મહાસુભાષિતસંગ્રહ · શ્લોક 0879-0899

દન્તૌષ્ઠપીડનનખક્ષતરક્તસિક્તં તસ્યાઃ સ્મરામિ રતિબન્ધુરનિષ્ઠુરત્વમ્ ॥

અદ્યાપિ તત્સુરતકેલિવિમર્દખેદ- સંજાતઘર્મકણવિસ્ફુરિતં પ્રિયાયાઃ ।
આપાણ્ડુરં તરલતારનિમીલિતાક્ષં વક્ત્રં સ્મરામિ પરિપૂર્ણનિશાકરાભમ્ ॥

અદ્યાપિ તદ્વદનપઙ્કજગન્ધલુબ્ધ- ભ્રામ્યદ્દ્વિરેફચયચુમ્બિતગણ્ડયુગ્મમ્ ।
લીલાવધૂતકરપલ્લવકઙ્કનાનાં ક્વાણો વિમૂર્ચ્છતિ મનઃ સ્તુતરાં મદીયમ્ ॥

અદ્યાપિ તદ્વિકસિતામ્બુજમધ્યગૌરં ગોરોચનાતિલકભાસુરફાલરેખમ્ ।
ઈષન્મદાલસવિઘૂર્ણિતદૃષ્ટિપાતં તસ્યા મુખં પ્રતિ મનો મમ ગચ્છતીદમ્ ॥

અદ્યાપિ તન્નયનકજ્જલમુજ્જ્વલાસ્યં વિશ્રાન્તકર્ણયુગલં પરિહાસહેતોઃ ।
પશ્યે તવાત્મનિ નવીનપયોધરાભ્યાં ક્ષીણં વપુર્યદિ વિનશ્યતિ નો ન દોષઃ ॥

અદ્યાપિ તન્મદનકાર્મુકભઙ્ગુરભ્રુ- દન્તદ્યુતિપ્રકરકર્બુરિતાધરોષ્ઠમ્ ।
કર્ણાવસક્તપુલકોજ્જ્વલદન્તપત્રં તસ્યાઃ પુનઃ પુનરપીહ મુખં સ્મરામિ ॥

અદ્યાપિ તન્મનસિ સંપરિવર્તતે મે રાત્રૌ મયિ ક્ષુતવતિ ક્ષિતિપાલપુત્ર્યા ।
જીવેતિ મઙ્ગલવચઃ પરિહૃત્ય કોપાત્ કર્ણે કૃતં કનકપત્રમનાલપન્ત્યા ॥

અદ્યાપિ તાં કનકકઙ્કણભૂષિતાગ્ર- હસ્તાં ચ વક્ત્રકમલેન સુનિર્જિતેન્દુમ્ ।
લીલાવર્તીં સુરતખેદનિમીલિતાક્ષીં ધ્યાયામિ ચેતસિ મદાકુલલાલસાઙ્ગીમ્ ॥

અદ્યાપિ તાં કનકકાન્તિમદાલસાઙ્ગીં વ્રીડોત્સુકાં નિપતિતામિવ ચેષ્ટમાનામ્ ।
અઙ્ગાઙ્ગસઙ્ગપરિચુમ્બનજાતમોહાં તાં જીવનૌષધિમિવ પ્રમધાં સ્મરામિ ॥

અદ્યાપિ તાં કનકચમ્પકદામગૌરીં ફુલ્લારવિન્દવદનાં તનુરોમરાજીમ્ ।
સુપ્તોત્થિતાં મદનવિહ્વલસાલસાઙ્ગીં વિદ્યાં પ્રમાદગલિતામિવ ચિન્તયામિ ॥

અદ્યાપિ તાં કનકપત્રસનાથકર્ણામ્ ઉત્તુઙ્ગકર્કશકુચાર્પિતતારહારામ્ ।
કાઞ્ચીનિપુઞ્જિતવિશાલનિતમ્બબિમ્બામ્ ઉદ્દાનનૂપુરરણચ્ચરણાં સ્મરામિ ॥

અદ્યાપિ તાં કટિસમાર્પિતવામપાણિમ્ આકુઞ્ચિતૈકચરણાગ્રનિરુદ્ધભૂમિમ્ ।
સ્તમ્ભાવલમ્બિતભુજાં પથિ માં વ્રજન્તં પશ્યામિ બન્ધુરિતકંધરમીક્ષમાણામ્ ॥

અદ્યાપિ તાં કુટિલકુન્તલકેશપાશામ્ ઉન્તિદ્રતામરસપત્રવિશાલનેત્રામ્ ।
ઉત્તુઙ્ગપીવરપયોધરકુઙ્મલાઢ્યાં ધ્યાયામિ ચેતસિ યથૈવ ગુરૂપદેશમ્ ॥

અદ્યાપિ તાં ક્ષણવિયોગવિષોપમે યાં સઙ્ગે પુનર્બહુતરામમૃતાભિષેકામ્ ।
તાં જીવધારણકરીં મદનાતપત્રામ્ ઉદ્ધૃત્તકેશનિવહાં સુદતીં સ્મરામિ ॥

અદ્યાપિ તાં ક્ષિતિતલે વરકામિનીનાં સર્વાઙ્ગસુન્દરતયા પ્રથમૈકરેખામ્ ।
શૃઙ્ગારનાટકરસોત્તમપાનપાત્રીં કાન્તાં સ્મરામિ કુસુમાયુધબાણખિન્નામ્ ॥

અદ્યાપિ તાં ગતિનિરાકૃતરાજહંસીં ધમ્મિલ્લનિર્જિતકલાપમયૂખભાસામ્ ।
મત્તશ્રિયા મદચકોરવિલોલનેત્રાં સંચિન્તયામિ કલકણ્ટ્જસમાનકણ્ઠામ્ ॥

અદ્યાપિ તાં ગમનમિત્યુદિતં મદીયં શ્રુત્વૈવ ભીરુહરિણીમિવ ચઞ્ચલાક્ષીમ્ ।
વાચઃ સ્ખલદ્વિગલદશ્રુહલાકુલાક્ષીં સંચિન્તયામિ ગુરુશોકવિનમ્રવક્ત્રામ્ ॥

અદ્યાપિ તાં ગલિતબન્ધનકેશપાશાં સ્રસ્તસ્રજં સ્મિતસુધામધુરાધરૌષ્ઠીમ્ ।
પીનોન્નતસ્તનયુગોપરિચારુચુમ્બન્- મુક્તાવલીં રહસિ લોલદૃશં સ્મરામિ ॥

અદ્યાપિ તાં ચિરયિતે મયિ તન્નિવાસં રાત્રૌ સમાગતવતીં પરિવર્તમાનામ્ ।
ગત્વા સ્મિતં કિમપિ ચણ્ચલિતાં નિષણ્ણાં સખ્યા સમાગતવતીમધિકં સ્મરામિ ॥

અદ્યાપિ તાં જગતિ વર્ણયિતું ન કશ્ચિચ્ છક્નોત્યદૃષ્ટસદૃશીં ચ પરિગ્રહં મે ।
દૃષ્ટં દ્વયોઃ સદૃશયોઃ ખલુ યેન રૂપં શક્તો ભવેદ્યદિ સ એવ નરો ન ચાન્યઃ ॥