મહાસુભાષિતસંગ્રહ · શ્લોક 1080-1099

અધર્મેણ ચ યઃ પ્રાહ યશ્ચાધર્મેણ પૃચ્છતિ ।
તયોરન્યતરઃ પ્રૈતિ વિદ્વેષં વાધિગચ્છતિ ॥

અધર્મેણૈધતે તાવત્ તતો ભદ્રાણિ પશ્યતિ ।
તતઃ સપત્નાઞ્ જયતિ સમૂલસ્તુ વિનશ્યતિ ॥

અધર્મેષુ રસસ્તસ્ય ઉત્ક્લેદૈર્મધુરાયતે ।
તાદૃશૈશ્ચ ફલૈશ્ચૈવ સફલો લોભપાદપઃ ॥

અધર્મોપચિતં વિત્તં હરન્ત્યન્યેઽલ્પમેધસઃ ।
સંભોજનીયાપદેશૈર્ જલાનીવ જલૌકસઃ ॥

અધર્મોપાર્જિતૈરર્થૈર્યઃ કરોત્યૌર્ધ્વદેહિકમ્ ।
ન સ તસ્ય ફલં પ્રેત્ય ભુઙ્ક્તેઽર્થસ્ય દુરાગમાત્ ॥

અધર્ષિતાનાં શૂરાણાં સમરેષ્વનિવર્તિનામ્ ।
ધર્ષણામર્ષણં ભીરુ મરણાદતિરિચ્યતે ॥

અધશ્ચ દૂરપાતિત્વં સમે લક્ષ્યં સુનિશ્ચિતમ્ ।
દૃઢસ્ફોટં પ્રકુર્વીત ઊર્ધ્વસંસ્થાનયોગતઃ ॥

અધસ્તનશ્વભ્રભુવો ન યાતિ ષણ્- ન સર્વનારીષુ ન સઞ્જિતોઽન્યતઃ ।
ન જાયતે વ્યન્તરદેવજાતિષુ ન ભાવનજ્યોતિષિકેષુ સદ્રુચિઃ ॥

અધસ્તાચ્છિદ્રિતં ચર્મ દુર્ગન્ધિપરિપૂરિતમ્ ।
મૂત્રક્લિન્નં ચ તસ્યાર્થે મા રાજન્ બ્રાહ્મણાન્ વધીઃ ॥

અધાક્ષીન્નો લઙ્કામયમયમુદન્વન્તમતરદ્ વિશલ્યાં સૌમિત્રૈરયમુપનિનાયૌષધિવરામ્ ।
ઇતિ સ્મારં સ્મારં ત્વદરિનગરીભિત્તિલિખિતં હનૂમન્તં દન્તૈર્દશતિ કુપિતો રાક્ષસગણઃ ॥

અધારિ પદ્મેષુ તદઙ્ઘ્રિણા ઘૃણા ક્વ તચ્છયચ્છાયલવોઽપિ પલ્લવે ।
તદાસ્યદાસ્યેઽપિ ગતોઽધિકારિતાં ન શારદઃ પાર્વિકશર્વરીશ્વરઃ ॥

અધાર્મિકાંશ્ચ ક્રૂરાંશ્ચ દૃષ્ટદોષાન્ નિરાકૃતાન્ ।
પરેભ્યોઽભ્યાગતાંશ્ચૈવ દૂરાદેતાન્ વિવર્જયેત્ ॥

અધાર્મિકો નરો યો હિ યસ્ય ચાપ્યનૃતં ધનમ્ ।
હિંસારતિશ્ચ યો નિત્યં નેહાસૌ સુખમેધતે ॥

અધિકઃ સ્યાત્ પિતુઃ પુત્રો રૂપવિદ્યાપરાક્રમૈઃ ।
તિષ્ઠન્ પિત્રાર્જિતપદે સુબ્રહ્મણ્યસ્તુ તાદૃશઃ ॥

અધિકરતલતલ્પં કલ્પિતસ્વાપલીલા- પરિમિલનનિમીલત્પાણ્ડિમા ગણ્ડપાલી ।
સુતનુ કથય કસ્ય વ્યઞ્જયત્યઞ્જસૈવ સ્મરનરપતિલીલાયૌવરાજ્યાભિષેકમ્ ॥

અધિકાર ઋણં ગર્ભશ્ ચતુર્થં શ્વાનમૈથુનમ્ ।
આગમે પરમં સૌખ્યં નિર્ગમે દુઃખકારણમ્ ॥

અધિકારાભિષેકેષુ મૃદઙ્ગવચનં શૃણુ ।
બદ્ધા દણ્ડહતા રિક્તા ભવિષ્યસિ યથા વયમ્ ॥

અધિકારેણ યો યુક્તઃ કથં તસ્યાસ્તિ ખણ્ડનમ્ ।
નીચેષૂપકૃતં રાજન્ બાલુકાસ્વિવ મુદ્રિતમ્ ॥

અધિકોન્નતૈરપિ સુદારુણાન્વિતૈર્ અસકૃદ્ભ્રમત્પશુગણાઙ્ઘ્રિપીડિતૈઃ ।
વિધિસિદ્ધનૈકગુણસસ્યસમ્પદાં વિરસસ્વભાવકઠિનૈરલં ખલૈઃ ॥

અધિગગનમનેકાસ્તારકા રાજ્યભાજઃ પ્રતિગૃહમિહ દીપા દર્શયન્તિ પ્રભુત્વમ્ ।
દિશિ દિશિ વિલસન્તઃ સન્તિ ખદ્યોતપોતાઃ સવિતરિ પરિભૂતે કિં ન લોકૈર્વ્યલોકિ ॥