મહાસુભાષિતસંગ્રહ · શ્લોક 0801-0820

અથોચ્યતે શ્વાનરુતસ્ય સારં સારં સમસ્તેષ્વપિ શાકુનેષુ ।
વિસ્પષ્ટચેષ્ટં શુભલક્ષણં ચ શુભાશુભં પ્રાક્તનકર્મપાકમ્ ॥

અથોત્તરસ્યાં દિશિ ખઞ્જરીટમ્ આલોક્ય કોઽપિ સ્મિતમાદધાનઃ ।
કસ્યાશ્ચિદાસ્યે સ્મિતચારુભાસિ સભાવયામાસ વિલોચનાનિ ॥

અથોદ્યયૌ બાલસુહૃત્ સ્મરસ્ય શયામાધવઃ શ્યામલલક્ષ્મભઙ્ગ્યા ।
તારાવધૂલોચનચુમ્બનેન લીલાવિલીનાઞ્જનબિન્દુરિન્દુઃ ॥

અથોપગૂઢે શરદા શશાઙ્કે પ્રાવૃડ્ યયૌ શાન્તતડિત્કટાક્ષા ।
કાસાં ન સૌભાગ્યગુણોઽઙ્ગનાનાં નષ્ટઃ પરિભ્રષ્ટ્પયોધરાણામ્ ॥

અદઃ સમિત્સંમુખવીરયૌવત- ત્રટદ્ભુજાકમ્બુમૃણાલહારિણી ।
દ્વિષદ્ગણસ્ત્રૈણદૃગમ્બુનિર્ઝરે યશોમરાલાવલિરસ્ય ખેલતિ ॥

અદણ્ડનમદણ્ડ્યાનાં દણ્ડ્યાનાં ચાપિ દણ્ડનમ્ ।
અગ્રાહ્યાગ્રહણં ચૈવ ગ્રાહ્યાણાં ગ્રહણં તથા ॥

અદણ્ડ્યાન્ દણ્ડયન્ રાજા દણ્ડ્યાંશ્ચૈવાપ્યદણ્ડયન્ ।
અયશો મહદાપ્નોતિ નરકં ચૈવ ગચ્છતિ ॥

અદત્તં નાદત્તે કૃતસુકૃતકામઃ કિમપિ યઃ શુભશ્રેણિસ્તસ્મિન્ વસતિ કલહંસીવ કમલે ।
વિપત્ તસ્માદ્ દૂરં વ્રજતિ રજનીવામ્બરમણેર્ વિનીતં વિદ્યેવ ત્રિદિવશિવલક્ષ્મીર્ભજતિ તમ્ ॥

અદત્તદોષેણ ભવેદ્ દરિદ્રો દરિદ્રદોષેણ કરોતિ પાપમ્ ।
પાપાદવશ્યં નરકં પ્રયાતિ પુનર્દરિદ્રઃ પુનરેવ પાપી ॥

અદત્તભુક્તમુત્સૃજ્ય ધનં સુચિરરક્ષિતમ્ ।
મૂષકા ઇવ ગચ્છન્તિ કદર્યાઃ સ્વક્ષયે ક્ષયમ્ ॥

અદત્તાનામુપાદાનં હિંસા ચૈવાવિધાનતઃ ।
પરદારોપસેવા ચ શારીરં ત્રિવિધં સ્મૃતમ્ ॥

અદત્તેત્યાગતા લજ્જા દત્તેતિ વ્યથિતં મનઃ ।
ધર્મસ્નેહાન્તરે ન્યસ્તા દુઃખિતાઃ ખલુ માતરઃ ॥

અદનસ્પૃહયા દુરીશ્વરાણાં સદન્દ્વારિ વિતર્દિમાશ્રયન્તામ્ ।
અપુનર્ભવસાધનં શરીરં જરયામો વયમોં નમઃ શિવાય ॥

અદભ્રમભ્રોપલપટ્ટકેષુ યે શિતીક્રિયન્તે મદનેન પત્રિણઃ ।
તડિલ્લતા તન્નિકષોત્થપાવક- સ્ફુલિઙ્ગભઙ્ગીં લલિતાઙ્ગિ સેવતે ॥

અદમ્ભા હિ રમ્ભા વિલક્ષા ચ લક્ષ્મીર્ ઘૃતાચી હ્રિયા ચીરસંચ્છાદિતાસ્યા ।
અહો જાયતે મન્દવર્ણાપ્યપર્ણા સમાકર્ણ્ય તસ્યા ગુણસ્યૈકદેશમ્ ॥

અદયં ઘર્ષ શિલાયાં દહ વા દાહેન ભિન્ધિ લૌહેન ।
હે હેમકાર કનકં મ માં ગુઞ્જાફલૈસ્તુલય ॥

અદય દશસિ કિં ત્વં બિમ્બબુદ્ધ્યાધરં મે ભવ ચપલ નિરાશઃ પક્વજમ્બૂફલાનામ્ ।
ઇતિ દયિતમવેત્ય દ્વારદેશાપ્તમન્યા નિગદતિ શુકમુચ્ચૈઃ કાન્તદન્તક્ષતૌષ્ઠી ॥

અદર્શનાદાપતિતઃ પુનશ્ચાદર્શનં ગતઃ ।
ન ત્વાસૌ વેદ ન ત્વં તં કઃ સન્ કમનુશોચસિ ॥

અદર્શનાદાપતિતાઃ પુનશ્ચાદર્શનં ગતાઃ ।
ન તે તવ ન તેષાં ત્વં તત્ર કા પરિદેવના ॥

અદર્શને દર્શનમાત્રકામા દૃષ્ટૌ પરિષ્વઙ્ગરસૈકલોલા ।
આલિઙ્ગિતાયાં પુનરાયતાક્ષ્યામ્ આશાસ્મહે વિગ્રહયોરભેદમ્ ॥