મહાસુભાષિતસંગ્રહ · શ્લોક 0621-0640

અતિસંપદમાપન્નૈર્ ભેતવ્યં પતનાદ્ભૂયઃ ।
અત્યુચ્ચશિખરા મેરોઃ શક્રવજ્રેણ પાતિતાઃ ॥

અતિસજ્જનદુર્ગતિઃ ખલપઙ્ક્તિસમુન્નતિઃ ।
યુવતિસ્તનવિચ્યુતિરિતિ કિં વિધિનિર્મિતિઃ ॥

અતિસત્કૃતા અપિ શઠાઃ સહભુવમુજ્ઝન્તિ જાતુ ન પ્રકૃતિમ્ ।
શિરસા મહેશ્વરેણા- ઽપિ નનુ ધૃતો વક્ર એવ શશી ॥

અતિસાહસમતિદુષ્કરમ્ અત્યાશ્ચર્યં ચ દાનમર્થાનામ્ ।
યોઽપિ દદાતિ શરીરં ન દદાતિ સ વિત્તલેશમપિ ॥

અતિસાહસિકં શૂરા મન્ત્રિણસ્તં નિરૂપકમ્ ।
વિનીતં ગુરવો જજ્ઞુર્ ધૂર્તમન્તઃપુરાઙ્ગનાઃ ॥

અતિહરિતપત્રપરિકર- સંપન્નસ્પન્દનૈકવિટપસ્ય ।
ઘનવાસનૈર્મયૂખૈઃ કુસુમ્ભકુસુમાયતે તરણિઃ ॥

અતીતલાભસ્ય સુરક્ષણાર્થં ભવિષ્યલાભસ્ય ચ સંગમાર્થમ્ ।
આપત્પ્રપન્નસ્ય ચ મોક્ષણાર્થં યન્મન્ત્ર્યતેઽસૌ પરમો હિ મન્ત્રઃ ॥

અતીતાનાગતાનર્થાન્ વિપ્રકૃષ્ટતિરોહિતાન્ ।
વિજાનાતિ યદા યોગી તદા સંવિદિતિ સ્મૃતા ॥

અતીતાનાગતા ભાવા યે ચ વર્તન્તિ સાંપ્રતમ્ ।
તાન્ કાલનિર્મિતાન્ બુદ્ધ્વા ન સંજ્ઞાં હાતુમર્હસિ ॥

અતીતા શીતાર્તિઃ પ્રસરતિ શનૈરુષ્મકણિકા દિનાનિ સ્ફાયન્તે રવિરપિ રથં મન્થરયતિ ।
હિમાનીનિર્મુક્તઃ સ્ફુરતિ નિતરાં શીતકિરણઃ શરાણાં વ્યાપારઃ કુસુમધનુષો ન વ્યવહિતઃ ॥

અતીત્ય બન્ધૂનવલઙ્ઘ્ય મિત્રાણ્ય્ આચાર્યમાગચ્છતિ શિષ્યદોષઃ ।
બાલં હ્યપત્યં ગુરવે પ્રદાતુર્ નૈવાપરાધોઽસ્તિ પિતુર્ન માતુઃ ॥

અતીન્દ્રિયાયાં પરલોકવૃત્તાવ્ ઇહૈવ તીવ્રાશુભપાકશંસી ।
દૃષ્યેત નાશો યદિ નામ નાશુ ન કઃ કુકૃત્યેન યતેત ભૂત્યૈ ॥

અતીવ કર્કશાઃ સ્તબ્ધા હિંસ્રજન્તુભિરાવૃતાઃ ।
દુરાસદાશ્ચ વિષમા ઈશ્વરાઃ પર્વતા ઇવ ॥

અતીવ ખલુ તે કાન્તા વસુધા વસુધાધિપ ।
ગતાસુરપિ યાં ગાત્રૈર્ માં વિહાય નિષેવસે ॥

અતીવ બલહીનં હિ લઙ્ઘનં નૈવ કારયેત્ ।
યે ગુણા લઙ્ઘને પ્રોક્તાસ્ તે ગુણા લઘુભોજને ॥

અતીવ સૌખ્યશુભદા યામ્યા નિશિ ભવેચ્છિવા ।
પૂર્વસ્યાં તત્પુરાધ્યક્ષમ્ અન્યં કુર્યાદહર્મુખે ॥

અતુલિતબલધામં સ્વર્ણશૈલાભદેહં દનુજવનકૃશાનું જ્ઞાનિનામગ્રગણ્યમ્ ।
સકલગુણનિધાનં વાનરાણામધીશં રઘુપતિવરદૂતં વાતજાતં નમામિ ॥

અતુષ્ટં સ્વેષુ દારેષુ ચપલં ચપલેન્દ્રિયમ્ ।
નયન્તિ નિકૃતિપ્રજ્ઞં પરદારાઃ પરાભવમ્ ॥

અતુષ્ટિદાનં કૃતપૂર્વનાશનમ્ અમાનનં દુશ્ચરિતાનુકીર્તનમ્ ।
કથાપ્રસઙ્ગેન ચ નામવિસ્મૃતિર્ વિરક્તભાવસ્ય જનસ્ય લક્ષણમ્ ॥

અતુહિનરુચિનાસૌ કેવલં નોદયાદ્રિઃ ક્ષણમુપરિગતેન ક્ષ્માભૃતઃ સર્વ એવ ।
નવકરનિકરેણ સ્પષ્ટબન્ધૂકસૂન- સ્તબકરચિતમેતે શેખરં બિભ્રતીવ ॥