૃદયગ્રાહિણિ મઙ્ગલાસ્પદે ।
વિમલા તવ વિસ્તરે ગિરાં મતિરાદર્શ ઇવાભિદૃશ્યતે ॥

અપવાદાદભીતસ્ય સમસ્ય ગુણદોષયોઃ ।
અસદ્વૃત્તેરહો વૃત્તં દુર્વિભાવં વિધેરિવ ॥

અપવાદો ભવેદ્ યેન યેન વિપ્રત્યયો ભવેત્ ।
નરકે ગમ્યતે યેન તદ્ બુધઃ કથમાચરેત્ ॥

અપશઙ્કમઙ્કપરિવર્તનોચિતાશ્ ચલિતાઃ પુરઃ પતિમુપૈતુમાત્મજાઃ ।
અનુરોદિતીવ કરુણેન પત્રિણાં વિરુતેન વત્સલતયૈષ નિમ્નગાઃ ॥

અપશાસ્ત્રધનો રાજા સંચયં નાધિગચ્છતિ ।
અસ્થાને ચાસ્ય તદ્વિત્તં સર્વમેવ વિનશ્યતિ ॥

અપશૂલં તમાસાદ્ય લવણં લક્ષ્મણાનુજઃ ।
રુરોધ સંમુખીનો હિ જયો રન્ધ્રપ્રહારિણામ્ ॥

અપશોકમનાઃ કુટુમ્બિનીમ્ અનુગૃહ્ણીષ્વ નિવાપદત્તિભિઃ ।
સ્વજનાશ્રુ કિલાતિસંતતં દહતિ પ્રેતમિતિ પ્રચક્ષતે ॥

અપશ્ચાત્તાપકૃત્ સમ્યગ્ અનુબન્ધિફલપ્રદઃ ।
અદીર્ઘકાલોઽભીષ્ટશ્ચ પ્રશસ્તો મન્ત્ર ઉચ્યતે ॥

અપશ્યદ્ભિરિવેશાનં રણાન્નિવવૃતે ગણૈઃ ।
મુહ્યત્યેવ હિ કૃચ્છ્રેષુ સંભ્રમજ્વલિતં મનઃ ॥

અપશ્યદ્ભિર્મહાસ્વાદાન્ ભાવાન્ સ્વાદ્વવિવેકિભિઃ ।
કિં જ્ઞેયમશનાદન્યત્ ક્ષ્માપૈરન્ધૈરિવોક્ષભિઃ ॥

અપસરણમેવ યુક્તં મૌનં વા તત્ર રાજહંસસ્ય ।
કટુ રટતિ નિકટવર્તી વાચાટષ્ટિટ્ટિભો યત્ર ॥

અપસરતિ ન ચક્ષુષો મૃગાક્ષી રજનિરિયં ચ ન યાતિ નૈતિ નિદ્રા ।
પ્રહરતિ મદનોઽપિ દુઃખિતાનાં બત બહુશોઽભિમુખીભવન્ત્યપાયાઃ ॥

અપસર પૃથિવિ સમુદ્રાઃ સંવૃણુતામ્બૂનિ ભૂધરા નમત ।
વામનહરિલઘુતુન્દે જગતાં કલહઃ સ વઃ પાયાત્ ॥

અપસર મધુકર દૂરં પરિમલબહુલેઽપિ કેતકીકુસુમે ।
ઇહ નહિ મધુલવલાભો ભવતિ પરં ધૂલિધૂસરં વદનમ્ ॥

અપસર સખે દૂરાદસ્માત્ કટાક્ષવિષાનલાત્ પ્રકૃતિવિષમાદ્ યોષિત્સર્પાદ્ વિલાસફણાભૃતઃ ।
ઇતરફણિના દષ્ટઃ શક્યશ્ચિકિત્સિતુમૌષધૈશ્ ચટુલવનિતાભોગિગ્રસ્તં ત્યજન્તિ હિ મન્ત્રિણઃ ॥