મહાસુભાષિતસંગ્રહ · શ્લોક 1180-1199

અદ્વારેણ વિશન્ત્યેવ બુદ્ધિમન્તો રિપોર્ગૃહમ્ ।
અકૃત્વા ધર્ષણાં પૂર્વં કથં યુદ્ધં પ્રવર્તતે ॥

અનક્ષરં રૂપમિહ ક્ષરન્તી પઞ્ચાશદર્ણૈરમૃતામ્બુપૂર્ણૈઃ ।
વ્યાકીર્ણવિધ્યમણ્ડમદન્તરાલા (?) શબ્દાત્મિકા મામવતાત્ સમન્તાત્ ॥

અનક્ષરજ્ઞેન જનેન સખ્યં સંભાષણં દુષ્પ્રભુસેવનં ચ ।
આલિઙ્ગનં લમ્બપયોધરાણાં પ્રત્યક્ષદુઃખં ત્રયમેવ ભૂમૌ ॥

અનઙ્કુરિતકૂર્ચકઃ સ તુ સિતોપલાઢ્યં પયઃ સ એવ ધૃતકૂચકઃ સલવણામ્બુતક્રોપમઃ ।
સ એવ સિતકૂર્ચકઃ ક્વથિતગુગ્ગુલોદ્વેગકૃદ્ ભવન્તિ હરિણીદૃશાં પ્રિયતમેષુ ભાવાસ્ત્રયઃ ॥

અનઙ્ગઃ પઞ્ચભિઃ પુષ્પૈર્ વિશ્વં વ્યજયતેષુભિઃ ।
ઇત્યસંભાવ્યમથવા વિચિત્રા વસ્તુશક્તયઃ ॥

અનઙ્ગતાપપ્રશમાય તસ્ય કદર્થ્યમાના મુહુરામૃણાલમ્ ।
મધૌ મધૌ નાકનદીનલિન્યો વરં વહન્તાં શિશિરેઽનુરાગમ્ ॥

અનઙ્ગ પલિતં મૂર્ધ્નિ પશ્યૈતદ્ વિજયધ્વજમ્ ।
ઇદાનીં જિતમસ્માભિસ્ તવાકિંચિત્કરાઃ શરાઃ ॥

અનઙ્ગબાણાકુલિતસ્ય શંભોઃ શિરો ભવાનીચરણેઽતિનમ્રમ્ ।
વિલોક્ય કાચિચ્ચરણે ચરન્તી પિપીલિકા ચુમ્બતિ ચન્દ્રબિમ્બમ્ ॥

અનઙ્ગમઙ્ગલગૃહાપાઙ્ગભઙ્ગિતરઙ્ગિતૈઃ ।
આલિઙ્ગિતઃ સ તન્વઙ્ગ્યા કાર્તાર્થ્યં લભતે કદા ॥

અનઙ્ગમઙ્ગલભુવસ્ તદપાઙ્ગસ્ય ભઙ્ગયઃ ।
જનયન્તિ મુહુર્યૂનામ્ અન્તઃસંતાપસંતતિમ્ ॥

અનઙ્ગમઙ્ગલારમ્ભકુમ્ભાવિવ પયોધરૌ ।
કસ્ય નાર્તિહરૌ તસ્યાઃ કરપલ્લવસંવૃતૌ ॥

અનઙ્ગરઙ્ગપીઠોઽસ્યાઃ શૃઙ્ગારસ્વર્ણવિષ્ટરઃ ।
લાવણ્યસારસંઘાતઃ સા ઘના જઘનસ્થલી ॥

અનઙ્ગરઙ્ગપ્રતિમં તદઙ્ગં ભઙ્ગીભિરઙ્ગીકૃતમાનતાઙ્ગ્યાઃ ।
કુર્વન્તિ યૂનાં સહસા યથૈતાઃ સ્વાન્તાનિ શાન્તાપરચિન્તનાનિ ॥

અનઙ્ગરસચાતુરીચપલચારુચેલાઞ્ચલશ્ ચલન્મકરકુણ્ડલસ્ફુરિતકાન્તિગણ્ડસ્થલઃ ।
વ્રજોલ્લસિતનાગરીનિકરરાસલાસ્યોત્સુકઃ સ મે સપદિ માનસે સ્ફુરતુ કોઽપિ ગોપાલકઃ ॥

અનઙ્ગલઙ્ઘનાલગ્નનાનાતઙ્કા સદઙ્ગના ।
સદાનઘ સદાનન્દ નતાઙ્ગાસઙ્ગસંગત ॥

અનઙ્ગશસ્ત્રાણિ નતાઙ્ગિ તીક્ષ્ણતાં નયત્યયસ્કાર ઇવામ્બુદાગમઃ ।
મલીમસાઙ્ગારરુચાં પયોમુચાં તથાહિ મધ્યે જ્વલિતસ્તડિચ્છિખી ॥

અનઙ્ગીકૃતકામાનામ્ અનુમાનાર્હવર્ષ્મણામ્ ।
ધ્ર્તનિર્મલતીર્થાનાં ભૂતિલેપો વિભૂષણમ્ ॥

અનઙ્ગેનાબલાસઙ્ગાજ્ જિતા યેન જગત્ત્રયી ।
સ ચિત્રચરિતઃ કામઃ સર્વકામપ્રદોઽસ્તુ વઃ ॥

અનઙ્ગોઽયમનઙ્ગત્વમ્ અદ્ય નિન્દિષ્યતિ ધ્રુવમ્ ।
યદનેન ન સંપ્રાપ્તઃ પાણિસ્પર્શોત્સવસ્તવ ॥

અનઞ્જિતાસિતા દૃષ્ટિર્ ભ્રૂરનાવર્જિતા નતા ।
અરઞ્જિતોઽરુણશ્ચાયમ્ અધરસ્તવ સુન્દરિ ॥