મહાસુભાષિતસંગ્રહ · શ્લોક 0920-0939

અદ્યાપિ તાં મયિ ગતે ચિરકોપયન્તીં યાન્તીં સમાગતવતીં પરિવર્તમાનામ્ ।
ઊર્ધ્વસ્થિતાં કિમપિ મઞ્ચતલં નિષણ્ણાં શય્યાં સમાશ્રતવતીમધિકં સ્મરામિ ॥

અદ્યાપિ તાં મયિ દૃશં તુદતીં સ્મરામિ સ્મેરાં સ્મરદ્વરકરાં મધુરાં સુતારામ્ ।
અત્યુદ્બલાં સુરતલાં કુટિલાં સુશીલાં નિષ્પન્દમન્દસમદપ્રમદપ્રસાદામ્ ॥

અદ્યાપિ તાં મયિ નિમીલિતચારુનેત્રે કોઽયં વદેત્યભિહિતાં વદતીં સખીભિઃ ।
માતર્ન વિદ્ય ઇતિ સસ્મિતમુલ્લસન્તીમ્ ઉત્ફુલ્લગણ્ડફલકાં નિતરાં સ્મરામિ ॥

અદ્યાપિ તાં મસૃણચન્દનપઙ્કમિશ્ર- કસ્તૂરિકાપરિમલોત્થવિસર્પિગન્દામ્ ।
અન્યોન્યચઞ્ચુપુટચુમ્બનલગ્નપક્ષ્મ - યુગ્માભિરામનયનાં શયને સ્મરામિ ॥

અદ્યાપિ તાં મુખગતૈરરુણૈઃ કરાગ્રૈર્ આપૃચ્છ્યમાનમપિ માં ન વિભાષયન્તીમ્ ।
તદ્વાષ્પપૂરિતદૃશં બહુ નિઃશ્વસન્તીં ચિન્તાકુલાં કિમપિ નમ્રમુખીં સ્મરામિ ॥

અદ્યાપિ તાં પુનઃ કમલાયતાક્ષીં પશ્યામિ પીવરપયોધરભારખિન્નામ્ ।
સંપીડ્ય બાહુયુગલેન પિબામિ વક્ત્રમ્ ઉન્મત્તવન્મધુકરઃ કમલં યથેષ્ટમ્ ॥

અદ્યાપિ તાં યદિ પુનઃ શ્રવણાયતાક્ષીં પશ્યામિ દીર્ઘવિરહજ્વરિતાઙ્ગયષ્ટિમ્ ।
અઙ્ગૈરહં સમુપગૂહ્મ તતોઽતિગાઢં નોન્મીલયામિ નયને ન ચ તાં ત્યજામિ ॥

અદ્યાપિ તાં રહસિ દર્પણમીક્ષમાણામ્ દૃષ્ટ્વા સ્ફુટં પ્રતિનિધિં મયિ પૃષ્ઠલીને ।
પશ્યામિ વેપથુમતીં ચ સુવિભ્રમાં ચ લજ્જાકુલાં ચ સમુદં જિતમન્મથાં ચ ॥

અદ્યાપિ તાં વિધૃતકજ્જલલોલનેત્રાં પૃથ્વીં પ્રભૂતકુસુમાકુલકેશપાશામ્ ।
સિન્દૂરસંલુલિતમૌક્તિકદન્તકાન્તિમ્ આબદ્ધહેમકટકાં રહસિ સ્મરામિ ॥

અદ્યાપિ તાં વિધૃતકકજ્જલલોલનેત્રાં પૃથ્વીં પ્રભૂતકુસુમાકુલકેશપાશામ્ ।
સિન્દૂરસંલુલિતમૌક્તિકદન્તકાન્તિમ્ આબદ્ધહેમકટકાં રહસિ સ્મરામિ ॥

અદ્યાપિ તાં વિરહવહ્રિ નિપોડિતાઙ્ગીં તન્વીં કુરઙ્ગનયનાં સુરતૈકપાત્રીમ્ ।
નાનાવિચિત્રકુતમણ્ડનમાવહન્તીં તાં રાજહંસગમનાં સુદતીં સ્મરામિ ॥

અદ્યાપિ તાં વિહસીતાં કાચભારનમ્રાં મુક્તાકલાપધવલીકૃતકણ્ઠદેશામ્ ।
તત્કેલિમન્દરગિરૌ કુસુમાયુધસ્ય કાન્તાં સ્મરામિ રુચિરોજ્જ્વલપુષ્પકેતુમ્ ॥

અદ્યાપિ તાં શશિમુખીં નવયૌવનાઢ્યાં પીનસ્તનીં પુનરહં યદિ ગૌરકાન્તિમ્ ।
પશ્યામિ મન્મથશરાનલપીડિતાઙ્ગીં ગાત્રાણિ સંપ્રતિ કરોમિ સુશીતલાનિ ॥

અદ્યાપિ તાં શિખરચારુવલક્ષદન્તૈર્ મુખ્યાનિ કુન્દમુકુલાનિ જિતાં ચ સાધ્વીમ્ ।
સંચિન્તયામિ સતતં પ્રવિલોલિચિત્તાં કામેષુનીરજદૃશં વનજાવતંસામ્ ॥

અદ્યાપિ તાં સમપનીતનિતમ્બવસ્ત્રાં શ્યામાં ચ સાધ્વસરસાકુલવિહ્વલાઙ્ગીમ્ ।
એકેન પાણિકમલેન પિધાય ગૃહ્યમ્ અન્યેન નાભિકુહરં દધતીં સ્મરામિ ॥

અદ્યાપિ તાં સલલિતશ્લથકેશપાશામ્ ઈષત્સમુન્મિષિતઘૂર્ણિતવક્રનેત્રામ્ ।
સુપ્તોત્થિતાં વિદધતીં મુહુરઙ્ગભઙ્ગ પશ્યામિ દષ્ટમધરં બહુશઃ સ્પૃશન્તીમ્ ॥

અદ્યાપિ તાં સુનિપુણં યતતા મયાપિ દૃષ્ટં ન યત્સદૃશતો વદનં કદાચિત્ ।
સૌન્દર્યનિર્જિતરતિ દ્વિજરાજકાન્તિ કાન્તામિહાતિવિમલત્વમહાગુણેન ॥

અદ્યાપિ તાં સુરતઘૂર્ણનિમીલિતાક્ષીં સ્રસ્તાઙ્ગયષ્ટગલિતાંશુકકેશપાશામ્ ।
શૃઙ્ગારવારિરુહકાનનરાહહંસીં જન્માન્તરેઽપિ નિધનેઽપ્યનુચિન્તયામિ ॥

અદ્યાપિ તાં સુરતજાગરઘૂર્ણમાન- તિર્યગ્વલત્તરલતારક્દીર્ઘનેત્રામ્ ।
શૃઙ્ગારસારકમલાકરરાજહંસીં વ્રીડાવિનમ્રવદનામુષસિ સ્મરામિ ॥

અદ્યાપિ તાં સુરતતાણ્ડવસૂત્રધારં દુર્વારદર્પજઘનગ્લપિતાઙ્ગયષ્ટિમ્ ।
અઙ્ગં રસૈઃ સમુપગુહ્ય કટિં દધાનાં કિંચિન્નિમીલનયનાં મનસા સ્મરામિ ॥