મહાસુભાષિતસંગ્રહ · શ્લોક 1341-1360

અનારાધ્ય કાલીમનાસ્વાદ્ય ગૌડી- મૃતે મન્ત્રતન્ત્રાદ્વિના શબ્દચૌર્યાત્ ।
પ્રબન્ધં પ્રગલ્ભં પ્રકર્તું પ્રવક્તું વિરિઞ્ચિપ્રપઞ્ચે મદન્યઃ કવિઃ કઃ ॥

અનારોગ્યમનાયુષ્યમ્ અસ્વર્ગ્યં ચાતિભોજનમ્ ।
અપુણ્યં લોકવિદ્વિષ્ટં તસ્માત્ તત્ પરિવર્જયેત્ ॥

અનાર્યતા નિષ્ઠુરતા ક્રૂરતા નિષ્ક્રિયાત્મતા ।
પુરુષં વ્યઞ્જયન્તીહ લોકે કલુષયોનિજમ્ ॥

અનાર્યપ્રજ્ઞાનામિહ જનવધૂનાં હિ મનસો મહાશલ્યં કર્ણે તવ કનકજમ્બૂકિસલયઃ ।
ભ્રમન્ ભિક્ષાહેતોરધિનગરિ બુદ્ધોઽસિ ન મયા ? ત્વયૈતાવદ્વેષઃ પથિક ન વિધેયઃ પુનરપિ ॥

અનાર્યમપ્યાચરિતં કુમાર્યા ભવાન્ મમ ક્ષામ્યતુ સૌમ્ય તાવત્ ।
હંસોઽપિ દેવાંશતયાસિ વન્દ્યઃ શ્રીવત્સલક્ષ્મેવ હિ મત્સ્યમૂર્તિઃ ॥

અનાર્યવૃત્તમપ્રાજ્ઞમ્ અસૂયકમધાર્મિકમ્ ।
અનર્થાઃ ક્ષિપ્રમાયાન્તિ વાગ્દુષ્ટં ક્રોધનં તથા ॥

અનાર્યેણ કૃતઘ્નેન સંગતિર્મે ન યુજ્યતે ।
વિનાશમપિ કાઙ્ક્ષન્તિ જ્ઞાતીનાં જ્ઞાતયઃ સદા ॥

અનાલોક્ય વ્યયં કર્ત્તા અનાથઃ કલહપ્રિયઃ ।
આતુરઃ સર્વક્ષેત્રેષુ નરઃ શીઘ્રં વિનશ્યતિ ॥

અનાલોચ્ય પ્રેમ્ણઃ પરિણતિમનાદૃત્ય સુહૃદસ્ ત્વયાકાણ્ડે માનઃ કિમિતિ સરલે સંપ્રતિ કૃતઃ ।
સમાકૃષ્ટા હ્યેતે પ્રલયદહનોદ્ભાસુરશિખાઃ સ્વહસ્તેનાઙ્ગારાસ્તદલમધુનારણ્યરુદિતૈઃ ॥

અનાવર્તી કાલો વ્રજતિ સ વૃથા તન્ન ગણિતં દશાસ્તાસ્તાઃ સોઢા વ્યસનશતસંપાતવિધુરાઃ ।
કિયદ્વા વક્ષ્યામઃ કિમિવ બત નાત્મન્યુપકૃતં વયં યાવત્તાવત્ પુનરપિ તદેવ વ્યવસિતમ્ ॥

અનાવર્જિતચિત્તાપિ ધ્રુવં સર્વાન્ પ્રધાવતિ ।
ફલં ન લભતે કિંચિત્ તૃષ્ણા જીર્ણેવ કામિની ॥

અનાવિલં ફલં ભુઙ્ક્તે વિષયાણામનુત્સુકઃ ।
ઉત્સુકો લબ્ધરોકેણ તત્ર શોકેન શીર્યતે ॥

અનાવૃતનવદ્વારપઞ્જરે વિહગાનિલઃ ।
યત્તિષ્ઠતિ તદાશ્ચર્યં વિયોગે તસ્ય કા કથા ॥

અનાવૃતાઃ સ્વવર્ણેષુ સર્વસાધારણાઃ પુરા ।
નાર્યો બભૂવુર્નિર્વૈરો યતઃ સર્વોઽભવજ્જનઃ ॥

અનાવૃષ્ટિહતે દેશે સસ્યે ચ પ્રલયં ગતે ।
ધન્યાસ્તાત ન પશ્યન્તિ દેશભઙ્ગં કુલક્ષયમ્ ॥

અનાશ્રિતા દાનપુણ્યં વેદપુણ્યમનાશ્રિતાઃ ।
રાગદ્વેષવિનિર્મુક્તા વિચરન્તીહ મોક્ષિણઃ ॥

અનાશ્રિતે દૃપ્તગુરૌ અવજ્ઞાં કલયેન્ નૃપઃ ।
સંવર્તેન મરુત્તસ્તુ નિરસ્તમકરોદ્ગુરુમ્ ॥

અનાસ્થા વસ્તૂનામભિમતગુણાનામુપહૃતૌ ઘનો ગર્વસ્તન્વ્યા રુષિ ચ વિહિતાડમ્બરવિધિઃ ।
પ્રહારઃ પાદાભ્યાં યમનમપિ કાઞ્ચ્યા ચરણયોઃ પ્રિયાયા વિબ્બોકં તદિદમિતિ ધન્યોઽનુભવતિ ॥

અનાસ્વાદિતસંભોગાઃ પતન્તુ તવ શત્રવઃ ।
બાલવૈધવ્યદગ્ધાનાં કુલસ્ત્રીણાં સ્તના ઇવ ॥

અનાસ્વાદ્યમવિક્રેયમ્ અનાદેયમનીપ્સિતમ્ ।
દત્તં નિરુપકારં યદ્ વન્ધ્યદાનેન તેન કિમ્ ॥