મહાસુભાષિતસંગ્રહ · શ્લોક 0900-0919

અદ્યાપિ તાં જઘનદર્શનલાલસેન કૃષ્ટં મયા નિવસનાંચલમેકપાર્શ્વાત્ ।
પૂજ્ય સ્થિતામપિ તતો મુહુરાકૃષન્તીં મન્દાક્ષસંકુચિતનૂત્નમુખીં સ્મરામિ ॥

અદ્યાપિ તાં ઝટિતિ વક્રિતકન્ધરાગ્રાં નિક્ષિપ્તપાણિકમલાં ચ નિતમ્બમિમ્બે ।
વાસાંસપાર્શ્વલસદુલ્બણકેશપાશાં પશ્યામિ માં પ્રતિ દૃશં બહુશઃ ક્ષિપન્તીમ્ ॥

અદ્યાપિ તાં ધવલવેશ્મનિ રત્નદીપ- માલામયૂખપટલૈર્દલિતાન્ધકારે ।
પ્રાપ્તોદ્યમે રહસિ સંમુખદર્શનાર્થં લજ્જાભયાર્તનયનામનુચિન્તયામિ ॥

અદ્યાપિ તાં નખપદં સ્તનમણ્ડલે યદ્ દત્તં મયાસ્યમધુપાનવિમોહિતેન ।
ઉદ્ભિન્નરોમપુલકૈર્બહુભિઃ સમન્તાજ્ જાગર્તિ રક્ષતિ વિલોકયતિ સ્મરામિ ॥

અદ્યાપિ તાં ન ખલુ વેદ્મિ કિમીશપત્ની શાપં ગતા સુરપતેરથ કૃષ્ણલક્ષ્મીઃ ।
ધત્રૈવ કિં નુ જગતઃ પરિમોહનાય સા નિર્મિતા યુવતિરત્નદિદૃક્ષયા વા ॥

અદ્યાપિ તાં નવવયઃશ્રિયમિન્દુવક્ત્રાં ઉત્તુઙ્ગપીવરપયોધરભારખિન્નામ્ ।
સંપીડ્ય બાહુયુગલેન પિબામિ વક્ત્રાં પ્રોન્મત્તવન્મધુકરઃ કમલં યથેષ્ટમ્ ॥

અદ્યાપિ તાં નિજવપુઃકૃશવેદિમધ્યામ્ ઉત્તુઙ્ગસંભૃતસુધાસ્તનકુમ્ભયુગ્મામ્ ।
નાનાવિચિત્રકૃતમણ્ડનમ્ણ્ડિતાઙ્ગીં સુપ્તોત્થિતાં નિશિ દિવા ન હિ વિસ્મરામિ ॥

અદ્યાપિ તાં નિધુવનક્લમનિઃસહાઙ્ગીમ્ આપાણ્ડુગણ્ડપતિતાલકકુન્તલાલીમ્ ।
પ્રચ્છન્નપાપકૃતમન્તરિવાવહન્તીં કણ્ઠાવસક્તમૃદુબાહુલતાં સ્મરામિ ॥

અદ્યાપિ તાં નિધુવને મધુપાનરક્તાં લીલાધરાં કૃશતનું ચપલાયતાક્ષીમ્ ।
કાશ્મીરપઙ્કમૃગનાભિકૃતાઙ્ગરાગાં કર્પૂરપૂગપરિપૂર્ણમુખીં સ્મરામિ ॥

અદ્યાપિ તાં નિભૃતવક્ત્રકમાપતન્તં માં દ્વારિ વીક્ષ્ય સહસૈવ મિષેણ સુપ્તામ્ ।
મન્દં મયિ સ્પૃશતિ કણ્ટકિતાઙ્ગયષ્ટિમ્ ઉત્ફુલ્લગલ્લફલકાં બહુશઃ સ્મરામિ ॥

અદ્યાપિ તાં નૃપતિશેખરરાજપુત્રીં સંપૂર્ણયૌવનમદાલસઘૂર્ણનેત્રીમ્ ।
ગન્ધર્વયક્ષસુરકિન્નર્નાગકન્યાં સ્વર્ગાદહો નિપતિતામિવ ચિન્તયામિ ॥

અદ્યાપિ તાંપ્રણયિનીં મૃગશાવકાક્ષીં પીયૂષપૂર્ણકુચકુમ્ભયુગં વહન્તીમ્ ।
પશ્યામ્યહં યદિ પુર્નદિવસાવસાને સ્વર્ગાપવર્ગનરરાજસુખં ત્યજામિ ॥

અદ્યાપિ તાં પ્રથમતો વરસુન્દરીણાં સ્નેહૈકપાત્રઘટિતામવનીશપુત્રીમ્ ।
હંહો જના મમ વિયોગહુતાશનોઽયં સોઢું ન શક્યત ઇતિ પ્રતિચિન્તયામિ ॥

અદ્યાપિ તાં પ્રથમમેવ ગતં વિરાગં નિર્ભર્ત્સ્ય રોષપરુષૈર્વચનૈર્મુહુર્મામ્ ।
આન્દોલનેન ચ નિતમ્બસહાયવૃત્ત્યા સમ્ચિન્તયામિ રત્યે સુદતીમભીક્ષ્ણમ્ ॥

અદ્યાપિ તાં પ્રથમસંગમજાતલજ્જાં બાલાં રસેન પતિતે મયિ મન્દપીઠે ।
ફૂર્કારકમ્પિતશિખાતરલપ્રદીપં કર્ણોત્પલેન વિનિવારયતીં સ્મરામિ ॥

અદ્યાપિ તાં ભુજલતાર્પિતકણ્ઠપાશાં વક્ષઃસ્થલં મમ પિધાય પયોધરાભ્યામ્ ।
ઈષન્નિમીલિતસલીલવિલોચનાન્તાં પશ્યામિ મૃગ્ધવદનાં વદનં પિબન્તીમ્ ॥

અદ્યાપિ તાં મદનમન્દિરવૈજયન્તીમ્ અન્તર્ગૃહે વિવસનાં દધતીં નિશાન્તે ।
અઙ્ગૈરનઙ્ગવિસરૈર્મમ ગાઢ્મઙ્ગમ્ આલિઙ્ગ્ય કેલિશયને શયિતાં સ્મરામિ ॥

અદ્યાપિ તાં મમ મનઃપરિતાપશાન્ત્યૈ ચક્ષુર્વિશુદ્ધતટિનીમલસાલસાઙ્ગીમ્ ।
શ્રીખણ્ડખણ્ડખચિતાચિતગાત્રયિષ્ટં તન્વીં સદા હૃદયહર્ષનિધિં સ્મરામિ ॥

અદ્યાપિ તાં મયિ કપાટસમીપલીને મન્માર્ગદત્તદૃશમાનનદત્તહસ્તામ્ મદ્ગોત્રચિહ્નિતપદં મૃદુકાકલીભિઃ કિંચિત્તરઙ્ગમનસં મનસા સ્મરામિ ॥

અદ્યાપિ તાં મયિ કૃતાગસિ દૃષ્ટભાવાં ભાષાં લપત્યપિ મુહુર્નિગૃહીતવાચમ્ ।
રામાં વિરુદ્ધઘનમન્યુસબાષ્પકણ્ઠાં નિઃશ્વાસશુષ્યદધરાં રુદતીં સ્મરામિ ॥