મહાસુભાષિતસંગ્રહ · શ્લોક 1623-1642

અન્તર્ગતો યદિ હરિસ્તપસા તતઃ કિં નાન્તર્ગતો યદિ હરિસ્તપસા તતઃ કિમ્ ।
અન્તર્બહિર્યદિ હરિસ્તપસા તતઃ કિં નાન્તર્બહિર્યદિ હરિસ્તપસા તતઃ કિમ્ ॥

અન્તર્ગાઢં ચિહ્નહીનં વિશાલં મધ્યે સ્થૂલં સ્થૂલધારાતિતીક્ષ્ણમ્ ।
રક્ષોવક્ષશ્છેદનાર્થં મહાન્તં કૃત્વા ખઙ્ગં દેવરાજોતિહૃષ્ટઃ ॥

અન્તર્ગૂઢાનર્થાન્ અવ્યઞ્જયતઃ પ્રસાદરહિતસ્ય ।
સંદર્ભસ્ય નદસ્ય ચ ન રસઃ પ્રીત્યૈ રસજ્ઞાનામ્ ॥

અન્તર્ગૃહં નયતિ વર્ધિતરોમહર્ષં સ્પર્શેન સીત્કરણગર્ભમુખીઃ કરોતિ ।
કિંચાધરવ્રણવતીઃ કુરુતે પુરન્ઘ્રીઃ કિં વલ્લભઃ કિમુત હૈમન એષ વાતઃ ॥

અન્તર્ગૃહે કૃષ્ણમવેક્ષ્ય ચૌરં બદ્ધ્વા કવાટં જનનીં ગતૈકા ।
ઉલૂખલે દામનિબદ્ધમેનં તત્રાપિ દૃષ્ટ્વા સ્તિમિતા બભૂવ ॥

અન્તર્જલાવારિતમૂર્તિ યાતો બાલાપરિષ્વઙ્ગસુખાય પત્યુઃ ।
વિઘ્નાય વૈમલ્યમપાં બભૂવ વ્યર્થઃ પ્રસાદો હિ જલાશયાનામ્ ॥

અન્તર્દધાનાપિ કઠોરભાવં સ્વચ્છદ્યુતિઃ સા નિજમાધુરીભિઃ ।
ભુક્તા રસં સ્વાદુવિદાં તનોતિ ગુણોપગૂઢા સિતશર્કરેવ ॥

અન્તર્દુષ્ટઃ ક્ષમાયુક્તઃ સર્વાનર્થકરઃ કિલ ।
શકુનિઃ શકટારશ્ચ દૃષ્ટાન્તાવત્ર ભૂપતે ॥

અન્તર્ધૃતગુણૈરેવ પરેષાં સ્થીયતે હૃદિ ।
અર્થં સમર્થયન્ત્યેનં સમગ્રં કુસુમસ્રજઃ ॥

અન્તર્નાડીનિયમિતમરુલ્લઙ્ઘિતબ્રહ્મરન્ધ્રં સ્વાન્તે શાન્તિપ્રણયિનિ સમુન્મીલદાનન્દસાન્દ્રમ્ ।
પ્રત્યગ્જ્યોતિર્જય્તિ યમિનઃ સ્પષ્ટલાલાટનેત્ર- વ્યાજવ્યક્તીકૃતમિવ જગદ્વાપિ ચન્દ્રાર્ધમૌલેઃ ॥

અન્તર્નિદહ્યમાનેન શક્તિહીનેન શત્રુષુ ।
સંતતિઃ ક્રિયતે યેન નિન્દ્યં ધિક્તસ્ય જીવિતમ્ ॥

અન્તર્નિબદ્ધગુરુમન્યુપરંપરાભિર્ ઇચ્ચોચિતં કિમપિ વક્તુમશક્નુવત્યાઃ ।
અવ્ય્ક્તહૂંકુતિચલત્કુચમણ્ડલાયાસ્ તસ્યાઃ સ્મરામિ મુહુરર્ધવિલોકિતાનિ ॥

અન્તર્બલાન્યહમમુષ્ય મૃગાધિપસ્ય વાચા નિગદ્ય કથમદ્ય લઘૂકરોમિ ।
જાનન્તિ કિં ન કરજક્ષતકુમ્ભિકુમ્ભા- દામુક્તમૌક્તિકમયાનિ દિગન્તરાણિ ॥

અન્તર્ભાવનિગૂધેયં વાક્તે પ્રકૃતિપેશલા ।
વિકારાદ્યનભિજ્ઞેયા વિષદિગ્ધેવ વારુણી ॥

અન્તર્ભૂતો નિવસતિ જડે જડઃ શિશિરમહસિ હરિણ ઇવ ।
અજડે શશીવ તપને સ તુ પ્રવિષ્ટોઽપિ નિઃસરતિ ॥

અન્તર્ભૂય પ્રભોઃ પ્રાપ્યો વિશેષઃ સર્વથા બુધૈઃ ।
કો હિ નામ ન કુર્વીત કેવલોદરપૂરણમ્ ॥

અન્તર્મગ્નકરેણવઃ કલભકવ્યારુગ્ણકન્દાઙ્કુરૈઃ સામોદાઃ પરિતઃ પ્રમત્તમહિષશ્વાસોલ્લસદ્વીચયઃ ।
સંમોદં જનયન્તિ શૈલસરિતઃ સુચ્છાયકચ્છસ્થલી- સીમાનો જલસેકશીતલશિલાનિદ્રાણરોહિદ્ગણાઃ ॥

અન્તર્મન્યુવિભિન્નદીર્ઘરસિતપ્રોદ્ભૂતકણ્ઠવ્યથૈર્ આક્રુષ્ટાસ્તટિનીષુ કોકમિથુનૈર્યાવન્નિશીથં મિથઃ ।
શીતોજ્જાગરજમ્બુકૌઘમુખરગ્રામોપકણ્ઠસ્થલાઃ કૃચ્છ્રેણોપરમન્તિ પાન્થગૃહિણીચિન્તાયતા રાત્રયઃ ॥

અન્તર્મલિનદેહેન બહિરાહ્લાદકારિણા ।
મહાકાલફલેનેવ કઃ ખલેન ન વઞ્ચિતઃ ॥

અન્તર્મલિનસંસર્ગાચ્ છ્રુતવાનપિ દુષ્યતિ ।
યચ્ચક્ષુઃસંનિકર્ષેણ કર્ણોઽભૂત્ કુટિલાશ્રયઃ ॥