મહાસુભાષિતસંગ્રહ · શ્લોક 1743-1762

અન્યકાલપરિહાર્યમજસ્રં તદ્દ્વયેન વિદધે દ્વયમેવ ।
ધૃષ્ટતા રહસિ ભર્તૃષુ તાભિર્ નિર્દયત્વમિતરૈરબલાસુ ॥

અન્યક્ષેત્રે કૃતં પાપં પુણ્યક્ષેત્રે વિનશ્યતિ ।
પુણ્યક્ષેત્રે કૃતં પાપં વજ્રલેપો ભવિષ્યતિ ॥

અન્યતો નય મુહૂર્તમાનનં ચન્દ્ર એષ સરલે કલામયઃ ॥
મા કદાચન કપોલયોર્મલં સંક્રમય્ય સમતાં સ નેષ્યતિ ॥

અન્યતો યદિ નિજોપચિકીર્ષા માનહાનિરિતિ ભીતિરનીતિઃ ।
શ્રીધરોઽપિ હિ બલે શ્રિયમિચ્છન્ માનમાતનુત વામનમેવ ॥

અન્યત્કૃત્યં મનુજશ્ ચિન્તયતિ દિવાનિશં વિશુદ્ધધિયા ।
વેધા વિદધાત્યન્યત્ સ્વામીવ ન શક્યતે ધર્તુમ્ ॥

અન્યત્ર દેશે ઘટિતા જગન્તિ ગ્રસિષ્યતે વિશ્વસૃજેતિ મત્વા ।
સંકોચયિત્વા કિમુ પાદમૂલ- દ્વયાન્તરાલે નિહિતાસ્તિ યોનિઃ ॥

અન્યત્ર ભીષ્માદ્ ગાઙ્ગેયાદ્ અન્યત્ર ચ હનૂમતઃ ।
હરિણીખુરમાત્રેણ ચર્મણા મોહિતં જગત્ ॥

અન્યત્ર યાપિતનિશં પરિલોહિતાઙ્ગમ્ અન્યાઙ્ગનાગતમિવાગતમુષ્ણરશ્મિમ્ ।
પ્રાતર્નિરીક્ષ્ય કુપિતેવ હિ પદ્મિનીયમ્ ઉત્ફુલ્લહલ્લકસુલોહિતલોચનાભૂત્ ॥

અન્યત્ર યૂયં કુસુમાવચાયં કુરુધ્વમત્રાસ્મિ કરોમિ સખ્યઃ ।
નાહં હિ દૂરં ભ્રમિતું સમર્થા પ્રસીદતાયં રચિતોઽઞ્જલિર્વઃ ॥

અન્યત્ર વ્રજતીતિ કા ખલુ કથા નાપ્યસ્ય તાદૃક્ સુહૃદ્ યો માં નેચ્છતિ નાગતશ્ચ હહહા કોઽયં વિધેઃ પ્રક્રમઃ ।
ઇત્યલ્પેતરકલ્પનાકવલિતસ્વાન્તા નિશાન્તાન્તરે બાલા વૃત્તવિવર્તનવ્યતિકરા નાપ્નોતિ નિદ્રાં નિશિ ॥

અન્યથા ચિન્તિતા હ્યર્થા નરૈસ્તાત મનસ્વિભિઃ ।
અન્યથૈવ હિ ગચ્છન્તિ દૈવાદિતિ મતિર્મમ ॥

અન્યથા પરિદૃષ્ટાનિ મુનિભિર્વેદદર્શિભિઃ ।
અન્યથા પરિવર્તન્તે વેગા ઇવ નભસ્વતઃ ॥

અન્યથાલિઙ્ગ્યતે કાન્તા ભાવેન દુહિતાન્યથા ।
મનસો ભિદ્યતે વૃત્તિર્ અભિન્નેષ્વપિ વસ્તુષુ ॥

અન્યથા વર્ત્તમાનાનામ્ અર્થી ભૂતોઽયમન્યથા ।
અસ્માભિર્યદનુષ્ઠેયં ગન્ધર્વૈસ્તદનુષ્ઠિતમ્ ॥

અન્યથા વેદશાસ્ત્રાણિ જ્ઞાનપાણ્ડિત્યમન્યથા ।
અન્યથા તત્પદં શાન્તં લોકાઃ ક્લિશ્યન્તિ ચાન્યથા ॥

અન્યથા શાસ્ત્રગર્ભિણ્યા ધિયા ધીરોઽર્થમીહતે ।
સ્વામીવ પ્રાક્તનં કર્મ વિદધાતિ તદન્યથા ॥

અન્યથૈવ વિચિન્ત્યન્તે પુરુષેણ મનોરથાઃ ।
દૈવેનાહિતસદ્ભાવાઃ કર્મણાં ગતયોઽન્યથા ॥

અન્યથૈવસતી પુત્રં ચિન્તયેદન્યથા પતિમ્ ।
યથા યથા સ્વભાવસ્ય મહાભાગ ઉદાહૃતમ્ ॥

અન્યથૈવ હિ મન્યન્તે પુરુષાસ્તાનિ તાનિ ચ ।
અન્યથૈવ પ્રભુસ્તાનિ કરોતિ વિકરોતિ ચ ॥

અન્યથૈવ હિ સૌહાર્દં ભવેત્સ્વચ્છાન્તરાત્મનઃ ।
પ્રવર્તતેઽન્યથા વાણી શાઠ્યોપહતચેતસઃ ॥