મહાસુભાષિતસંગ્રહ · શ્લોક 0501-0520

અતઃ પરં પ્રવક્ષ્યામિ શરાણાં લક્ષણાં શુભમ્ ।
સ્થૂલં ન ચાતિસૂક્ષ્મં ચ ન પક્વં ન કુભૂમિજમ્ ।
હીનગ્રન્થિવિદીર્ણં ચ વર્જયેદીદૃશં શરમ્ ॥

અતઃ પરમગમ્યોઽયં પન્થા વિશ્રમ્યતામિતિ ।
પ્રત્યક્ષિયુગલં તસ્યાઃ કર્ણૌ વક્તુમિવાગતૌ ॥

અતઃ પ્રશસ્તે નક્ષત્રે શુભે વારે શુચિષ્મતા ।
ઔષધં વિધિવદ્ગ્રાહ્યં સ્મૃત્વા દેવીં ચ સુપ્રભામ્ ॥
મન્ત્રઃ -- ઓં સુપ્રભાયૈ નમઃ ॥

અતઃ સંદેહદોલાયાં રોપણીયં ન માનસમ્ ।
ગ્રન્થેઽસ્મિંશ્ચાપચતુરૈર્ ચીરચિન્તામણૌ ક્વચિત્ ॥

અતઃ સમીક્ષ્ય કર્તવ્યં વિશેષાત્ સંગતં રહઃ ।
અજ્ઞાતહૃદયેષ્વેવં વૈરીભવતિ સૌહૃદમ્ ॥

અતઃ સુસ્થિતચિત્તેન પ્રસ્થાતવ્યં શુભે દિને ।
સ્મૃત્વા ક્ષેમંકરીં દેવીં પશ્યતા શકુનાઞ્શુભાન્ ॥

અત આહર્તુમિચ્છામિ પાર્વતીમાત્મજન્મને ।
ઉત્પત્તયે હવિર્ભોંક્તુર્ યજમાન ઇવારણિમ્ ॥

અત એવ હિ નેચ્છન્તિ સાધવઃ સત્સમાગમમ્ ।
યદ્વિયોગાસિલૂનસ્ય મનસો નાસ્તિ ભેષજમ્ ॥

અતટસ્થસ્વાદુફલ- ગ્રહણવ્યવસાયનિશ્ચયો યેષામ્ ।
તે શોકક્લેશરુજાં કેવલમુપયાન્તિ પાત્રતાં મન્દાઃ ॥

અતત્ત્વજ્ઞોઽસિ બાલશ્ચ દુસ્તોષોઽપૂરણોઽનલઃ ।
નૈવ ત્વં વેત્થ સુલભં નૈવ ત્વં વેત્થ દુર્લભમ્ ॥

અતથ્યાન્યપિ તથ્યાનિ દર્શયન્તિ હિ પેશલાઃ ।
સમે નિમ્નોન્નતાનીવ ચિત્રકર્મવિદો જનાઃ ॥

અતથ્યાસ્તથ્યસંકાશાસ્ તથ્યાશ્ચાતથ્યદર્શનાઃ ।
દૃશ્યન્તે વિવિધા ભાવાસ્ તસ્માદ્યુક્તં પરીક્ષણમ્ ॥

અતથ્યેનોચ્યમાનસ્ય કઃ કોપો યન્ન તત્તથા ।
તથ્યેનાપિ હિ કઃ કોપો યદનુક્તેઽપિ મત્તથા ॥

અતનુજ્વરપીડિતાસિ બાલે તવ સૌખ્યાય મતો મમોપવાસઃ ।
રસમર્પય વૈદ્યનાથ નાહં ભવદાવેદિતલઙ્ઘને સમર્થા ॥

અતનુના નવમમ્બુદમામ્બુદં સુતનુરસ્ત્રમુદસ્તમવેક્ષ્ય સા ।
ઉચિતમાયતનિઃશ્વસિતચ્છલાચ્ છ્વસનશસ્ત્રમમુઞ્ચદમું પ્રતિ ॥

અતન્ત્રી વાગ્વીણા સ્તનયુગલમગ્રીવકલસા- વનબ્જં દૃઙ્નીલોત્પલદલમપત્રોરુકદલી ।
અકાણ્ડા દોર્વલ્લી વદનમલકલઙ્કઃ શશધરસ્ તદસ્યાસ્તારુણ્યં ભુવનવિપરીતં ઘટયતિ ॥

અતન્દ્રચન્દ્રાભરણા સમુદ્દીપિતમન્મથા ।
તારકાતરલા શ્યામા સાનન્દં ન કરોતિ કમ્ ॥

અતન્દ્રિતચમૂપતિપ્રહિતહસ્તમસ્વીકૃત- પ્રણીતમણિપાદુકં કિમિતિ વિસ્મિતાન્તઃપુરમ્ ।
અવાહનપરિષ્ક્રિયં પતગરાજમારોહતઃ કરિપ્રવરબૃંહિતે ભગવતસ્ત્વરાયૈ નમઃ ॥

અતસીકુસુમોપમેયકાન્તિર્ યમુનાલકુકદમ્બમૂલવર્તી ।
નવગોપવધૂવિનોદશાલી વનમાલી વિતનોતુ મઙ્ગલાનિ ॥

અતસીપુષ્પસંકાશં ખં વીક્ષ્ય જલદાગમે ।
યે વિયોગેઽપિ જીવન્તિ ન તેષાં વિદ્યતે ભયમ્ ॥