મહાસુભાષિતસંગ્રહ · શ્લોક 0521-0540

અતસ્કરકરગ્રાહ્યમ્ અરાજાજ્ઞાવશંવદમ્ ।
અદાયાદવિભાગાર્હં ધનમાર્જયતસ્થિરમ્ ॥

અતસ્તુ વિપરીતસ્ય નૃપતેરજિતાત્મનઃ ।
સંક્ષિપ્યતે યશો લોકે ઘૃતબિન્દુરિવામ્ભસિ ॥

અતસ્ત્વષ્ટાઙ્ગયા બુદ્ધ્યા નૃપતિર્નીતિશાસ્ત્રવિત્ ।
સમર્થઃ પૃથિવીં કૃત્સ્નામ્ અપિ જેતું વિચક્ષણઃ ॥

અતાડયત્ પલ્લવપાણિનૈકાં પુષ્પોચ્ચયે રાજવધૂમશોકઃ ।
તચ્છેદહેતોરલિપઙ્કિ ભઙ્ગ્યા વ્યાકૃષ્યતે વાસિલતા સ્મરેણ ॥

અતિકલુષમાશુનશ્વરમ્ આપાતસ્ફુરણમનભિલાષકરમ્ ।
અપિ હૃષ્યન્તિ જનાઃ કથમ્ અવલમ્બ્ય જ્ઞાનખદ્યોતમ્ ॥

અતિકુપિતમનસ્કે કોપનિષ્પત્તિહેતું વિદધતિ સતિ શત્રૌ વિક્રિયાં ચિત્રરૂપામ્ ।
વદતિ વચનમુચ્ચૈર્દુઃશ્રવં કર્કશાદિ કલુષવિકલતા યા તાં ક્ષમાં વર્ણયન્તિ ॥

અતિકુપિતા અપિ સુજના યોગેન મૃદૂભવન્તિ ન તુ નીચાઃ ।
હેમ્નઃ કઠિનસ્યાપિ દ્રવણોપાયોઽસ્તિ ન તૃણાનામ્ ॥

અતિકૃષ્ણેષ્વતિગૌરેષ્વ્ અતિપીનેષ્વતિકૃશેષુ મનુજેષુ ।
અતિદીર્ઘેષ્વતિલઘુષુ પ્રાયેણ ન વિદ્યતેઽપત્યમ્ ॥

અતિક્રમ્યાપાઙ્ગં શ્રવણપથપર્યન્તગમન- પ્રયાસેનેવાક્ષ્ણોસ્તરલતરતારં ગમિતયોઃ ।
ઇદાનીં રાધાયાઃ પ્રિયતમસમાયાતસમયે પપાતસ્વે દામ્બુપ્રસર ઇવ હર્ષાશ્રુનિકરઃ ॥

અતિક્રાન્તં તુ યઃ કાર્યં પશ્ચાચ્ચિન્તયતે નરઃ ।
તચ્ચાસ્ય ન ભવેત્ કાર્યં ચિન્તયા તુ વિનશ્યતિ ॥

અતિક્રાન્તઃ કાલઃ સુચરિતશતામોદસુભગો ગતાઃ શુક્લા ધર્મા નવનલિનસૂત્રાંશુતનુતામ્ ।
પરિમ્લાનઃ પ્રાયો બુધજનકથાસારનિપુણો નિરાનન્દં જાતં જગદિદમતીતોત્સવમિવ ॥

અતિક્રાન્તઃ કાલો લટભલલનાભોગસુભગો ભ્રમન્તઃ શ્રાન્તાઃ સ્મઃ સુચિરમિહ સં સારસરણૌ ।
ઇદાનીં સ્વઃ સિન્ધોસ્તટભુવિ સમાક્રન્દનગિરઃ સુતારૈઃ ફૂત્કારૈઃ શિવ શિવ શિવેતિ પ્રતનુમઃ ॥

અતિક્રાન્તમતિક્રાન્તમ્ અનાગતમનાગતમ્ ।
વર્તમાનસુખભ્રાન્તિર્ નવા ભોગિદરિદ્રયોઃ ॥

અતિક્લેશેન યદ્ દ્રવ્યમ્ અતિલોભેન યત્સુખમ્ ।
પરપીડા ચ યા વૃત્તિર્ નૈવ સાધુષુ વિદ્યતે ॥

અતિક્લેશેન યેઽર્થાઃ સ્યુર્ ધર્મસ્યાતિક્રમેણ ચ ।
અરેર્વા પ્રણિપાતેન મા સ્મ તેષુ મનઃ કૃથાઃ ॥

અતિક્લેશે મનઃસ્થૈર્યં ક્રમેણ સહનં તથા ।
જયલાભાય હેતૂ દ્વૌ સૈન્યાનામધિકૌ વિદુઃ ॥

અતિગમ્ભીરમનાવિલમ્ અક્ષોભ્યમદૃષ્ટપારમવિલઙ્ઘ્યમ્ ।
અવિરલતરઙ્ગસંકુલમ્ એક્ષિષિ વિજ્ઞાનસાગરં મહતામ્ ॥

અતિગમ્ભીરે ભૂપે કૂપ ઇવ જનસ્ય દુઃખતારસ્ય ।
દધતિ સમીહિતસિદ્ધિં ગુણવન્તઃ પાર્થિવા ઘટકાઃ ॥

અતિચપલકલત્રં પ્રાતિવેશ્માતિચૌર- સ્તનયગતિમાંધં (?) બાલરણ્ડા તનૂજા ।
અતિશઠમથ મૈત્રી (?) વશ્યતા સર્વજન્તો રિપુભયતનુરોગૌ ચાષ્ટદુઃખં નરાણામ્ ॥

અતિચારુચન્દ્રરોચિઃ કુર્વન્ કુસુમેષુકેલિકેતનતામ્ ।
સુરભિઃ કદાનુયાસ્યતિ સમુકુલરુચિરસ્તનીહારઃ ॥