મહાસુભાષિતસંગ્રહ · શ્લોક 1200-1219

અનણુરણન્મણિમેખલ- મવિરતશિઞ્જાનમઞ્જુમઞ્જીરમ્ ।
પરિસરણમરુણચરણે રણરણકમકારણં કુરુતે ॥

અનતિચિરોજ્ઝિતસ્ય જલદેન ચિર- સ્થિતબહુબુદ્બુદસ્ય પયસોઽનુકૃતિમ્ ।
વિરલવિકીર્ણવજ્રશકલા સકલામ્ ઇહ વિદધાતિ ધૌતકલધૌતમહી ॥

અનતિશયં સ્વર્ણચયં નિવહન્ નિતરાં પ્રમોદયે સ્વાન્તે ।
કિંતુ તવૈષા સંપત્ કસ્યોપકૃતે પ્રતિબ્રૂહિ ॥

અનતિશિથિલે પુંભાવેન પ્રગલ્ભબલાઃ ખલુ પ્રસભમલયઃ પાથોજાસ્યે નિવિશ્ય નિરિત્વરાઃ ।
કિમપિ મુખતઃ કૃત્વાનીતં વિતીર્ય સરોજિની- મધુરસમુષોયોગે જાયાં નવાન્નમચીકરન્ ॥

અનધિગતમનોરથસ્ય પૂર્વં શતગુણિતેવ ગતા મમ ત્રિયામા ।
યદિ તુ તવ સમાગમે તથૈવ પ્રસરતિ સુભ્રુતતઃ કૃતી ભવેયમ્ ॥

અનધીત્ય યથા વેદાન્ ન વિપ્રઃ શ્રાદ્ધમર્હતિ ।
એવમશ્રુતષાડ્ગુણ્યો ન મન્ત્રં શ્રોતુમર્હતિ ॥

અનધીત્ય સ્વજશાસ્ત્રં યોઽન્યશાસ્ત્રં સમીહતે વક્તુમ્ ।
સોઽહેઃ પદાનિ ગણયતિ નિશિ તમસિ જલે ચિરગતસ્ય ॥

અનધીત્યાર્થશાસ્ત્રણિ બહવઃ પશુબુદ્ધયઃ ।
પ્રાગલ્ભ્યાદ્વક્તુમિચ્છન્તિ મન્ત્રેષ્વભ્યન્તરીકૃતાઃ ॥

અનધ્યવસિતાવગાહનમનલ્પધીશક્તિનાપ્ય્ અદૃષ્ટપર્માર્થતત્ત્વમધિકાભિયોગૈરપિ ।
મતં મમ જગત્યલબ્ધસદૃશપ્રતિગ્રાહકં પ્રયાસ્યતિ પયોનિધેઃ પય ઇવ સ્વદેહે જરામ્ ॥

અનધ્વન્યાઃ કાવ્યેષ્વલસગતયઃ શાસ્ત્રગહનેષ્વ્ અદુઃખજ્ઞા વાચાં પરિણતિષુ મૂકાઃ પરગુણે ।
વિદગ્ધાનાં ગોષ્ઠીષ્વકૃતપરિચર્યાશ્ચ ખલુ યે ભવેયુસ્તે કિં વા પરભણિતિકણ્ડૂતિનિકષાઃ ॥

અનન્તં બત મે વિત્તં યસ્ય મે નાસ્તિ કિંચન ।
મિથિલાયાં પ્રદીપ્તાયાં ન મે દહ્યતિ કિંચન ॥

અનન્તકોપાદિચતુષ્ટયોદયે ત્રિભેદમિથ્યાત્વમલોદયે તથા ।
દુરન્તમિથ્યાત્વવિષં શરીરિણામ્ અનન્તસંસારકરં પ્રરોહતિ ॥

અનન્તખ્યાતિસંપન્નઃ શુદ્ધસત્ત્વઃ સધીબલઃ ।
ધત્તે બહુમુખં ભોગં શ્રુતિદૃષ્ટિસ્થિરાશયઃ ॥

અનન્તતત્ત્વં પરિગૃહ્ય ધાત્રા વિનિર્મિતોઽસ્યાઃ કિલ મધ્યભાગઃ ।
અણુઃ પરં યોગિદૃશાનુલક્ષ્યઃ સચ્ચિત્કલાસ્થૈર્યબલાવનદ્ધઃ ॥

અનન્તનામધેયાય સર્વાકારવિધાયિને ।
સમસ્તમન્ત્રવાચ્યાય વિશ્વૈકપતયે નમઃ ॥

અનન્તપદવિન્યાસરચના સરસા કવેઃ ।
બુધો યદિ સમીપસ્થો ન કુજન્યઃ પુરો યદિ ॥

અનન્તપારં કિલ શબ્દશાસ્ત્રં સ્વલ્પં તથાયુર્બહવશ્ચ વિઘ્નાઃ ।
યત્ સારભૂતં તદુપાસનીયં હંસૈર્યથા ક્ષીરમિવામ્બુમધ્યાત્ ॥

અનન્તરત્નપ્રભવસ્ય યસ્ય હિમં ન સૌભાગ્યવિલોપિ જાતમ્ ।
એકો હિ દોષો ગુણસંનિપાતે નિમજ્જતીન્દોઃ કિરણેષ્વિવાઙ્કઃ ॥

અનન્તરમરિં વદ્યાદ્ અરિસેવિનમેવ ચ અરેરનન્તરં મિત્રમ્ ઉદાસીનં તયોઃ પરમ્ ॥

અનન્તવિભવભ્રષ્ટા દૌર્બ્ભાગ્યપરિતાપિની ।
શોચ્યતિ પ્રાપ્ય જીવત્વં ભર્તૃહીનેવ નાયિકા ॥