મહાસુભાષિતસંગ્રહ · શ્લોક 1603-1622

અન્તઃસારવિહીનાનાં સહાયઃ કિં કરિષ્યતિ ।
મલયેઽપિ સ્થિતો વેણુર્ વેણુરેવ ન ચન્દનઃ ॥

અન્તઃસારવિહીનાનામ્ ઉપદેશો ન જાયતે ।
મલયાચલસંસર્ગાન્ ન વેણુશ્ચન્દનાયતે ॥

અન્તઃસારૈરકુટિલૈસ્ સુસ્નિગ્ધૈઃ સુપરીક્ષિતૈઃ ।
મન્ત્રિભિર્ધાર્યતે રાજ્યં સુસ્તમ્ભૈરિવ મન્દિરમ્ ॥

અન્તઃસારોઽપિ નિર્યાતિ નૂનમર્થિતયા સહ ।
અન્યથા તદવસ્થસ્ય મહિમા કેન દેહિનામ્ ॥

અન્તઃસ્થસુરતારમ્ભા ભિલાષમપિ ગોપયત્ ।
અન્યોન્યં મિથુનં વેત્તિ નેત્રે દૃષ્ટ્વૈવ ચઞ્ચલે ॥

અન્તઃસ્થેનાવિરુદ્ધેન સુવૃત્તેનાતિચારુણા ।
અન્તર્ભિન્નેન સંપ્રાપ્તં મૌક્તિકેનાપિ બન્ધનમ્ ॥

અન્તઃસ્વીકૃતજાહ્નવીજલમતિસ્વચ્છન્દરત્નાંકુર- શ્રેણીશોણભુજઙ્ગનાયકફણાચક્રોલ્લસત્પલ્લવમ્ ।
ભૂયાદભ્યુદયાય મોક્ષનગરપ્રસ્થાનભાજામિતઃ પ્રત્યૂહપ્રશમૈકપૂર્ણકલશપ્રાયં શિરો ધૂર્જટેઃ ॥

અન્તકઃ પર્યવસ્થાતા જન્મિનઃ સંતતાપદઃ ।
ઇતિ ત્યાજ્યે ભવે ભવ્યો મુક્તાવ્રુત્તિષ્ઠતે જનઃ ॥

અન્તકઃ શમનો મૃત્યુઃ પાતાલં વડવામુખમ્ ।
ક્ષુરધારા વિષં સર્પો વહ્નિરિત્યેકતઃ સ્ત્રિયઃ ॥

અન્તકાય દદતા ત્વયા પ્રિયા- કાયકાન્ચનલતાપ્રતિગ્રહમ્ ।
દીયતે બત મદીયજીવનં દક્ષિણાનિલ કુતો ન દક્ષિણા ॥

અન્તકાલે ચ મામેવ સ્મરન્મુક્ત્વા કલેવરમ્ ।
યઃ પ્રયાતિ સ મદ્ભાવં યાતિ નાસ્ત્યત્ર સંશયઃ ॥

અન્તકાલે હિ ભૂતાનિ મુહ્યન્તીતિ પુરાશ્રુતિઃ ।
[રાજ્ઞૈવં કુર્વતા લોકે પ્રત્યક્ષા સા શ્રુતિઃ કૃતા] ॥

અન્તકોઽપિ હિ જન્તૂનામ્ અન્તકાલમપેક્ષતે ।
ન કાલનિયમઃ કશ્ચિદ્ ઉત્તમર્ણસ્ય વિદ્યતે ॥

અન્તરં કિયદાખ્યાન્તિ સન્તો રઘુકિરાતયોઃ ।
અન્તરં તાવદાખ્યાન્તિ સન્તો રઘુકિરાતયોઃ ॥

અન્તરઙ્ગમનઙ્ગસ્ય શૃઙ્ગારકુલદૈવતમ્ ।
અઙ્ગીકરોતિ તન્વઙ્ગી સા વિલાસમયં વયઃ ॥

અન્તરઙ્ગા હિ યે રાજ્ઞઃ પરસ્વાદાયિનઃ શઠાઃ ।
ભૃત્યા ભવન્તિ પ્રાયેણ તેભ્યો રક્ષેદિમાઃ પ્રજાઃ ॥

અન્તરાયતિમિરોપશાન્તયે શાન્તપાવનમચિન્ત્યવૈભવમ્ ।
તં નરં વપુષિ કુઞ્જરં મુખે મન્મહે કિમપિ તુન્દિલં મહઃ ॥

અન્તર્ગતમલો દુષ્ટસ્ તીર્થસ્નાનશતૈરપિ ।
ન શુધ્યતિ યથા ભાણ્ડં સુરાયા દાહિતં ચ સત્ ॥

અન્તર્ગતા મદનવહ્નિશિખાવલી યા સા બાઘ્યતે કિમિહ ચન્દનપઙ્કલેપૈઃ ।
યત્કુમ્ભકારપચનોપરિ પઙ્કલેપસ્ તાપાય કેવલમસૌ ન ચ તાપશાન્ત્યૈ ॥

અન્તર્ગતૈર્ગુણૈઃ કિં દ્વિત્રા અપિ યત્ર સાક્ષિણો વિરલાઃ ।
સ ગુણો ગીતેર્યદસૌ વનેચરં હરિણમપિ હરતિ ॥