મહાસુભાષિતસંગ્રહ · શ્લોક 1501-1520

અનુરાગવર્તિના તવ વિરહેણોગ્રેણ સા ગૃહીતાઙ્ગી ।
ત્રિપુરરિપુણેવ ગૌરી વરતનુરર્ધાવશિષ્ટેવ ॥

અનુરાગાદભિસરતો લઙ્ઘિતજલધેઃ કલાધિનાથસ્ય ।
રજનીમુખચુમ્બનતઃ શિથિલિતમલકં કલઙ્કમાકલયે ॥

અનુરાગો વૃથા સ્ત્રીષુ સ્ત્રીષુ ગર્વો વૃથા તથા ।
પૃઇયોઽહમ્ સર્વદા હ્યસ્યા મમૈષા સર્વદાપ્રિયા ॥

અનુરૂપમિદં કૂપ છદ્મચ્છન્નસ્ય કિં ન તે ।
સન્માર્ગવિભ્રમાન્માર્ગપાતોઽયં યન્નિપાતિતઃ ॥

અનુરૂપેણ સંસર્ગં પ્રાપ્ય સર્વોઽપિ મોદતે ।
દિનં તેજોનિધિર્યદ્વદ્ રત્રિં દોષાકરસ્ તથા ॥

અનુલેપનાનિ કુસુમાન્યબલાઃ કૃતમન્યવઃ પતિષુ દીપશિખાઃ ।
સમયેન તેન ચિરસુપ્તમનો- ભવબોધનં સમમબોધિષત ॥

અનુલોમેન બલિનં પ્રતિલોમેન દુર્જનમ્ ।
આત્મતુલ્યબલં શત્રું વિનયેન બલેન વા ॥

અનુવનં વનરાજિવધૂમુખે બહલરાગજવાધરચારુણિ ।
વિકચબાણદલાવલયોઽધિકં રુરુચિરે રુચિરેક્ષણવિભ્રમાઃ ॥

અનુવનમનુયાન્તં બાષ્પવારિ ત્યજન્તં મુદિતકમલદામક્ષામમાલોક્ય રામમ્ ।
દિનમપિ રવિરોચિસ્તાપમન્તઃ પ્રપેદે રજનિરપિ ચ તારાબાષ્પબિન્દૂન્ બભાર ॥

અનુવનમનુશૈલં તામનાલોક્ય સીતાં પ્રતિદિનમતિદીનં વીક્ષ્ય રામં વિરામમ્ ।
ગિરિરશનિમયોઽયં યસ્તદા ન દ્વિધાભૂત્ ક્ષિતિરપિ ન વિદીર્ણા સાપિ સર્વંસહૈવ ।

અનુવાદયિતા વાદ્યં નૃત્યસિ યત્ત્વયિ સુરેશ્વરઃ સાક્ષાત્ ।
પક્ષશ્ચ તેઽજવન્દ્યસ્ તદસિ કલાપિન્ પરં ધન્યઃ ॥

અનુવેલં નિહન્યન્તે યસ્ય સિન્ધોરિવોદ્યમાઃ ।
તં પ્રમથ્ય શ્રિયં કોઽપિ વિપક્ષો ભૂભૃદુદ્ધરેત્ ॥

અનુશયવત્યેવોક્તા પ્રોષ્યત્પતિકા ન ભેદતો બહુભિઃ ।
પરદેશાદાગચ્છત્- પતિકાપિ યથા પ્રમુદિતૈવ ॥

અનુશાસદ્ધિ ધર્મેણ વ્યવહારેણ સંસ્થયા ।
ન્યાયેન ચ ચતુર્થેન ચતુરન્તાં મહીં જયેત્ ॥

અનુશીલિતકુઞ્જવાટિકાયાં જઘનાલંકૃતપીતશાટિકાયામ્ ।
મુરલીકલકૂજિતે રતાયાં મમ ચેતોઽસ્તુ કદમ્બદેવતાયામ્ ॥

અનુશોચનમસ્તવિચારમના વિગતસ્ય મૃતસ્ય ચ યઃ કુરુતે ।
સ ગતે સલિલે તનુતે વરણં ભુજગસ્ય ગતસ્ય ગતિં ક્ષિપતિ ॥

અનુષ્ઠાનેન રહિતાં પાઠમાત્રેણ કેવલમ્ ।
રઞ્જયત્યેવ યા લોકં કિં તયા શુકવિદ્યયા ॥

અનુષ્ઠિતં તુ યદ્ દેવૈર્ ઋષિભિર્યદનુષ્ઠિતમ્ ।
નાનુષ્ઠેયં મનુષ્યૈસ્તુ તદુક્તં કર્મ આચરેત્ ॥

અનુષ્ઠિતેષુ કાર્યેષુ યો ગુહ્યં ન પ્રકાશયેત્ ।
સ તત્ર લભતે સિદ્ધિં જલમધ્યે કપિર્યથા ॥

અનુસરતિ કરિકપોલં ભ્રમરઃ શ્રવણેન તાડ્યમાનોઽપિ ।
ગણયતિ ન તિરસ્કારં દાનાન્ધવિલોચનો નીચઃ ॥